Text copied!
CopyCompare
Diossen joi jatíxonbi onanti joi - Habacuc

Habacuc 3

Help us?
Click on verse(s) to share them!
1Nato riki profeta Habacucnin orana.
2Ibó, jatíbi min aká yoikanai ninkataxa, raketi ea saki ikai. Ani jawéki moatian min akábo, rama noa jaketian noa axonwe, nonribi onannon ixon. Jaskati sináxonbi min noa noibai noa oinmawe.
3Diossa Temán mainmeax joai; Parán mananmameaxa Jakon Dios joai. Jawen koshi shinanra naikan jatíbiain iki, nato netenxonra jatíbiainxon rabikanai.
4Pené joekan kateara joai, jawen mekenmameaxa kaná joébo jokonai, jaskáaxonra jawen koshi janbi jonea onantiakin jishtiai.
5Já joketianra jakonmabires isinbo beai, yoná koshiribira japekáo joai.
6Já jainbi chankaketianra mai ninwana iki; jato oinnara maibotiibi ikábo raketi saki ikanai; ramanmantian mananbora reokootai, moatian mananbora ras ikai; Dios jan niai baira jatíbitianbires iki.
7Cusán jonibo jakonma meranbires ikanaira en oinna iki, Madiánhin jaa jonibora raketi senbíkana iki.
8¿Ibó, parobokiki mia sinata? ¿Kikínbiresiki aniparoboki mia sinata? ¿Jaskatiki min kabayobaon mia peyaka, janxon min jatoaresai carronki mia naneta?
9Min kanóti betan jatíbi min piabora moa min benxoa iki. Parobo axonra, jan jene boai taebo min ake.
10Mia oinnaxa manánbo shakotai; naikanmeaxa oi kextó maannai, aniparo nemín itan anibechonra xóo ikai.
11Min piabo kikin pené ikax, itan min lanza kikinbires kaná ikai keskati joétaitianra, bari betan oxe jonetax moa pikóyamai.
12Sinataxa nato main jatíbiain mia niai; kikínbiresi sinataxa maibaon mia jaton penitai.
13Minra min jonibaon paranan ikín min jato akinna iki, jainxonra ja minbi katota aporibi min akinna iki. Jakonma jonibaon xobora min ras aka iki, jainxonra jan koshia shanka inonbi min jishtiakin pikoa iki.
14Jaton koshira jawen pianbi min retea iki, niweaba koshi beai keská rabíbeirani kabáyonin bexonra, jonéres jato keyonoxon jan kopímistiomabo jato tsakakana iki.
15Aniparo kikin jene neminhainra, min kabáyonin jatíbiain mia kaa iki.
16Jatíbi neskara ninkataxa ea raketa iki. Ea keski ikaitianra, nokon witaxen moa tewanyamaa iki, jatianra jatíbi nokon yora koshi keyota iki. Jaskara ikenbira, noa jan jakonma tenemai, sontárobo Diossen masá tenemai nete nokotai kaman, jakonhaxonres en manati iki.
17Higo jiwibo bimiamaibi, Uva jiwibo bimiamaibi, olivo jiwibo bimiamaibi; non wainko banaabo jawe tsekati yamakenbi; wakabo, carnerobobi yamakenbira,
18mia, ea jan jamai iketianra, raroanan jatíbitian en mia rabiti iki.

19Nokon Ibó minra jakiribi benaakin ea koshi menia iki; chaxon ishto menixon, manan keyáinbo min ea raanara ea jain iká iki.