Text copied!
CopyCompare
Paipel - Apakuk

Apakuk 3

Help us?
Click on verse(s) to share them!
1Iei än ewe soufos Apakuk iotek:
2Ai Samol mi Lapalap, üa rongorong pworausen mine ka föri, iwe, üa niuokus ren. Ai Samol mi Lapalap, kopwe försefäli om kewe föför mi amwarar lon äm ei fansoun, usun ka föri me lom. Lon om lingeringer kopwe pwal eäni ümöümöch.
3Kot a feito seni Etom, Ewe mi Unusen Pin a feito seni ewe chukun Paran. An ling a pwölüela ekewe läng, nge fanüfan a ur ren än aramas mwareiti.
4Lingan a usun chök saram, nge nikaütütün saram ra saramawu seni lepöün, ikenan an manaman a monola.
5Mätter a akom mwan, nge mäfeiengau a tapwela mürin.
6Lupwen Kot a ütä, fanüfan a chechech, lupwen a nenefetal, chon ekewe mwü ra chechech. Ekewe chuk mi nom seni chök lom ra tatakis, ekewe chukutekison minen lomlom ra kokotiu. An kewe al ra nom seni fansoun esepop.
7Üa küna ekewe aramasen Kusan lon ar riaföü me ekewe aramasen Mitian fän ar chechech.
8Ai Samol mi Lapalap, ifa usun, ka song ngeni ekewe chanpupu, ika ka lingeringeriti ewe matau? Ka sä won ekewe kuchu, ekewe kuchun asepwäl womw woken, lupwen ka atoto win ngeni noum aramas.
9Ka uwawu noum esefich seni tükütükün o pachetä ekewe föün esefich ngeni selin. Ka asanga fanüfan ren ekewe chanpupu.
10Ekewe chuk ra künok o chechech, üt a püngümongetiu seni läng. Ewe matau mi alolol a pwotä, nge nonoon kewe ra püngümong.
11Akkar me maram ra üla lon lenier ren tinen noum föün esefich, lupwen ra pis, pwal ren wokum siles mi meriweriw.
12Ka ipwechoutiu won fanüfan fän om lingeringer, ka purätiu chon ekewe mwü fän om song.
13Ka feito pwe kopwe amanaua noum aramas, pwe kopwe amanaua noum we king mi kepit. Nge ka atatakisi ewe souemwenin ewe mwichen aramasangau o arosala chokewe meinisin mi tapwela mürin.
14Ka posu ewe meilapen nöün kewe sounfiu ren wokum kewe, chokewe mi feito usun chök eu mölümöl pwe repwe atoropasakem, ra sikesik usun chokewe mi ariaföüü ekewe chon mwelele lemonomon.
15Ka purätiu ewe matau fän noum kewe oris, iei mine ewe sät a puropur.
16Üa rongorong usun ekei mettoch, inisi a chechech o awei a sälepwelep ren ai niuokus. Chüi ra kiroula, nge pechei ra täpäp. Üpwe witiwit fän mosonoson fän iten ewe ränin riaföü epwe feito won ekewe aramas mi mauneekem.
17Inamwo ika ewe irä fiik esap sot, esap pwal wor ua won ekewe irän wain, inamwo ika ewe irä olif esap ua, esap pwal wor mongö seni ekewe tanipi, inamwo ika ekewe sip repwe ärela seni ewe lenien sip, esap pwal wor kow lon lenier,
18nge ngang üpwe chök meseik ren ewe Samol mi Lapalap, üpwe pwapwa ren Kot ai Chon Amanau.

19Kot ewe Samol mi Lapalap i ai pöchökül. A anüküchara pechei pwe ra usun chök pechen ekewe chia, a föri pwe üpwe fetal won ai kewe leni mi tekia. (Eli iei echö köl aramas ra eäni fiti pisekin ettik)