Text copied!
CopyCompare
Buka Helaga - HABAKUKU

HABAKUKU 3

Help us?
Click on verse(s) to share them!
1Peroveta tauna Habakuku ena guriguri ane be inai:
2Lohiabada e, oiemu kara ena sivarai lau kamonai vadaeni, bona oiemu siahu dekenai lau gari noho. Oiemu kara badadia, gunaguna oi karaia gaudia, mani inai nega danu lalonai do oi karaia lou. Momokani aiemai dika dainai oi badu noho. To oi be bogahisihisi Diravana, vadaeni ai dekenai mani do oi bogahisihisi.
3Dirava ese Edoma dekena amo do ia giroa mai. Dirava Helagana be Parana Ororona, dekena amo ia mai noho. Iena goada ena hairaina ese guba ibounai ia koua noho. Ia ese ia karaia gaudia, bona taunimanima ibounai ese, Lohiabada ena ladana idia hanamoa noho.
4Iena diari be dina ena diari bamona. Iena imana dekena amo, kevaru ena diari ia hedinaraia. Guba dekenai iena siahu ia ese ia hunia noho.
5Iena vairana dekenai, gorere idauidau ia siaia lao, bona ia oda dainai, iena murina dekena amo mase ia mai noho.
6Lohiabada ia gini noho gabuna, dekenai tano be ia mareremarere. Bema ia ese taunimanima ia itaia noho neganai, idia be mai gari danu do idia heudeheude. Ororo badadia, noho hanaihanai gaudia, be do idia makohia bona moru diho. Ororo maragidia, gunaguna Lohiabada ese, ia raka hanaia gaudia danu, be do idia diho, palaka gabudia idia do ia halaoa.
7Lau itaia, Kusana taudia idia gari, bona Midiana taudia lau itaia, idia heudeheude.
8Lohiabada e, oi ese lai oi siaia, ia ese sinavai bona davara edia hurehure bada ia havaraia. Sedira oi be badu dainai, unai bamona oi karaia, a? Oi ese ori oi guia, hosi bamona, bona guba ena ori koremana, be oiemu tuari kariota bamona. Oi ese oiemu bese taudia dekenai kwalimu oi henidia, idau bese taudia idia tuari henidia neganai.
9Ori ena kevaru be oiemu peva ena diba bamona, bona oiemu peva ena varo oi abia hegaegae noho. Oi ese sinavai dekena amo tanobada oi hapararaia.
10Ororo ese oi idia itaia neganai idia mareremarere. Guba dekena amo ranu bada ia bubua diho. Tano henunai ena ranu idia boiboi, ma unai ranu ia pou, ia daekau ataiai, guba dekenai.
11Oiemu diba oi ese oi pidia haraga herea, mai diaridiari danu dainai, bona oiemu io ia kevaru bamona dainai, dina bona hua be guba dekenai idia gini noho, idia marere lasi.
12Bese idauidau dekenai oi badu dainai, edia tano oi raka hanaia, oi ese tanobada kahana ibounai oi moia diho.
13Unai bamona oi karaia, oiemu bese do oi hamauria totona, bona oi ese oi abia hidi king, be do oi hamauria totona. Kara dika bese taudia edia gunalaia tauna, be oi ese oi alaia, bona iena taudia danu be oi ese oi aladia ore momokani.
14Ai idia tuari henia gwauraia taudia, be lai bada bamona ai do idia lulua boio gwauraia. Idia be aiemai manoka dekenai idia moale, tau dikadia ese hunia dekenai, ogogami taudia idia dagedage henia bamona. To oi ese oiemu diba oi pidia, bona unai ai idia tuari henia taudia, edia biaguna oi alaia mase.
15Oiemu hosi dekenai oi guia, bona iena aena dekenai davara oi moia, bona inai kara dainai, davara dobu ena hurehure bada idia toreisi.
16Inai kara ibounai lau kamonai, vadaeni lau heudeheude. Lauegu uduna bibinadia be gari dainai, idia marere kava noho. Lauegu tauanina be ia manoka lao, bona egu aena be mai hekwarahi danu idia marere. To lau diba Dirava be do ia mai, ai idia hadikaia taudia do ia panisia. Unai dainai lau be unai dina do lau naria, mai egu laloa hekwarahi lasi.
17Bema fig auna ese huahua idia atoa lasi, bona vain huahua idia vara lasi, bona bema olive audia ese anina idia atoa lasi, bona uma ese koni idia hatubua lasi, ma bema mamoe ibounai idia mase ore, bona boromakau ena ruma danu, be anina lasi do ia noho,
18to lau be Lohiabada Dirava dekenai, do lau moale bada noho, badina ia be lauegu Hamauria Tauna.

19Lohiabada ese lau dekenai goada ia henia noho. Ia ese egu aena ia hagoadaia, dia ena aena hegeregerena. Vadaeni ororo ataiai gabudia dekenai lau heau lao diba.