1Go qeŋ qatec dâŋeoc! Râsi moc tucwipe iŋucne Wofuŋte ficko sâorâ wahakac; jaŋe ʒâʒâfic‐nane hetâcnerâ sâcmutâc dâŋnane râsi ecnembiŋte iŋuc fua‐jarekac.
2Eme kecʒiŋuc wira wâwâsic enareeŋgopieŋ: “O Anutu‐nâŋec, Israe ŋic nâŋe go manacgueŋgopeneŋ i!”
3Israe ŋic jaŋe wiac biaŋne qikiŋnembiŋ, irec râsi jaŋe jopa jâpec eniŋmu.
4Jaŋe mi mujarehape ŋicwofuŋ âkendâŋ‐jopambiŋ, â no mi manahape ŋic fekicne mucjopambiŋ; siliwa â goljeŋiczi nemure ɋâŋ qâqâtâc bambiŋ i sisipiricte biŋe eocmu.
5O Samaria, no bulimakao qâqâtâcge qikiŋnekopac, kimbeŋ‐nanezi bâruŋke‐jarekac; ŋoŋe mo dameŋko qâpuc eebapa tâmiric juniŋmu?
6Bulimakao qâqâtâc i Israe jaŋere metâ bapa moczi bawec, erâ i Anutu aricne. Samarianec bulimakao i hefâc qâfâuckepie dâkâ piic piic fuaocmu.
7Jaŋe wiac ebac embiŋ i manapie afeckewec, â irec okacne i ŋemâcne jâmbâŋ fua‐jareocmu. Padi sarapie âkeʒurâ wefu sokarâ fâri tâmiric ârine sawa domaocmu, me fârine moc fuaocmuo ine ŋic jabane jaŋe nâniŋmu.
8Israe ŋic sipiric‐jopakicne, eme ʒi ŋicne ŋicne jaŋere ŋondeŋko râqâc behekicne tinac erâ juŋgopieŋ.
9Jaŋe kâte doŋgizi bucticne hata raekac irec sâc Asiria mâreŋko fembiŋ, Eferaim e bubiaŋte wiac jarehuc âgo bacjopawec hâcne.
10Jaŋe ŋicne ŋicne âgo bacjopambiŋte no bâtâtiec‐jopapemu, eme jaŋe ŋicwofuŋ me fekicne wokemaŋ rurua‐jare i dameŋ bembeŋnea behenʒepieŋ.
11Eferaim jaŋe alata wiac bocjaha bambiŋ i eebapa‐jeŋic sâqocnere alata hâcne.
12No sâcmutâc dâŋnane bocjaha qâreŋke‐jarepe muzac sifu manapie dâŋ furune ezac.
13Jaŋe taha bâzire aŋac‐jopaekac, ehame qowi bâzi rike nâc eeŋgopieŋ, Wofuŋ no ine wiac irec mi enareekac. No hehesic‐jeŋicte manasurâ kiŋjeŋicte okacne bazu‐jarepemu, eme Aigita mâreŋko risienʒepieŋ.
14Israe e bâbâfua‐ticne nore nikeckeme erific wiac baraha Judazi hae sanaŋ bocjaha bawec. No ine hae wiac‐ticne turuŋkepe ʒazejec, ehuc ficsanaŋ wiac‐ticne ʒâseŋke‐fârezejec.
