1Peroveta tauna Habakuku ena ḡuriḡuri anena; ane gadona ladana be Shigionoth.
2Iehova e, oi harimu vada na kamonai; Iehova e, oiemu ḡaukara na garilaiamu. Laḡani bogaragidiai ba hamatamaia, laḡani bogaragidiai ba hahedinaraia; badu lalonai hebogahisi ba laloa tao.
3Dirava na Teman amo ema, Helaḡa Diravana na Paran ororona amo ema. Ia hairaina ese guba e ḡovaia ahu, tanobada na ia i'imodaina ai vada e honu. (Selah)
4Ia kiama-kiamana na diari na heto, diari mamadia na ia imana amo e lasi; unuseni ai ia ese ena siahu e ḡovaia ahu.
5Ia vairanai dai-hanai gorerena ela, bona ia murina amo gorere metauna.
6Ia e gini, tanobada e hahetohoa; ia e roha lao, basileia idau-idau e haheude-heudedia; bena mia-hanaihanai ororodia na e heḡiḡi rohoroho, ororo komutadia, asie idaumu gaudia, na e hevarure. Ena kara na nega gunadia amo e hesiriumu.
7Kusana kalagadia na hisihisidia ai na itadia, Midian tanona ena dabua rumadia na e heude-heudeva.
8Iehova e, emu hosi ai o gui negana ai, emu kwalimu kariotana ai o gui kau negana ai, sinavai na o badu henidia a? Emu badu na sinavai latadiai eiava davara latanai e kau a?
9Emu peva na pauana o veria oho, emu diba na maora ai o adai; (Selah) tanobada na sinavai amo o hapararaia.
10Ororo ese e itamu, bena e lagava, abata na e aru e laova; dobu gabuna na e herevava, imana e dudui isiva atai ai.
11Dina bona hua na edia ḡabu ai e gini, asie marere, emu diba na heidodia ai e kimore-kimore dainai, emu io kimorena dainai.
12Mai badumu ida tanobada o dagaia tao, emu badu ai bese idau-idau o moimoilaidia.
13Emu bese ihamaurina totona o raka lasi, o horodia taudia ihamauridia totona. Kara dika tauna kwarana o moia patapata, mamuna amo ela bona aiona o haberoa. (Selah)
14Ena tuari taudia kwaradia o tarakidia uru; idia na koe-hirihiri na heto igigi-rohorohogu totona ema, idia na e moaleva, ogoḡami taudia bae ha-oredia hehuni eto.
15Emu hosi aedia amo davara o moimoilaia, abata badadia o moidia tao.
16Lau na kamonaimu, bena taugu e heude-heudemu, rege bada dainai bibinagu e veverumu; turiagu na e manoka-manokamu, na raka mamanomu. Asi reḡereḡegu hekwakwanai dinana baina naria, eda tano bae tuari henia taudia latadiai baine kau dinana.
17Ena be suke auna basine burea, bona vine audia huahuadia basie dobi, ena be olvie auna na asi huahuana, bona uma na asi anidia, ena be mamoe bae mase ore edia maḡu ai, bona boromakau rumana na asi boromakauna,
18to lau ese Iehova baina moalelaia, ihamaurigu Diravana baina moalelaia.
19Ḡaubada Iehova na egu goada; aegu na dia hahinena aena heḡereḡeredia ai e halaodiamu, egu atai gabudia ai e harakagumu. (Ane-abi taudia biagudia ena: mai gitara reḡedia ida bae abia.)
