IOSUA 21:8-29

⁸Inai hanua ibounai, mai edia rei gabudia danu, Israela taudia ese Levi taudia dekenai idia henia, laki gadara dekena amo, Lohiabada ese Mose ia oda henia hegeregerena.

⁹Iuda iduhu bona Simeona iduhu taudia edia hanua, laki dekenai idia abia hidi, edia ladana be inai:

¹⁰Inai hanua be Arona ena tubuna taudia, Levi orea, bona Kohata bese taudia dekenai idia henia, badina laki ese Kohata ia gwauraia guna:

¹¹Kiriata Araba hanua, ena ladana ta be Heberona, mai ena rei gabudia danu, Iuda ena ororo tano dekenai. Araba be Anaki besena ena tamana.

¹²To inai hanua ena uma gabudia, bona hanua maragidia be Kaleba Iepune dekenai idia henia vadaeni guna, iena tano.

¹³Vadaeni hahelagaia tauna Arona ena tubuna taudia dekenai idia henia tano be inai: Heberona, (ala-ala kava taudia edia heau mauri hanua ta), Libina, mai ena rei gabudia danu,

¹⁴Iatiri, mai ena rei gabudia danu, Esetemoa, mai ena rei gabudia danu.

¹⁵Bona Holona, mai ena rei gabudia danu, bona Debiri, mai ena rei gabudia danu.

¹⁶Bona Aina, bona Iuta, bona Bete Semese, mai edia rei gabudia danu. Unai iduhu ruaosi Iuda bona Simeona, dekena amo idia abia hanua be 9.

¹⁷Ma Beniamina iduhu dekena amo idia abia hanua be Gibeona bona Geba, mai edia rei gabudia danu,

¹⁸bona Anatoto, bona Alamono, mai edia rei gabudia danu, hanua 4.

¹⁹Hahelagaia taudia, Arona ena tubuna taudia, dekenai idia henia hanua ibounai be 13.

²⁰Kohata bese taudia oredia, Levi taudia, ese Eparaima iduhu taudia dekena amo, edia hanua haida idia abia.

²¹Eparaima ese ia henidia hanua be inai: Sekema, mai ena rei gabudia danu, Eparaima ororo tano lalonai (Sekema be ala-ala kava taudia edia heau mauri hanua ta), bona Gesere, mai ena rei gabudia danu,

²²bona Kibesaimi, bona Bete Horono, mai edia rei gabudia danu, hanua 4.

²³Dano iduhu taudia dekena amo idia abia hanua be Eliteke bona Gibetona, mai edia rei gabudia danu,

²⁴bona Aialono bona Gata Rimono, mai edia rei gabudia danu, hanua 4.

²⁵Manase iduhu kahana taudia dekena amo idia abia hanua be Tanaka bona Gata Rimono, mai edia rei gabudia danu, hanua rua.

²⁶Inai hanua ibounai 10 be Kohata bese taudia oredia dekenai idia henia, mai edia rei gabudia danu.

²⁷Geresone bese taudia, Levi taudia, ese Manase iduhu kahana taudia dekena amo idia abia hanua be inai: Golana, Basana lalonai. (Ia be ala-ala kava taudia idia heau mauri hanua ta,) bona Be Esitera, mai edia rei gabudia danu, hanua rua.

²⁸Isakara iduhu taudia dekena amo idia abia hanua be inai: Kisiona, mai ena rei gabudia danu, bona Daberata, mai ena rei gabudia danu,

²⁹bona Iaramutu, mai ena rei gabudia danu, bona Ene Ganima, mai ena rei gabudia danu, hanua 4.