Text copied!
CopyCompare
Kâte Bible - Danie

Danie 9

Help us?
Click on verse(s) to share them!
1Ahasiwero ŋokâ‐ticne Dariusi e Mede mâreŋko fuakicnezi Kaldea ŋic jaŋere ŋicwofuŋ erâ juwec.
2Eme ŋicwofuŋ gie‐ticne bahuc juhame jara 1 mi taraha Danie no miti papiao dâŋ kecʒiŋuc wosehuc jara dameŋte manatâc qâtâc epo: Wofuŋte dâŋ Jeremiarao ʒiŋuc fuawec: Jerusalem hae tâtierâ jara 70 sesuctac fuarâ foocmu.
3Erâ no sowa juhuc mateŋ qonaŋkerâ ʒafe ruahuc Wofuŋ Anutu maickehuc wâsickepo.
4Erâ dâŋ kecʒiŋuc mutaniŋkehuc Wofuŋ Anutu‐nane numucnepo: “O Wofuŋ, go Anutu kâcɋene â hâhâwicne sâko, go maŋzi ʒâficguhuc sâcmutâc dâŋge mana rereŋ eeŋgopieŋ jaŋehec ʒâʒâfic ehuc aki anonoc ejareekic.
5Nâŋe sâqocne bahuc hehesic bâfuambeŋ, nâŋe sindaŋ ehuc râpecgumbeŋ, erâ nâŋe sâcmutâc dâŋge huckehuc mumutâc dâŋge behembeŋ.
6Ehuc kiŋaŋŋicfâcge, porofete hâcne, jaŋe gore micte erâ ŋicwofuŋ â fekicnefâc‐nâŋec erâ mamacfâc‐nâŋec â mâreŋ‐nâŋecte ŋic ŋokac gâcne sâko dâŋ nâzâhuc juhapie mana rereŋ mi embeŋ.
7O Wofuŋ, go tiŋne rune, nâŋe ine mimi busâqoczi fai‐nâŋecko fewec fokac i Judaŋic me Jerusalem hae rune me Israe ŋic sasawa bembeŋko me ʒoricko juŋgopeneŋ nâŋe hehesic ehuc bugao bapene mâreŋ sâc bâtâtiec‐nâpomeŋte iŋuc hâcne fua‐nârewec.
8O Wofuŋ, nâŋe wiac hehesicne egarembeŋte mimi busâqoczi nâŋere faio mecne â ŋicwofuŋ â fekicnefâc‐nâŋec erâ wâc mamacfâc‐nâŋec jaŋere faio mâmâc fewec fokac.
9Nâŋe go râpecgumbeŋ, Wofuŋ Anutu‐nâŋec gorao ine sifu uruc jauŋ â kiŋ bebehe fokac.
10Nâŋe Wofuŋ Anutu‐nâŋec gore dâŋ mana rereŋ mi embeŋ, â kiŋaŋŋicfâcge porofete jaŋe sâcmutâc dâŋge mutâcne‐nârembiŋ irec sâcko wâc mi jumbeŋ.
11Aricne, Israe ŋic nâŋe mâmâc sasawa sâcmutâc dâŋge huckehuc behembeŋ, ehuc dâŋge mi mamana qikiŋnembeŋ. Irec kiŋaŋŋicge Mose ere sâcmutâc dâŋko sâwecdâŋ qâreŋkekicne fokac i sâqocne bahuc bugao bambeŋte nâŋerao fârio qawec.
12Go nâŋe â guriŋ bapafâc‐nâŋec uŋsawaŋ dâŋ nâzâmeŋ i mutec wiac hâhâwicne sâko fuarâ fai‐nâŋecko fehuc fârinehec ewec hâcne. Irec Jerusalem hae wiac fuacnewec wiac iŋucne sâko mâreŋ gâcnao moc mi fua‐jâmbâŋkewec.
13Mosere sâcmutâc dâŋko okacnere dâŋ qâreŋkekicne fokac irec sâcko fai‐nâŋecko fewec; nâŋe ine eebapa‐nâŋec sâqocne i beherâ Wofuŋ Anutu‐nâŋec gore dâŋ fâri qizecne mana rereŋ ehapene honec‐nâpotec biaŋkeocte mamanac moc mi jumbeŋ.
14Irec hâcne Wofuŋ, go wiac hâhâwicne mana biric emeŋ i mutec fai‐nâŋecko fewec. O Wofuŋ Anutu‐nâŋec, go wiac ebac eekic i tiŋne sasawa, nâŋe ine dâŋge mana rereŋ mi embeŋ.
15O Wofuŋ Anutu‐nâŋec, go ŋicfâcge Aigita mâreŋkonec mesanaŋgezi bacjopa wahameŋ, ehame ʒâŋe biŋege fua taniŋkewec i miŋecgac fokac jaha, nâŋe ine sâqocne bahuc wiac sindaŋne embeŋ.
16O Wofuŋ, go bâbâpiaŋ giegere erâ kimbeŋ aaricge Jerusalem haeonec â tiri tikigaonec bârâriezemec. Nâŋe nâŋâcne â mamacfâc‐nâŋec nâŋere hehesicte â kiŋ bahacte erâ ŋic rârec rârec juraŋgopieŋ jaŋe Jerusalem hae mecne â ŋicfâcge nâŋe mâmâc mu ruruc enâreeŋgopieŋ.
17O Wofuŋ‐nâŋec, go kiŋaŋŋicgere nunumu â wira wâwâsic i manazemec. O Wofuŋ, tiri ufuŋge sipirickekicne i gahacne biaŋte erâ ʒâŋe maigezi âke tamaezemec.
18O Anutu‐nâŋec, go hazec râerâ manac, ehuc ʒâŋe firâ sipiric‐nâpokicne nâŋe mecne â ʒâŋe biŋege fokac hae i mâmâc honec‐nâpozemec. Nâŋe tiŋne juju‐nâŋecte erâ mâcne, buuruc sâkogere erâ wira wâwâsic egareŋgopeneŋ.

