1GALA goo wo nui Aɓakuke ná-GALA falii, é ga maawɔin wuyei.
2Ɠɔoɠɔ GALAGI, gè naa mɛnini, nii è kɛɛni, gè luani ɗa-ɠɛɛwotii ʋa, ee, Ɠɔoɠɔ GALAGI. Ɗa-ɠɛɛwotiiti ti ʋilɛ su gi ɠaazu! Ti ɠula kɛlɛma konagiti daawu! Kɛlɛ ɗa-yiiɠaawanai zu, ɠizɛ ɗa-maawɔinɠai zu.
3GALA paaʋɛ é zeɠe Teeman, GALA Ɲadegai ʋaaʋɛ é zeɠe Palan ɠizeiti ma. Lo! Ná-maayikii ɠa ʋɛɛni geeɠɔlɔgi ma, ná-lɛbiyai eteai laavegɛ.
4Kɛɛʋɛ eɠɛ wozakalagi ma voloi, ma zezeiti ti ɗa volo, é ɠula zeaʋɛ, ná-zobogi ma lɔɔɠuzu vai ɠana!
5Ɗɔfɔ zeeɓɛi ɠa kakala ʋelei, é ɗa li, kɔlɔ kpadima zeeɓɛ ɠa kɔɠɔ ʋogiti su.
6Siɛgi zu a lona da, zooi ɠa ɲiikpi, siɛgi zu é wɛlɛzu la, zii ɠiligiti sasu ɠa ɓali, gize wɔlɔwɔlɔgiti ti ɓusɛ, kaite ɠize nɛmɛiti ti vuka, ʋɛti ti ɠɛni mɔungi ga peleiti, é ɗa ziɛ la.
7Gè Kusan nuiti ta-zeɠe ɠotaiti kaa, ti ɠaaʋalagai ba, Madiyan yooi ma ʋɛlɛiti suɓezeɠelega.
8Ee, Ɠɔoɠɔ GALAGI, è yiiɠaawanaʋɛ ziɛ wolaiti ma ɓaa? È yiiɠulaʋɛ ti laalɔɠɔma, è yiiɠaawana kpoloɗɛi ma ɓaa? È losu kɔɔɠɔ wotoloiti su, ma zooiti ti liizu ga ɗe pilɛ sɔlɔɔsuʋɛ?
9È ɗa-ɠɔɔɠɔ ɠilɛgi ɓɛtɛa, ɗa-mɛɛinti ta ga minazeɠegiti, è ti woni. Lo! Ɗa zooi ʋalizu su ga ziɛ wolaiti.
10Gizeiti ta è ɠaana, ta ɗa ɓali, sabalagi ɗa zooi yɛɓɛ, kpoloɗɛ wolai ɗa zikɔ, é ɗa ma lakpatakpagi lɛ geezuʋɛ.
11Foloi ta alugi ti yɛ loni losuʋɛ, ɗa-mɛɛinti ti ziɛzu ta-wozakalagi ɠakala, ta ɗa-ɓɛɛin é volozu ma wozakalagi ɠakala.
12Ɗa eteai zuɓizɛzu ga ziiɠulagi, è ziiti dɛɛvɛ ga ziiɠaawanai.
13Ɗa ʋaazu ɗa-nuɓusɛiti ta-ɓɔba vai ma, è ɓɔ ɗa-masagi ʋa è seiɗai. Ɗa faa ɲɔu ɠɛ nui ná-pɛlɛi ungi leʋezu ga, è koloɠolo, è pɛɛ su mɛɛ.
14Ɗa gi zili nuiti ta-ɠundiɠiiti tɔungiti kpotasu ga ti ɓɔɠɔ mɛɛinti. Ti ɠɛni eɠɛ fiilɛ wolai, ti yeizu gi ma ga ti gi zuvaza, ti ɗa koozunɛɛ ɓeei loo, ti ɠɛʋele ɓɛtɛai ga zɔi maanɔɠɔai, ti koloɠolo dɔɔɠuzu.
15È pelei laa ɗa-zooiti bɛ kpoloɗɛi wu, ziɛ wolai wu é zulusu.
16Gè naama wooi mɛnini, gè ɠɛ unga wuulee. Dàkɔlɔgiti ti ɗa ɓali, mà ɠaeiti su ɗa ɠɛ yɔɔɠɛ, gè yɛ ná, gè ɗa ɓali. Kɛlɛ maanɛɛʋɛ ga gè zei kpɛ, gè kidaaʋili foloi maaɓɔun, foloi é ʋaazu gi zili nuiti daalɔɠɔma.
17Kooleɠoole gului la mɔ waa pɛ, leezɛn ɓelei la mɔ gwaa woga pɛ, wolive wului waa vai ɠa ɗa nuiti kaka, nu tii ɠɛ ʋɛ, é la ani nɔpɛ sɔlɔɔga ná. Baalagiti ta boliiti gaa ɠa ʋala ba ta-zasaiti su, nikɛ zasa la mɔ ɠɛa ná.
18Kɛlɛ nɔ̀un nà, nà ɠoozunɛɛzu Ɠɔoɠɔ GALAGI maaʋele ma, zìimaʋɛ laave ga koozunɛɛi, nà-GALAGI maaʋele ma, é kìzosu.
19Maliɠii Ɠɔoɠɔ GALAGI ɠa é ga nà-zobogi, toɠa kɔ̀ɠɔiti feɠasu bu, ga dopai nɔnɔiti kɛʋele, é ziɛ ga ze gize wolaiti ma. Guye loo ɠundiɠii nɔnɔi ʋe. É loozu ga kɔnigiti.
