Jozua 10:8-36

⁸O RAJ phenďa le Jozuaske: “Ma dara tut lendar, bo diňom tuke len andro vasta. Ňiko lendar na obačhola anglal tute.”

⁹O Jozua džalas caľi rat andral o Gilgal a geľa pre lende avke, hoj aňi na užarenas pre oda.

¹⁰O RAJ kerďa, hoj o Amoreja la daratar ačhile sar bi e goďi anglo Izraeliti. Paš o Gibeon o Izraeliti igen but dženen murdarde a džanas pal lende le dromeha upre pro Bet-Choron a murdarkerenas len dži ke Azeka the Makkeda.

¹¹Sar denašenas le Izraelitendar tele pal o brehos le dromeha andral o Bet-Choron, o RAJ diňa, hoj te perel pre lende andral o ňebos bare ľegošne krupi sar bara dži ke Azeka avke, hoj ola, save mule le ľegošne krupendar, sas buter sar ola, saven murdarde o Izraeliti le šabľenca.

¹²Oda džives, sar o RAJ diňa le Izraelitenge te ňerinel (zviťazinel) upral o Amoreja, o Jozua vakerelas le RAJEHA. Anglal calo Izrael phenďa: “Khameja, zaačhav tut upral o Gibeon a tu, čhoneja, upral e dolina Ajalon!”

¹³Avke o kham the o čhon zaačhile, medik o manuša na ňerinde upral peskere ňeprijaťeľa. Oda hin pisimen andro le Jašariskero zvitkos. O kham pes zaačhaďa maškar o ňebos a calo džives na zageľa.

¹⁴Ajso džives na sas aňi angloda aňi paľis, hoj o RAJ kavke šunďahas avri le manušes. O RAJ pes čačes marelas vaš o Izrael.

¹⁵Paľis o Jozua pes visarďa andro taboris Gilgal a calo Izrael leha.

¹⁶Ola pandž kraľa denašle a garude pes andre jaskiňa paš e Makkeda.

¹⁷Avke le Jozuaske gele te phenel: “Arakhle pes ola pandž kraľa. Garuven pes andre jaskiňa paš e Makkeda.”

¹⁸O Jozua phenďa: “Začhiven e chev andre jaskiňa bare barenca a ačhaven paš late le muršen, hoj te merkinen.

¹⁹Ale tumen pes ma zaačhaven. Džan pre peskere ňeprijaťeľa palunestar a ma domuken lenge, hoj pes te visaren pre peskere fori, bo o RAJ tumaro Del, tumenge len diňa andro vasta.”

²⁰O Jozua the o Izraeliti preačhile o mariben peskere ňeprijaťeľenca, bo murdarde maj savoren. Ole, save predžiďile, denašle a dochudle pes andre peskere zorale fori le murenca.

²¹Savore manuša pes visarde pale a mištes dogele andro taboris ko Jozua paš e Makkeda. Ňiko peske imar na domukľa te phenel aňi lav pro Izraeliti.

²²Avke o Jozua phenďa: “Phundraven e chev andre jaskiňa a anen ke mande ole pandž kraľen.”

²³Kerde oda a ande ke leste andral e jaskiňa ole kraľen andral o Jeruzalem, Hebron, Jarmut, Lachiš the Eglon.

²⁴Sar ole kraľen ande ke leste, o Jozua vičinďa savore Izraeliten a le veľiťeľenge, save avle leha, phenďa: “Aven a terďuven le pindrenca pro meňa kale kraľenge!” On gele a terďile lenge pro meňa.

²⁵Paľis lenge o Jozua phenďa: “Ma daran tumen aňi ma izdran! Aven zorale a bi e dar, bo ada kerela o RAJ savore tumare ňeprijaťeľenca, pre save džana pro mariben.”

²⁶Paľis o Jozua len diňa te murdarel a te figinel pro pandž stromi. Ode sas figimen, medik na zaračiľa.

²⁷Sar zaračolas, diňa o Jozua len te lel tele a te čhivel andre jaskiňa, andre savi pes imar angloda garuvenas. Paľis zathode e chev andre jaskiňa le bare barenca, so hine ode dži adadžives.

²⁸O Jozua mek oda džives zaiľa o foros Makkeda a le manušen odarik murdarďa la šabľaha. Ňikas na mukľa te dživel. Le kraľiha andral e Makkeda kerďa avke, sar angloda le kraľiha andral o Jericho.

²⁹Paľis o Jozua savore Izraelitenca geľa andral e Makkeda ko foros Libna a džalas pre leste pro mariben.

³⁰The kada foros le kraľiha diňa o RAJ le Izraelitenge andro vasta. Marenas len le šabľenca a murdarde savore manušen odarik – ňikaske na dine te predživel. Lengere kraľiha kerďa avke sar le kraľiha andral e Jericho.

³¹Paľis o Jozua pregeľa cale Izraeloha andral e Libna ko foros Lachiš. Ode pes rozthode a džanas pro mariben pro manuša andral oda foros.

³²O RAJ diňa o foros Lachiš le Izraelitenge a pro dujto džives les zaile. Murdarde savoren le šabľenca, avke sar kerde andre Libna.

³³Akor o kraľis o Horam avľa pro mariben andral o foros Gezer te pomožinel le kraľiske andro Lachiš, ale o Jozua ňerinďa upral leste the upral leskere manuša avke, hoj ňiko lendar na predžiďiľa.

³⁴Paľis o Jozua pregeľa andral o Lachiš savore Izraelitenca ko foros Eglon a ode pes rozthode a džanas pre leste pro mariben.

³⁵Mek oda džives les zaiľa. Murdarde le šabľenca savoren, save sas andro foros, avke sar oda kerde le foroha Lachiš.

³⁶Paľis o Jozua savore Izraelitenca gele andral o Eglon ko foros Hebron pro mariben.