Joshua 21:8-29

⁸Girdi’ nu Israel e ra girengiyed e pow ni nge duwgil e pi binaw ney nge yungi flang riy ni fan ko pi Levi, ni bod ni yog SOMOL ngak Moses.

⁹Irera’ fithingan e pi binaw u daken e gin tafen Judah nge Simeon ni fa’an nni pi’

¹⁰ngak e pi’in owchen Aron nrabad ko fare ke girdi’ rok Kohath, ni pi’in owchen Levi. Yad e th’abi som’on nni pi’ taferad.

¹¹Ni pi’ ngorad fare binaw nu Arba (Arba e chitamngin Anak), chiney e yima yog yu Hebron ngay, ni bang ni go’ burey u Judah, nib mu’un e flang riy ngay nib liyeg ni fan ko chugol gamanman.

¹²Machane, yungi flang ko re binaw nem nge yuchi binaw riy, e go’ kan pi’ ngak Kaleb nib mo’on ni fak Jefunneh ni nge tafnay.

¹³Yungin nchagiy nga Hebron (Hebron e reb fapi binaw ntagil’ e ayuw) ngan pi’ ngak e pi’in owchen Aron ni prist e yu,

¹⁴Jattir, Eshtemoa,

¹⁵Holon, Debir,

¹⁶Ain, Juttah, nge Beth Shemesh, nge yungi flang riy ni fan ko chugol gamanman: mereb e binaw nni fek ko ganong rok Judah nge Simeon.

¹⁷Ma gin tafen Benjamin e ni pi’ aningeg e binaw riy ngorad: Gibeon, Geba,

¹⁸Anathoth, ngu Almon, nib mu’un e pi flang ko pi binaw nem ngay ni fan ko gamanman rorad.

¹⁹Ragag nge dalip e binaw u gubin, nib mu’un e pi flang ko pi binaw nem ngay ni fan ko pi gamanman rorad, e ni pi’ ngak fapi prist ni pi’in owchen Aron.

²⁰Ma tin kabay ko pi tabnaw ko fare ke girdi’ rok Kohath u lan fare ganong rok Levi e ni pi’ boch e binaw ngorad u lan tafen Efraim.

²¹Aningeg e binaw nni pi’ ngorad: Shekem nge pi flang riy ni fan ko gamanman u Efraim ni go’ burey (irera’ reb fapi binaw ntagil’ e ayuw), ngu Gezer,

²²Kibzaim, ngu Beth Horon, nib mu’un e pi flang ko pi binaw ney ngay ni fan ko gamanman rorad.

²³Mu lan tafen Dan e ni pi’ aningeg e binaw riy ngorad: Eltekeh, Gibbethon,

²⁴Aijalon, ngu Gathrimmon, nib mu’un e pi flang ko pi binaw ney ngay ni fan ko gamanman rorad.

²⁵Mu ba’ ni Ngal e Manasseh e ni pi’ l’agruw e binaw riy ngorad: Taanak ngu Gathrimmon, nib mu’un e flang ko gal binaw ney ngay ni fan ko gamanman rorad.

²⁶Pi tabnaw ney ko fare ke girdi’ rok Kohath e ragag e binaw u gubin nge yungi flang riy ni fan ko gamanman nni pi’ ngorad.

²⁷Ma fare ke girdi’ rok Gershon ni ka fare ganong rok Levi e ni pi’ l’agruw e binaw ngorad ko gin tafen e ba’ ni Ngek e Manasseh: Golan u lan yu Bashan (ni reb fapi binaw ntagil’ e ayuw) ngu Beeshterah, nge pi yungi flang riy ni fan ko gamanman.

²⁸Mu kun pi’ aningeg e binaw ngorad u lan tafen Issakar: Kishion, Daberath,

²⁹Jarmuth, ngu Engannim, nge yungi flang ko pi binaw nem ni fan ko gamanman rorad.