San Juan 17

1

2

3

4

5

6

7

8

9

10

11

12

13

14

15

16

17

18

19

20

21

¹Je² en¹-vi⁴ qui³nchja⁴ Jesús, qui³sco²tsen³ncˀa³, cˀoi⁴qui³tso²: Nˀai³, je² hora je³ji³cho²ca³, chˀa⁴sje³je³yai³ ˀnti¹-li⁴, jme¹-ni³ nca³ cˀoa⁴-ti⁴ ˀnti¹-li⁴ cˀoa⁴sje³je³ya³-ni³li².

²Jo³-sˀin² nca³ tsa³cˀai²-lai⁴ cjoa⁴te¹xo³ma³ xi³ tˀa³tsˀe⁴ nca³tsˀi³ cho⁴ta⁴, jme¹-ni³ nca³ tsjoa¹-si¹ni³le⁴ cjoa⁴vi³jna³chon³ nca³ntsjai² nca³tsˀi³ xi³ tsa³cˀai²-lai⁴.

³Je² xi³ cjoa⁴vi³jna³chon³ nca³ntsjai², nca³ cˀoa⁴-sˀin² scoe⁴-li² xi³ to⁴jnco³ ji³ Ni³na¹ xi³ ña³qui³ cjoa⁴qui²xi⁴, cˀoa⁴ scoe⁴ Jesucristo je² xi³ qui³ni²ca³sain¹³.

⁴An³ tsˀa³sje³je³ya³-le²³ i⁴ son³ˀnte³. Je³qui³si³jncoa³ je² xa¹ xi³ ji³ tsa³cˀai²-nai¹³.

⁵Ntˀai⁴-vi⁴ Nˀai³, cˀoa⁴-sˀin² chˀa⁴sje³je³ya³-nai¹³ ya⁴tˀa³-li⁴ nca³ ji³, cao⁴ je² cjoa⁴je³ya³-ve⁴ xi³ qui³sˀe³-na³ cˀia⁴ nca³ tsa³ca²te⁴jna³tˀa³-le²³ cˀia⁴ nca³ cje³ tsin²-jin² son³ˀnte³.

⁶Je² cho⁴ta⁴ xi³ tsa³cˀai²-nai¹³ i⁴ son³ˀnte³-vi⁴, an³ tsa³ca³co³son²tsen³-le⁴ jo³ cjoain³ nca³ ji³. Tsi⁴ ni¹³, cˀoa⁴ ji³ tsa³cˀai²-nai¹³. Qui³si³qui³tjo³son² en¹-li⁴.

⁷Ntˀai⁴-vi⁴ je³tsa³ve³ nca³ nca³yi³je³ cjoa⁴ xi³ tsa³cˀai²-nai¹³ tsi⁴ ni¹³.

⁸Nca⁴ je² en¹ xi³ tsa³cˀai²-nai¹³ cˀoa⁴-sˀin² qui³tsjoa³-le⁴, cˀoa⁴ je² qui³scoe¹. Tsa³ve³ nca³ cjoa⁴qui²xi⁴ nca³ ja²ˀai⁴-nia³ xi³ tˀa³tsi⁴. Cˀoa⁴-sˀin² coan³cjain¹-le⁴ nca³ ji³ qui³ni²ca³sen¹-nai¹³.

⁹An³ vˀe³tsˀoa³ntje²³ nca³ je². A³li² je² cho⁴ta⁴son³ˀnte³-vi⁴ vˀe³tsˀoa³ntje²³, to⁴je² cho⁴ta⁴ xi³ ji³ tsa³cˀai²-nai¹³, nca⁴ je² xi³ tsi⁴.

¹⁰Je² nca³tsˀi³ xi³ tsˀan⁴, tsi⁴ ni¹³. Cˀoa⁴ je² xi³ tsi⁴, tsˀan⁴ nia¹³. Ji²tjo⁴je³ya³-nia¹³ xi³ to⁴tˀa³tsˀe⁴.

