Daniel 1

1

2

3

4

5

6

7

9

¹Gêdêŋ lau Juda nêŋ kiŋ Jehoiakim nê jala gôliŋŋa kêtu têlêacŋa naŋ, kiŋ Babilonŋa Nebukadnesar jakêgi Jerusalem auc.

²Ma Apômtau kêkêŋ lau Juda nêŋ kiŋ Jehoiakim kêsêp eŋ lêma ma Apômtaunê lôm ŋawaba ŋagêdô gêwiŋ. Ma eŋ kêkôc gêŋ tau jakêsô ênê anôtônê lôm aŋga gamêŋ Sinar ma ketoc waba tau kêkô ênê anôtônê andu kanom ŋa.

³Go kiŋ tau kêjatu nê gejobwagasêga Aspenas gebe êjaliŋ lau ŋagêdô aŋga lau Israel nêŋ kiŋ to nêŋ lau towae nêŋ gôlôac sa.

⁴Eŋ êjaliŋ lau wakuc sa. Êsêac ôliŋ ŋago masi to laŋôŋ êjam ma lau tokauc mêtê samobŋa ma lau, taŋ sêjala biŋ naŋ, ma têtap kauc sa ŋagaôgeŋ, ma têtôm sênam sakiŋ sêmoa kiŋnê andu. Ma Aspenas êndôŋ êsêac e teto to sêsam aweŋ Kaldea tau êtu tôŋ.

⁵Kiŋ tau kêjatu gebe sêkêŋ gêŋ taniŋŋa to wain aŋga eŋ tau nê tebo êndêŋ êsêac sêniŋ to sênôm êtôm bêcgeŋ. Ma kêsôm gêwiŋ gebe têndôŋ êsêac êtôm jala têlêac, go mêŋsêkôc nêŋ kôm sênam sakiŋ kiŋŋa sa.

⁶Lau tonaŋ nêŋ ŋaê tonec Daniel agêc Hanania gebe Sadrak ma Misael gebe tonaŋ aŋga lau Juda nêŋ.

⁷Ma gejobwagasêga gê êsêacnêŋ ŋaê wakuc. Eŋ kêsam Daniel gebe Beltesasar ma Hanania gebe Sadrak ma Miseal gebe Mesak ma Asaria gebe Abednego.

⁸Mago Daniel taê gêjam kêtu tôŋ gebe kiŋnê gêŋ taniŋŋa to nê wain enseŋ ênê dabuŋ su atom, tec keteŋ gejobwagasêga gebe êkêŋ gêŋ tonaŋ êndêŋ eŋ e enseŋ ênê dabuŋ su atom.

⁹Ma Anôtô taê gêjam Daniel ma kêkêŋ gejobwagasêga gêlic eŋ ŋajam ma taê walô eŋ.

¹⁰Gejobwagasêga Aspenas tau kêsôm gêdêŋ Daniel gebe “Aê katêc tauc gebe ŋoc apômtau kiŋ tê kêjaliŋ nêm gêŋ ôniŋ to ônômŋa sa nê, oc êlic gebe aôm ôtôp ôtôm ŋapalê, taŋ nêŋ jala kêtôm aôm nêm naŋ atom ma oc ênac aê êndu.”

¹¹Go Daniel kêsôm gêdêŋ sakiŋwaga, taŋ gejobwagasêga kêkêŋ eŋ gebe ênam sakiŋ Daniel agêc Hanania ma Misael agêc Asaria naŋ gebe

¹²“Ônsaê nêm sakiŋwaga aêac êtôm bêc lemeŋlu acgom ma ôkêŋ gêŋgaga to bugeŋ aêac aniŋ to anôm.

¹³Go ônam dôŋ aêac êpi ŋapalê, taŋ seŋ kiŋnê moasiŋ naŋ, ôlic su, go aêacma lau ondoc têtôp ŋajam êlêlêc su, go ôŋgôm êndêŋ nêm sakiŋwaga aêac êtôm aôm taêm gêjam.”

¹⁴Tec eŋ kêkêŋ taŋa eŋ ma kêsaê êsêac kêtôm bêc lemeŋlu.

¹⁵Bêc lemeŋlu tonaŋ gêbacnê ma eŋ gêlic gebe Daniel to nê lau ôliŋ ŋajam ma têtôp sêlêlêc ŋapalê samob, taŋ seŋ kiŋnê moasiŋ naŋ su.

¹⁶Amboac tonaŋ sakiŋwaga tau kêkôc nêŋ moasiŋ to nêŋ wain, taŋ gêjac êsêac ŋawae naŋ, su ma kêkêŋ gêŋgagageŋ gêdêŋ êsêac seŋ.

¹⁷Ma Anôtô kêkêŋ kauc to jala gêdêŋ ŋacseŋom aclê tonaŋ e sêjala biŋ to mêtê samob. Ma Daniel kêjala mêtê êwa mê to gêŋ ŋakatu ŋam saŋa gêwiŋ.

¹⁸Gêdêŋ têm taŋ kiŋ Nebukadnesar kêkêŋ naŋ gêbacnê, gejobwagasêga Aspenas gêwê êsêac dêdêŋ eŋ sêja.

¹⁹Ma kiŋ gêjam biŋgalôm gêwiŋ êsêac e gêlic gebe êsêac samob nêŋ teŋ kêtôm Daniel agêc Hanania ma Misael agêc Asaria atom, amboac tonaŋ sêkêŋ êsêac sêmoa sêwiŋ kiŋ ŋapaŋ.

²⁰Têm samob, taŋ kiŋ kêtu kênac êsêac kêtu biŋ kauc to jalaŋa teŋ naŋ, eŋ gêlic gebe êsêac sêjala biŋ kêlêlêc lau beŋ to mectomaŋ samob, taŋ sêmoa ênê gamêŋ kiŋŋa naŋ su ŋêŋgeŋ.

²¹Ma Daniel gêmoa ŋapaŋ e Kirus kêtu kiŋ Babilonŋa.