Sion 17

1

2

3

4

5

6

7

8

9

10

11

12

13

14

15

16

17

18

19

20

21

¹Navong Iesu selus usil tounah keil ekek evus, seipat vina nesa ka vis vit, “O Tata, avong ten mahien mai tuai. Navisuk keke kihati lat isok, Natmali, keke inau nakilea mahati lat isom.

²Koling moulien onen meatin vasi keil en hek keke nakilea masan moulien ten lisenges min koakeil vasi kosani minau.

³Ka meatin hekur moulien ten lisenges navong kilea enuk koa keik kos kovi Ahi anatin, ka kilea enau mun koa navi Kristo koa kosani.

⁴Inau navati lat isom en meten meatin keil ten out netan veni namum vasi umen koa kosani minau moumoni.

⁵Sakini, Tata, navisuk keke kihati lat isok ka kisan hetetamenien minau hesuval koa nakuri tuai navong naro ral minuk en avong koa kormumontei veah out netan.

⁶“Inau navothot enuk min koakeil kosan keil minau koa kolei kan keil ran meatin sav keil ten out netan. Keil avi onom, ka kosan keil minau. Keil along kat selusien onom.

⁷Ka kosa, keil akilea keke tounah vasi kosani minau ka venuk.

⁸Selusien koa kosani minau, inau nasani min keil, ka keil akur kati. Akilea vi anatin keke inau naka venuk, ka akur anatin keke kosan inau numai.

⁹“Narvistei ven meatin vasi keil ten out netan. Ka namul navis keke kikataun koakeil kosani minau veni avi onom.

¹⁰Koakeil vasi amusil kat inau avi meatin keil onom. Ka moulien one mul rie lat hetetamenien onak.

¹¹Namul nuvat venuk, ka nirtotei mun en out netan. Ka keil il semau ekok. O Tata, kovi votut vis kovi votut imok. Kiting koe moulien onen meatin keil onak hetal min keihoen ten isom, eis koa kosani minau. Hemukonek, keil imai itas hesuval koa keik ka inau lotas.

¹²Navong naro semau ral min keil, naring koe keil ral min keihoen ten isom, eis koa kosani minau. Anatin, naring koe keil ka tovuol en keil vavuol. Tas lokovein inau ka va vuol, kei koa korie lati keke vavuol vasakin asa koa Tus Votut vit luvati vamai vahi anatin.

¹³“Hervitei tuetin, nimai ris venuk. Ka, kosa, navong namul semau en out netan ekek, naviten tounah keil enek minuk vasakin meatin keil onak avalong kilea eni ka tine neim vahilelau en sien.

¹⁴Nasan selusien onom min keil, ka sakini, meatin keil koa avi ten out netan, tine kat keil veni. Tine kat keil veni alei kilea keke onak keil arvitei ten out netan, suval koa inau mun narvitei ten out netan.

¹⁵Tata, narvistei keik kovakulat keil ran out netan, ka navisuk eli kovating koe keil ran Temat koa vi vatte ten tisaen.

¹⁶Meatin keil onak arvitei ten out netan, suval koa inau mun narvitei ten out netan.

¹⁷Kiling seh en keil ihi votut keke usil kat selusien onom koa vi vatte ten anatinien.

¹⁸Namul nasila keil uva avoum en out netan, suval koa keik kosila inau namita en out netan ekok.

¹⁹Ka inau mun naling seh en moulien onak keke nihi votut musil asa koa ek vat inau moumoni. Namumoni vakataun keil vaka en anatinien onom keke avaling seh en moulien one venuk.

²⁰“Narvisteis ven meatin keil ekek, ka namul navis ven koakeil emun koa ikur anatin enau heka en selusien koa meatin keil onak isani min keil.

²¹Tata, navis keke keil vasi imai itas. Anatin, iapil vituai hetal min ialu hesuval koa keik kokapil ral minau ka inau nakapil ral minuk. Veni, navong itas, meatin keil ten out netan ikur anatin keke keik varei kosila inau numai.

²²Vati hetetamenien koa kosani minau, inau nasani min keil. Hesakini, keil itas hesuval koa ialu lotas.

²³Inau niapil vituai hetal min keil hesuval koa ialu lokapil vituai. Hesakini, meatin keil ten out netan ilei kilea keke keik varei kosila inau namita ka envatien onom mul en keil suval koa mul enau.

²⁴“Tata, ek vati keke koakeil kosani minau akilea avato vatal minau en out nesa, ka avales hetetamenien onak. Anatin, ek vat keil iles hetetamenien koa kosani minau veni envatien onom mul tuai enau navong kormumontei veah out netan.

²⁵“Tata, keik komal imok. Avaseini meatin keil ten out netan areingeingenuk, inau ka koakeil kosani minau, komai mekileak.

²⁶Inau navothot enuk min keil, ka nil numoni. Hemukonek, envatien onom koa mul enau, hel en keil, ka inau mun nil en keil.”