¹¹Li²coi³ ti⁴ˀi⁴ ti²jna⁴-nia³ i⁴ son³ˀnte³-vi⁴, to⁴nca³ je² i⁴ tjio¹ i⁴ son³ˀnte³-vi⁴. An³ cjoi¹con³-le²³ nca³ ji³. Nˀai³tsje³, nta³ ti⁴ca³tio²tjoa²nqui³ nca³nˀion¹-li⁴ je² xi³ cao⁴ jan³ˀain¹-li⁴ tsa³cˀai²-nai¹³.

¹²Cˀia⁴ nca³ tsa³ca²te⁴jna³coa⁴ i⁴ son³ˀnte³-vi⁴, an³ qui³si³ca³tio²tjoa²³ cao⁴ jan³ˀain¹-li⁴. Je² xi³ ji³ tsa³cˀai²-nai¹³, cˀoa⁴-sˀin² qui³si³coi²nta⁴. Ni⁴jnco³-jin² qui³cha³, to⁴je² xi³ cjoe⁴tˀa³ ni⁴čhjin³-le⁴ cha⁴ nca³ntsjai², jme¹-ni³ nca³ cˀoa⁴-sˀin² ca²ta³vi³tjo³son²-ni³ je² xon⁴ Escritura.

¹³To⁴nca³ ntˀai⁴-vi⁴ cjoi¹con³-le²³. Je² en¹-vi⁴ xi³ nchja²³ i⁴ son³ˀnte³-vi⁴, jme¹-ni³ nca³ cˀoa⁴-sˀin² coan⁴tse³ya³-si¹ni³ je² cjoa⁴tsjoa³-na⁴ ja⁴jin³ ni⁴ma⁴-le⁴.

¹⁴An³ qui³tsjoa³-le⁴ en¹-li⁴. Je² cho⁴ta⁴son³ˀnte³ coan³jti³que³ cho⁴ta⁴-na⁴, nca⁴ li² tsˀe⁴ son³ˀnte³-jin², jo³-ni³ nca³ cˀoa⁴-ti⁴ an³ li² tsˀe⁴ son³ˀnte³-jian²³.

¹⁵A³li²coi³ vˀe³tsˀoa²³-nia³ nca³ cha³ˀa²xin²-lai⁴ son³ˀnte³ cho⁴ta⁴-na⁴. To⁴coi³ xi³ vˀe³tsˀoa³ntje²³ nca³ cˀoa⁴-sˀin² si⁴coi²ntai⁴, jme¹-ni³ nca³ je² xi³ tsˀen⁴ li²coi³ si⁴²cao⁴-si¹ni³.

¹⁶A³li² tsˀe⁴ son³ˀnte³-jin², jo³-ni³ nca³ cˀoa⁴-ti⁴ an³ li² tsˀe⁴ son³ˀnte³-jian²³.

¹⁷Ti⁴ca³tio²nta³tsjai³ xi³ to⁴tˀa³tsˀe⁴ cjoa⁴qui²xi⁴-li⁴. Je² en¹-li⁴ xi³ ña³qui³ cjoa⁴qui²xi⁴.

¹⁸Jo³-sˀin² nca³ qui³ni²ca³sen¹-nai¹³ nca³ an³ i⁴ son³ˀnte³-vi⁴, cˀoa⁴-ti⁴sˀin² qui³si³ca³sen¹³ je² cho⁴ta⁴-na⁴ i⁴ son³ˀnte³.

¹⁹Xi³ tˀa³tsˀe⁴ cˀoa⁴-sˀin² vˀe²jna⁴nta³tsje³-le⁴ yao³-na⁴, jme¹-ni³ nca³ cˀoa⁴-ti⁴ je² ña³qui³ cjoa⁴qui²xi⁴ coa⁴tio²nta³tsje³-si¹ni³.

