Danie 1

1

2

3

4

5

6

7

8

9

10

11

12

¹Juda ŋicwofuŋ Jojakim e ŋicwofuŋ gie bahuc jume jara 3 eha Babe ŋicwofuŋ Nebukanezazi fisirâ Jerusalem hae somâckewec.

²Ehame Wofuŋ e Juda ŋicwofuŋ Jojakim â Anuture ufuŋkonec wiac gâcne i Babe ŋicwofuŋte meo râewec. Eme eki ine wiac i nemu‐ticnere ufuŋ Sina mâreŋko ŋewec ira barawec. Erâ nemu‐ticnere ficko moneŋ katapao râeme huwec.

³Erâ ŋicwofuŋzi moneŋ mafa soŋaŋ‐ticne Asipenaʒa e Israe ŋic rocjopahuc ŋicwofuŋ â fekicne jaŋere motecfâc gâcne bâwosâec‐jopaocte âzâcnewec.

⁴Ine motec kecʒiŋucne jaŋe hâcne: Motec ɋiɋicne, sahac hawari biaŋhec, mamanahec, maŋɋârâŋ â maŋfânâŋhec, erâ ŋicwofuŋte ficko kiŋaŋ gie aafec faio bapane. Motec iŋucne rocjoparâ Kaldea ŋic jaŋere qâreŋ hawari â dâŋ qazu‐jareniŋte mutâcnecnewec.

⁵Erâ ʒoaŋ sâc ŋicwofuŋzi nânâ â waiŋ opâ nâhuc juwec irec nâfocne jare gumec eniŋte mutâcnewec. Jaŋe wiac qazu‐jarekupie jara jahec â moc tarame ŋicwofuŋte kiŋaŋ gie fuŋkerâ baniŋte mukicne.

⁶Motec rocjopakicne jaŋere ŋondeŋko Juda motec ʒiŋuczi jumbiŋ: Danie, Hanania, Misae erâ Aʒaria.

⁷Eme kiŋaŋ qaqa jaŋere micnezi ʒâŋe ʒiŋuc jare rawec: Danie ere ʒâŋe Beletesaza, â Hananiare ʒâŋe ine Sadaraka, Misae ere ʒâŋe Mesaka â Aʒariare ʒâŋe Abenego, iŋuc mucjopawec.

⁸Danie e ine ŋicwofuŋte nânâ â waiŋ opâ nâhuc maŋticne hegâpârezacte mi nâocte mupaŋkewec, irec nânâ wiac i mi nâzore nânâ soŋaŋ micnezi manacneocte numucnewec.

⁹Eme Anutuzi manaha nânâ soŋaŋ micnezi Daniere maname boc biaŋkeha mi qataracnewec.

¹⁰Mâc ʒiŋuc sawa âzâcnewec: “No ŋicwofuŋ‐nanere hâwicnukac, eki hâcne nânâ opâ‐ŋeŋicte mumupaŋ râewec. E sahac‐ŋeŋiczi âgofâc‐ŋeŋic jaŋere sahac irec sâc mi eme honerâ mume juju‐nane omaeocmu.”

¹¹Iŋuc mume kiŋaŋŋic jaŋere micnezi Danie â Hanania â Misae erâ Aʒaria jaŋere soŋaŋ moc râewec e hâcne Daniezi dâŋ ʒiŋuc âzâcnewec:

¹²“Go sifu esâickerâ kiŋaŋ qaqafâcge nâŋe ʒoaŋ gie bapa 10 irec sâc monʒaŋ â opâ sawa gumec‐nâponʒaŋ.

¹³Eme dameŋ i tarame nâŋe mecne â ŋicwofuŋte nânâ nâeŋgopieŋ jaŋe mecne mâmâc sahac‐nâŋec gowatupene honezemec. Erâ honec‐nâpocmu irec sâcko wiac enârezemec.”

¹⁴Eme soŋaŋ e dâŋjeŋic manarâ ʒoaŋ gie bapa 10 iŋuc ejarewec.

¹⁵Ʒoaŋ gie bapa 10 tarame sahac hawari‐jeŋiczi motec gâcne ŋicwofuŋte nânâ nâmbiŋ jaŋere sahac sirickehuc biuc wokemaŋ sâkohec ewec.

¹⁶Iŋuc fuame nânâ soŋaŋzi nânâ â waiŋ nâniŋte mujarekicne i bârâriehuc monʒaŋ sawa gumec‐jopawec.

¹⁷Eme Anutu e ŋicmotec 4 jaŋe qâreŋ honehuc wiac fuŋne fuŋne mana taraniŋte mamana bâfua‐jarewec; Danie eki ine maŋko fuac dâŋ â guŋte fuŋne i mâmâc mana tarawec.

¹⁸Eme motec sasawa jaŋe ŋicwofuŋte maio fuaniŋte mukicne dameŋ i maickeme kiŋaŋŋic jaŋere micne sâkozi ŋicwofuŋ Nebukanezare ficko jowac‐jopa fewec.

¹⁹Eme ŋicwofuŋ e jaŋehec dâŋ muc manac embiŋ. Ehame motec sasawa jaŋere ŋondeŋko Danie â Hanania â Misae erâ Aʒaria jaŋe iŋucne moc mi bâfuac‐jopawec. Irec jaŋe hâcne ŋicwofuŋte motec fuŋfuŋfâcne juniŋte râec‐jopakicne.

²⁰Eme ŋicwofuŋ e wiac irec me irec mu indiŋ ejareme jaŋere mamana â maŋɋârâŋzi e jahacne mâreŋko qaŋgec bapa â mamana ŋic jumbiŋ jaŋere sâc jâuru‐fârewec.

²¹Eme Danie e ira kiŋaŋ qaqa gie bahuc juhame ŋicwofuŋ Kiru ere dameŋ maickewec.