Yaahaya 17

1

2

3

4

5

6

7

8

9

10

11

12

13

14

15

16

17

18

19

20

21

¹Paata ya Yinsa wiisha olupa vitthu opo, khweekesa otulu na khulompa araka: “Paapa, wafiya wakathi. Onsifu mwanawo, yoori naye mwanawo oosifu.

²Maana wamwinkha ofwalume khwa anaatamu ooshi, yoori awenkhe ohaayi wa mileele ooshi apale omwinkhiyeeyo.

³Na ohaayi opo wa mileele pi opu: Oojuwe weeyo, Nluku mmote paasi weekhweele, na Yinsa Al-Masiihu otule omperekhiyeeyo.

⁴Miiyo koosifu vathi, kimariselaka khaazi okinkhiyeeyo oretta.

⁵Na, nasaapi eti, okisifu oo Paapa, vamote na-weyo khwa siifwa kaarinaaye na-weyo khapulathi olumwenku ohineeyevo.

⁶Kawaathoonyeza nzina lawo apale okinkhiyeeyo voolumwenku. Apo aya aari awo; weeyo khukinkha miiyo, na yo anshututela nttakhuzi lawo.

⁷Aphano yo anjuwa yoori vitthu zooshi onikinkhaaye zinlankha khwa weeyo.

⁸Maana miiyo kawooza mattakhuzi okinkhiyeeyo yo khupokherela, ajuwa yoori khweele miiyo kalankha mmakhono mwawo na khukhupalela yoori weetta okiruma.

⁹Miiyo kiniwaavekelela yo. Akiniwaavekelela atthu ooshi a voolumwenku, ila apale okinkhiyeeyo maana pi awo.

¹⁰Zooshi kiriinaazo pi zawo, na zooshi oriinaazo pi zaka. Miiyo kinsifwiwa mwaasa wa yo.

¹¹Nasaapi eti akinteela wiikhala voolumwenku ila yo ari voolumwenku, maana miiyo kineetta okho oriiwo weeyo. Paapa woottakatthifu, oweenanele khwa nzina lawo, nzina okinkhiyeeyo, yoori yo eeye vamote nkhama niiyiyeezo fweeyo.

¹²Wakathi kaari vamote na-yo voolumwenku, miiyo kaaweenaneliye na khuwaathokorela khwa owahi wa nzina lawo, nzina nttinttho okinkhiyeeyo. Kaaweenaneliye na khuhiivo mmote aashikhiyeeyo, woohiiyi otule atthomeliweeyo waashikha yoori epile zilupiyeezo zawaatikhiwa ttakatthiifu zirettikhane.

¹³Ila nasaapi eti kintta okho oriiwo weeyo, kinlupa mattakhuzi apo nalelo kiri voolumwenku, yoori yo eeyane furaha yaka yookamilikha.

¹⁴Miiyo kawinkha nttakhuzi lawo, atthu a voolumwenku khwiiphiiriwa ti yo, maana yo khahiyo a voolumwenku, nkhama etthiipi miiyo kihiiyeeni.

¹⁵Akinuuvekela yoori owaalazevo voolumwenku, ila oweenanele khwa ntakhali.

¹⁶Yo khahi a voolumwenku nkhama etthiipo miiyo kihiiyeeni.

¹⁷Owaattakatthise na haakhi; nttakhuzi lawo haakhi.

¹⁸Nkhama etthiipo weeyo okirumiyeezo miiyo voolumwenku, na miiyo kawaaruma voolumwenku.

¹⁹Khwa zwaamu yaya kinjittakatthisa miiyo, yoori na-yo attakatthe khwa haakhi.

²⁰Akiniwaavekelela apa ottho paasi, ila na apale anteelaaye okikhupali miiyo khwa nttakhuzi laya yo,

²¹yoori ooshi eeye amote, nkhama etthiipo niriizo miiyo na weeyo, na-yo ti eeye khwa fweeyo, yoori atthu a voolumwenku akhupali yoori weeyo weetta okiruma.

²²Miiyo kawinkha siifwa etile weeyo okinkhiyeeyo, yoori yo eeye amote nkhama fweeyo niiyiyeeyo amote.

²³Miiyo khwa yo na weeyo khwa miiyo. Khwa nanna ethiito osiilana waya onttela wiiya khaamili, yoori atthu a voolumwenku ajuwe yoori weeyo ti okirumiyeeyo, na yoori oniwaapheta nkhama etthiipo onikiphetaazo miiyo.

²⁴Paapa, niiya yaka ti yoori attaapho kiriivo miiyo na-yo eeye attaapho ooshi apale okinkhiyeeyo, yoori oone siifwa okinkhiyeeyo, maana wakipheta khapulathi olumwenku ohinompiwe.

²⁵Paapa wa shariya, atthu a olumwenku khanuujuwa, ila miiyo kinuujuwa; na apa okinkhiyeeyo anjuwa yoori weeyo weetta okiruma.

²⁶Miiyo kawaajuwisa nzina lawo, na nalelo kinvira kiwaajuwisaka, yoori pheta etile okiphetaniyeeyo yiiye vamote na-yo, na miiyo kiiye vamote na-yo.”