²⁰A³li² tsa² to⁴je² cho⁴ta⁴-vi⁴ xi³ vˀe³tsˀoa³ntje²³, to⁴nca³ cˀoa⁴-ti⁴ vˀe³tsˀoa³ntje²³ je² xi³ coan⁴cjain¹-le⁴ xi³ tˀa³tsˀan⁴, xi³ to⁴tˀa³tsˀe⁴ en¹-le⁴ je² cho⁴ta⁴-vi⁴,

²¹jme¹-ni³ nca³ to⁴jnco³ coan⁴-si¹ni³ nca³tsˀi³, jo³-ni³ nca³ ji³, Nˀai³, ti³jna³cao⁴-nai¹³, cˀoa⁴ an³ ti²jna⁴cao⁴-le²³. Cˀoa⁴-ti⁴ je² to⁴jnco³ ca²ta³tio²cao⁴-na¹, jme¹-ni³ nca³ cho⁴ta⁴son³ˀnte³ coan⁴cjain¹-si¹ni³le⁴ nca³ ji³ qui³ni²ca³sen¹-nai¹³.

²²Je² cjoa⁴je³ya³ xi³ ji³ tsa³cˀai²-nai¹³, cˀoa⁴-ti⁴sˀin² qui³tsjoa³-le⁴, jme¹-ni³ nca³ to⁴jnco³ coan⁴-si¹ni³ jo³-ni³ tsa² ña¹ to⁴jnco³ ma³-nia³².

²³An³ ti²jna⁴coa⁴ je² cho⁴ta⁴-na⁴, cˀoa⁴ ji³ ti³jna³cao⁴-nai¹², jme¹-ni³ nca³ ña³qui³ to⁴jnco³ coan⁴-si¹ni³, jme¹-ni³ nca³ cˀoa⁴-sˀin² scoe⁴-si¹ni³ cho⁴ta⁴son³ˀnte³ nca³ ji³ qui³ni²ca³sen¹-nai¹³, cˀoa⁴ nca³ ji³ coan³tsjoa³chai³ nca³ je², jo³-sˀin² nca³ cˀoa⁴-ti⁴ coan³tsjoa³cha³-nai¹³ nca³ an³.

²⁴Nˀai³, coi³ xi³ me³-na³, nca³ je² cho⁴ta⁴ xi³ ji³ tsa³cˀai²-nai¹³, cˀoa⁴-ti⁴ ya⁴ coa⁴tio⁴cao⁴-na³ jña³ nca³ an³ ti²jna⁴, jme¹-ni³ nca³ cˀoa⁴-sˀin² scoe⁴-si¹ni³ cjoa⁴je³ya³-na⁴ xi³ ji³ tsa³cˀai²-nai¹³, nca⁴ coan³tsjoa³cha³-nai¹³ to⁴nqui³-ni³ nca³ cje³ sˀe³nta³-jin² son³ˀnte³.

²⁵Nˀai³ xi³ tjin¹-li² cjoa⁴qui²xi⁴, cho⁴ta⁴son³ˀnte³-vi⁴ li²coi³ tsa³ve³-li², to⁴nca³ an³ tsa³ˀve³-le²³. Cˀoa⁴-ti⁴ je² cho⁴ta⁴-na⁴vi⁴ tsa³ve³ nca³ ji³ qui³ni²ca³sen¹-nai¹³.

²⁶Je² cho⁴ta⁴-vi⁴ an³ tsa³ca³co³son²tsen³-le⁴ jo³ cjoain³ nca³ ji³. To⁴jo³ cˀoa⁴-la²sˀin² coa³co³son²tsen³ nqui²sa⁴-le⁴, jme¹-ni³ nca³ sˀe⁴-si¹ni³le⁴ cjoa⁴tsjoa³cha³, jo³-sˀin² nca³ coan³tsjoa³cha³-nai¹³, cˀoa⁴ an³ coa²te⁴jna³jian³ ni⁴ma⁴-le⁴.