1Eferaim e dâŋ muwec sâc ŋiczi hâhâwic embiŋ, ehuc Israe ŋondeŋko e manacnepie fewec; juku ine Baalire kiŋaŋ qahuc kiŋ bahac bâfuarâ hâmowec.
2Ʒi ine sâqocne giŋkeme giŋ bâfua rahuc ɋâŋ qâqâtâc aeŋzi baeŋgopieŋ, siliwa‐jeŋiczi nemuɋâŋ basarickeeŋgopieŋ hâcne, ine metâ bapa jaŋere gie sasawa. Ehuc mueŋgopieŋ: Ɋâŋ qâqâtâc bâzi rike‐jareniŋ, â ŋiczi bulimakao qâqâtâc muduc‐jopaniŋ!
3Jaŋe iŋuc eeŋgopieŋte furicte hâweŋ fuaekac, me titikuczi furictea fuarâ omaeekac irec sâc enʒepieŋ, erâ mâŋâŋzi padi jawa ficne sueme raekac, me hosâczi qâuŋko fotâcnerâ omaeekac irec sâc jaha omaenʒepieŋ.
4No ine Aigita mâreŋko fuŋkerâ Wofuŋ Anutuge juwarepozi jukopac, eme go Anutu furune moc mi manaekic, bâbâpiaŋ i no hâcne, moc mi jujâmbâŋkekac.
5No hâcne mâreŋ sawao â mâreŋ kereŋnao hone soŋaŋ egarepo.
6Mâc jaŋe ine nânâ mâriri fojareha nâ gapec embiŋ, ehuc maŋfefe erâ nore nikec‐jopawec.
7Irec no laioŋ iŋucne ejarezepac, â qowi mimicne lepad iŋucne hatao ruc bajarezepac.
8No bea neŋgocnezi motecfâcne rocjopapie momori eekac irec sâc erâ kicjopazepac, ehuc amec‐jeŋic kisuc qâsuckerâ laioŋ iŋucne erâ nâcjopazepac; qowi mimicne jaŋe kisuc qâsuc‐jopanʒepieŋ hâcne.
9O Israe, no sipiricgupemu, ehame mozi moc sâcne baficguocmu?
10Ŋicwofuŋgezi baficguocmu e weni? Me fekicnefâcge dâŋgiere baficguniŋmu jaŋe sasawa weni? Go jaŋere ʒiŋuc mumeŋ hâcne: “Ŋicwofuŋ â ŋic fekicne râec‐jopa‐narezemec!”
11No aaricko ŋicwofuŋ râe‐garekopac, erâ kimbeŋ‐nanere mocwâc gowac rokopac.
12Eferaim kiŋ bahac‐ticne i râe basanaŋ ekicne fokac, â sâqocne‐ticne i râe guruc ekicne fokac wâc.
13Eferaim fuazo eme neŋgocnezi gozi kiwec, mâc e motec mutucne, irec dameŋne maickeme neŋgoc bumaŋkonec fuaocte mi manasuwec.
14No riŋjeŋic rope hâmoc haeonec wefunʒepieŋ, me hâmockonec batarac‐jopazepac me? O hâmoc, go hucge sâqocne i weni? O hâmoc hae, go sisipiricge weni? Buuruc i norao mocwâc mi fokac.
15Eferaim e opâ ŋoŋondeŋko ʒamac ʒamac iŋucne fua biaŋ eocmuo ine sifu Wofuŋte mâŋâŋ ʒoaŋ wewefunaonec â mâreŋ sawaonec fisirâ qame opâ nombâŋ‐ticne kereŋkeocmu, â opâ ʒâŋe‐ticne ʒickeocmu; ehame boreŋ ʒeŋaŋ‐ticne â mafa wiac biaŋ‐ticne jâoc rofâreocmu.
16Samaria ŋic jaŋe Anutu‐jeŋic fecnembiŋte kiŋjeŋic âsickehuc junʒepieŋ. Jaŋe ʒikazi nâcjopazejec, ɋiefâc‐jeŋic henʒaŋ qanʒaŋ‐jopanʒepieŋ, â ŋokac kiwechec jaŋe bujeŋic sâqezi hefâucke‐jarenʒepieŋ.
