1Abram kana bodu 99 maranai Bada i rerematara kurina ba i wona, “Yauku God Maragata Sakina. Ere bi patutum ke bosaibiriku, ba am wose ereonowasi totorisi ba gairesi kamosi yai ke mana.
2Au bidamanina maragasina ana terei, kom ba yauku basuti yai, ba am rakaraka ina rakata saki.”
3Ba Abram naonai ibo pepeta i gakira ku tano ba, God kurina i wona,
4“Au bidamanina maragasina nina kom a bereberimi kata, kom dam dobu tompipininai ereonowasi tamasi.
5Kam waba Abram wai i kakaba, karaku kom kam waba wai Abraham, basuna kom a wosim dam ereonowasi tamasi.
6Ana wosim kuni tuwa pesara ba am rakaraka ina rakata saburere kata kom kamomi yai tautaupauma sina botu.
7Ba au bidamanina maragasina a terei kom ba am rakaraka muri yai te botubotu wai kurisi. Niko bai damanina maragasina mama damanina. Yauku am God, ba yebo am rakaraka muri yai te botubotu wai kosi asi God.
8Ba niko kupura Canaan karaku ko mamanei wai kega karimi yai, saba tupana kom ba am rakaraka muri yai te botubotu wai a bereberimi. Kata ini karisiyai ba ina madamana, ba yauku wai kona asi God.”
9Ba Abraham kurina i wona, “Kom au bidamanina maragasina ke bokikisi, kom ba am rakaraka kimtina murimi yai te botubotu wai kosi yabata.
10Nikona wai au bidamanina maragasina kurimi kata kom ba am rakaraka murimi yai te botubotu wai kona bokikisi. Sebasebare ereonowasi kamomiyai sinisi sina bona.
11Komi sinimi sina bona, au bidamanina maragasina matakirina, kom ba yauku basutiyai.
12Kata kimta muri yai te botubotu wai sebasebare ereonowasi kamomi yai te tuputupuwa kao 8 murinai wai sinisi sina bonai ba yebo sebasebare ereonowasi kamomi yai te bobagibagi wai, ba memena wata si botu kona, ku gimonisi wai, ba kosi kega natunatum wai yebo yabata.
13Pipiya memena am rakaraka kamonai si tupuwa wai, kona memena ku gimonisi wai kosi yabata sinisi sina bona. Ba nikona kona wosei wai tupuwimi yai au bidamanina maragasina ina ma damana.
14Meo sebare wata sinina kega sina bonai wai kona kega ana pipiya kamosi yai ina mana kairavina au bidamanina maragasina i kasikotobi.”
15God yebo Abraham kurina i wona, “Kaowam kega muri yai kuna yorei Sarai saba kana waba wai Sarah.”
16“Ani gaireni ba natumi sebare ini tuwei ba ani gaireni wai, kata kona dam ereonowasi sinasi, ba konai tautaupauma pipiya sini badisi wai sina botu.”
17Damanina Abraham naonai i peku ba nuwa sinenai nikona i nosi wai i maniba, ba i wona, “Mekabage pipiya ikei ina tupuwa, ba yauku a morapa, kau bodu 100? Ba yebo Sarah wai kana bodu 90, kata mekabage ini tuwa?”
18Ba Abraham God kurina i wona, “Ishmael kuta boterei kata am bigairena gaburinai ita mana.”
19Damanina God i wona, “Saba kaowam Sarah wai ini tuwa sebare, ba kana waba kuna yorei Isaac. Au bidamanina maragasina karinai ana terei kata bidamanina maragasina ina madamana ana rakaraka murinai kairavisi.
20Ishmael kairavina wai a nonorim, kona yebo kega ana netaveyei, ani gaireni ba ana mariya ba ana rakaraka ani pesari. Ba kaiwabo asi 12 konai sina botu ba ana dama wai ina rakata saki.
21Saba au bidamanina maragasina wai natum Isaac yabata ana wosei ina tupuwa kona niko maranai bodu e botubotu murinai wai, Sarah ini tuwei.”
