Jozua 14:1-15

¹Kala hine o phuva, so o Izraeliti chudle andro Kanaan, avke sar lenge dine sar ďeďictvos o rašaj o Eleazar the o Jozua, o čhavo le Nunoskero, the le kmeňengere vodci andral o Izrael.

²O ďeďictvos dine lenge prekal o losos, avke sar phenďa o RAJ prekal o Mojžiš, hoj te den le eňa the jepaš kmeňenge.

³O Mojžiš imar diňa duj the jepaš kmeňenge o ďeďictvos pal o Jordan, ale le Leviten na diňa ňič.

⁴Le Jozefoskere čhavendar sas duj kmeňi: o Menašše the o Efrajim. Le Leviten na diňa ňisavo ďeďictvos andre odi phuv. Chudle ča fori, hoj ode te bešen, the maľi prekal o gurumňa the stadi.

⁵O Izraeliti kerde avke, sar o RAJ phenďa le Mojžišoske, a rozulade o phuva.

⁶Sar o Izraeliti mek sas andro Gilgal, avle o manuša andral o kmeňos Juda ko Jozua. O Kaleb, o čhavo le Jefunnoskero andral e Kenizziko fajta, leske phenďa: “Tu džanes mištes, so phenďa o RAJ le Devleskere manušeske le Mojžišoske andro Kadeš-Barnea pal ma the pal tu.

⁷Sas mange saranda (40) berš, sar man le RAJESKERO služobňikos o Mojžiš bičhaďa andral o Kadeš-Barnea te predikhel e phuv. Me leske phenďom o čačipen pal oda, so dikhľom.

⁸Mire phrala, save džanas manca, darade avri le manušen. Ale me man ľikeravas le RAJESTAR, mire Devlestar.

⁹Mek oda džives o Mojžiš man diňa vera: ‘E phuv, pal savi phirehas, ela pro furt tiro the tire čhavengero ďeďictvos, bo furt tut ľikerehas le RAJESTAR, mire Devlestar.’

¹⁰Akana, šun! O RAJ dži akana man ľikerelas paš o dživipen, avke sar phenďa. Pregeľa imar saranda the pandž (45) berš akorestar, sar o RAJ oda phenďa le Mojžišoske. Oda sas akor, sar o Izraeliti mek phirenas pal e pušťa, a akana mange imar hin ochtovardeš the pandž (85) berš.

¹¹Ole dživesestar, so man o Mojžiš bičhaďa, som mek furt zoralo. Avke sar ešebnovar (peršovar) hin man mek ajsi zor, hoj adadžives šaj džav pro mariben.

¹²Vašoda de mange akana kala brehi, pal save oda džives vakerelas o Mojžiš. Bo tu korkoro akor šunďal, hoj ode hine o Anaka the bare fori zorale murenca. Šaj el, hoj o RAJ ela manca a tradava len avri, avke sar oda phenďa o RAJ.”

¹³Avke o Jozua požehňinďa le Kaleb, le Jefunnoskere čhas, a diňa leske o foros Hebron vaš leskero ďeďictvos.

¹⁴O Kaleb chudľa o Hebron sar ďeďictvos, bo furt pes ľikerelas le RAJESTAR, le Izraeloskere Devlestar.

¹⁵Angloda pes o Hebron vičinelas Kirjat-Arba, bo o Arba sas nekbareder manuš maškar o Anaka. Paľis andre odi phuv sas smirom le maribnastar.