Text copied!
CopyCompare
Habo nalolene bi gahenge lo winigo ogo - Habagugu

Habagugu 3

Help us?
Click on verse(s) to share them!
1Bi mana latagi haga Habaguguhanda Anduane Homogohondo bi lalu iba gana lole howa ngida ale balu lenego ogo.
2Anduane Homogo-o í̠na bini layaru hale howa í̠ timbuni gibi taraore ke manda buwa i̱na bi agi ale loabe toba ho ko. Bamba í̠na biabe hongohe tara tara bialu hariru áyu ina kamangi biabe urunibi lone bibe. Inahondo keba holene irane ngagoyu ai í̠na dara halu biamogo bibe.
3Ngode Datagaliwabe ibu Idomo dindihayagi howa lone ibira. Ibu baya buruguleore howa Parananaga dindi hombene hombene ngaruha howa ibira. Ibunaga wá holene timbuniore hari daligaha dungame halu ibunaga mana baya buruguleore buleneme dindini mbirale bibahende ngarumebi karumebi ibunaga mini yaraga haralo handabeheore nga.
4Ibunaga wá holene egerebagi ni tagira ibiraligobi howa ngiringarame ibunaga gi hongo ya do kagoha howa tagira ibaga.
5Ibugua warago tara tararu ala bambaha lalu homa í̠na maha talima ibabe laga.
6Ibu hondo kagola dindi dumbirumbi bialu ibugua emene de leneme hangu handaragola wali agali dindini karu bibahende duru lai haga. Hari haabo hole mbaule wedaruni podobaga bialu dindi hombene bambaore wini o ngaruni ibuni ibalu penego áyu ogoni dindiha anda pu bereba helolebira.
7Kusana dindini wali agali hearuni giho hearia handaru. Midiana dindini wali agalibi gi howa durulo heane handaru.
8Anduane Homogo-o í̠na puyabu ibilalu puyabume iba porarubi iba solowarabi hongo howa mo yaribu bia helarigoni. Ani birigoni iba urunihondo keba howa biribe. Beraliba porarunaga biru yalu piaga harigo kegoni. Í̠naga wali agali karunaga wai bia hole howa iba dalu timbuni ibule beraliba mindibi ngarunaga mo garo ale mini karisi bu hinalu ibuwa í̠naga wali agali mo wayali helariligoni.
9Í̠na danda yamuwa timurume bogole manda manda buwa harigoni. Í̠naga timu hari dabaha howa ibiyagola dindi gaibu baga buwa iba timbuniru uruniha pelo mo ibira harigoni.
10Hari timbuni wedarume í̠ hondowa duru lalu mogo timbuni lowa iba timbuni hariha howa dalidali biyagoni. Iba dindiha berearumebi tula lalu hegene damindini bo laya.
11Í̠naga timuru ala pugupugu buwa hari daba ale piyaru handalubi í̠naga yandare didone piyago handalubi ni egela libu ema nabi hondo hene.
12Í̠na dindi bibahendeni hearu baba lembo timbuni howa ami wai bule poradagua pialu wali agali í̠na dindi tara tarani hearu hengedo paya bu hari.
13Anidagua birigome í̠ninaga wali agalibi kini í̠na dabenegobi heba pele mialu biamogo biri. Mini kowi hearunaga haru haga koore timbuni biaga heagobi ibunaga talima piaga hearubi bo hilo bagabu wahari.
14Puyabu hongo howa ibagadagua ami agali haguaneme ibuninaga ami haru halu ibuwa ina balu purogo lelole ibalu hearia í̠na ibuninaga yandare yiniyago yamuwa emboneni yandare harigoni. Tigua mine halu ina mo ko howa balu bo purogo lelole hearia í̠na ani biri.
15Í̠na iba solowarani nogo hosirunaga biru yalu pirigola iba mbolia baragaraga biya.
16I̱na bi uruni hale howa mogo timbuni lo ko. Ani buwa bi hai bialu ne hambu duru lalu i̱naga dongone gimbu binihayagi homowa amburi biyagola ge ibubi nira duru lalu ka. Ngode Datagaliwabe ibunaga horo harangi inahondo ko biraru ibugua ti pani mialu belo i̱ ema nabi hendore hondo holebero.
17Pogeru lini da nabiyaguabi Pu mbira mini gerebi lini nade hayaguabi Ira mini olibe lini ko hai hayaguabi Mabuni tomo bibahende gau lai hayaguabi Nogo sibiru homai hayaguabi Nogo bulumagaru nahe tinaga anda bame tabuanda hayaguabi
18Uruni bibahende ani biyaguabi waha i̱ turu halu holebero. Irane i̱naga Anduane Homogo Ngode Datagaliwabe ibugua i̱ pele ngiaga ka manda buwa turu halu holebero.

19Anduane Homogo Bibahende Haru Ho Haame Haga kago ibugua i̱ hongo ngiaga. Ibugua nogo tara mini dia ge hongoheme hagadagua i̱ mo heleda. Ani bialu dindi hari daliga neneni pialu koria ibugua i̱ pi naloliya haru haga ka, lalu Habuguguhanda bi ogoni Anduane Homogohondo lai hene.