Judges 12

1

2

3

4

5

6

7

8

9

10

11

12

13

14

15

16

17

18

19

20

21

¹Pi pumo’on nu Efraim e ra fal’egned rograd ni fan ko mael; rabad ra th’abed fare Lul’ ni Jordan ngranod nga Zafon marbad ra ga’argad ngak Jefthah, “Mang ni kamth’ab fare mathil ni ngam cham ngak piyu Ammon ni dam piningmad nggu uned ngom? Nggu urfiyed e naun nga daken lolgem!”

²Machane me yog Jefthah ngorad ni ga’ar, “Tirog e girdi’ nge gag e ug malu’eg thingad piyu Ammon. Mu gu piningmed, machane dambad mu ayuweged gag u pa’rad.

³Nap’an ni gguy ndab mu ayuwgad, mu gu pagfan e fan rog nggu th’ab e mathil ngug cham ngorad, me gel nageg SOMOL ngorad: Ere mangfan ni kambad e chiney ni cham ngog?”

⁴Ma aram me kunuy Jefthah urngin e pumo’on nu Gilead nga ta’bang, ngar chamgad ngak e pumo’on nu Efraim ngar gelgad ngorad. (Me ga’ar yu Efraim, “Gimed yu Gilead ni gimed bay u Efraim ngu Manasseh, e kan chuwegmed u Efraim!”)

⁵Rogon ni yira ayweg ni dabi mil piyu Efraim, e piyu Gilead e ngar koled yuyang ko fare lul’ ni Jordan nrayag i th’ab e lul’ riy. Ma nap’an nra yib reb e girdi’ nu Efraim ni be guy rogon ni nge mil nge th’ab e lul’ nga barba’, me fith e pi pumo’on nu Gilead ni lungurad ngak, “Gur be’ nu Efraim?” Ma fa’anra ga’ar, “Danga’,”

⁶marogned ngak ni nge yog e re bugithin ni ba’aray “Shibboleth.” Ya fa’anra yog ni “Sibboleth,” ni bochan e dabiyag rok ni nge yog nib paluw. Ma aram miyad kol facha’ ngar thanged e fan rok u bang ko gin ni yima th’ab e Lul’ ni Jordan riy. Ngiyal’nem e 42,000 piyu Efraim nli’rad ngarm’ad.

⁷I gafaliy Jefthah yu Israel ni nel’ e duw. Ma aram me yim’ min k’eyag u lan e binaw rok u Gilead.

⁸Ma nga tomuren Jefthah, me gafaliy Ibzan nu Bethlehem yu Israel.

⁹Ma guyey e pumo’on ni fak ma guyey e ppin. I pi’ pifak ni ppin ni mabgol nga wuru’ fare ke girdi’ me fek guyey e rugod u wuru fare ke girdi’ ngar le’engiyed pifak ni pumo’on. I Ibzan e i gafaliy yu Israel ni medlip e duw,

¹⁰ma aram me yim’ min k’eyag u Bethlehem.

¹¹Nga tomuren Ibzan, me Elon nu Zebulun e gafaliy yu Israel ni ragag e duw.

¹²Nap’an ni yim’ min k’eyag u Aijalon u lan bangi n’en nib milfan ko Zebulun.

¹³Nga tomrem Elon, me Abdon nib mo’on ni fak Hillel nu Pirathon e gafaliy yu Israel.

¹⁴Ma aningeg i ragag e pumo’on ni fak ma guyey e pagel ni fak pifak, ni uranod u daken medlip i ragag e dongki. I Abdon e i gafaliy yu Israel ni meruk e duw,

¹⁵ma aram me yim’ min k’eyag u Pirathon u lan bang nib milsuwon ko Efraim ni go’ burey ko pi Amalek.