Text copied!
CopyCompare
Kankanaey Bible - Habakkuk

Habakkuk 3

Help us?
Click on verse(s) to share them!
1Siya na di kararag din mamadto ay si Habakkuk.
2“Apo Diyos, dinngek din inam-amag mo et nasdaawak dadlo. Amagem koma abe ed wani ay timpo mi din nakaskasdaaw ay inam-amag mo ed idi. Olay mo manbonget ka, maseg-ang ka koma.
3Omali kasin si Diyos ay nasantoan ay mapo ed Edom ya sin kadondontogan ed Paran. Din koniniing na et silawana amin ed daya, et idaydayaw da sin amin ay solin di daga.
4Kaman agew di koniniing na, somilsilap di silaw ay mapo sin takkay na ay kad-an di naidodolin ay panakabalina.
5Wada di dowa ay kaeegyat ay makiey en sisya: din nakaro ay sakit ay ipaon-ona na, ya din pese ay ipaonod na.
6Mo isaldeng na ay mandan, manyegyeg nan daga, manpayegpeg din kaipoipogaw mo ilaenas daida. Din makneg ay dontog et makosokos da, din bilig ay nannandanana ed bayag et magday da.
7Inilak ay emegyat din taga-Cusan, manpayegpeg da abe din taga-Midian.
8Apo Diyos, ay din baybay ya ginawang di binmongetam idi nanlogan ka sin kalisam ay mangisalakan?
9Insaganam din panam ya nansianem din daga babaen si ginawang.
10Manpayegpeg das egyat da din dontog ay mangilan sik-a ya nan-odan si napigsa. Din malosong ay baybay yan man-agodood da, et pomigsa din dalloyon da.
11Gominek din agew ya bowan sin kad-an da ay mangila sin panam ay napigsa ya gayang mo ay somilsilap di tadem na.
12Gapo din bonget mo, din nanasyon yan in-gatigatin mo.
13Inmali ka ay mangisalakan sin ipogaw mo ya din arim ay pinilim, Apo. Pinsem din pangolon di mangam-amag si lawa, maga polos di binay-am sin sosoldado na.
14Pinanam din toktok di pangolo da idi kaman dan pewek ay inmali ta pansisianen das dakami. Naragsakan da abe ay namalpaligat en dakami ay kaseseg-ang sin nantabtabonan mi.
15Nangabayo ka ay nangigatigatin sin baybay et manlowag din napigsa ay danom na.
16Sin nanngeak isna, palalo di egyat ko, et nan-gayenggeng din sobil ko. Kinmapoyak ya nanpayegpeg din peweg ko, ngem gominekak ay man-ed sin panosaan Diyos ay Apo mi sin inmali ay mangobat en dakami.
17Olay mo din igos, obas ya olivo yan magay lames da, sin payew yan magay maapit da, olay matey amin ay karnero ya baka,
18naragsakak pay dedan, tan si Diyos di omisalakan.

19Din kapoan di pigsak et si Diyos ay Kangatoan, sisya di omay-ayowan sin kadondontogan. Panbalinenas sak-en ay kaman ogsa ay adi maisoksokba.”