19O Wofuŋ, go manac. O Wofuŋ, go kiŋnâŋec behec, o Wofuŋ, go hazec râerâ bafic‐nâpoc. O Anutu‐nâŋec, go gahacne biaŋte erâ ŋeŋec ʒeʒepec mi ec! Hae sâkoge â ŋicfâcge nâŋe hâcne gore ʒâŋe bajuŋgopeneŋ.”
20No nahacne â Israe ŋicfâc‐nane nâŋere sâqocne mufuahuc iŋuc mupo, ehuc Wofuŋ Anutu‐nane tiri tiki‐ticnere wira wâwâsic ecnepo hâcne.
21Eme nunumu gie bahape jaha, Gabirie mârâc maŋnane ŋerisieme honepo, eki hâcne owa ririŋte taha bapa dameŋko furuc furuc qarâ norao fisiwec.
22Fisirâ ʒiŋuc nazawec: “O Danie, no maŋɋârâŋ â mamana tara garepemurâ wahakopac.
23Manakic, go fuŋkerâ wira wâwâsic ehaŋtec dâŋ moc fua‐narewec, eme no Anutuzi maŋjauŋ egarekacte dâŋ i hâcne gazapemurâ ʒi fua‐garekopac. Irec go dâŋ i manatâc qâtâc erâ wiac hone manac emeŋ irec fuŋne mana tarazemec.
24“Ŋicfâcge â tiri haege jaŋere jara dameŋ 490 mukicne i tarame qaqatara â sâqocne erâ sindaŋte aka fuame kiŋjeŋic behe‐jarezo. Eme tiŋne juju fofo sanaŋ fua‐jareme mu bararuŋ â findaŋdâŋzi fârinehec eocmu. Iŋuc fuame tiri ufuŋ wokemaŋ ruacnezo wâc.
25Irec ʒi manahuc mana tarac: Jerusalem hae heɋârehuc bâbâpiaŋkere dâŋ fuawec dameŋ irecnec juwefukuhapie jara 49 taraha ŋic fekicne moc wokemaŋ ruacnekicne eki hâcne fuaocmu. Eme irec faicnao ine hae i hata â hae ʒoŋa‐ticnehec bâpiaŋkehuc juhapie jara 434 taraocmu. I dameŋ hâhâwicnere maŋnao iŋuc eniŋmu.
26Eme jara 434 tarame wokemaŋ ruacnekicne moc dâŋgie tâmiric kosa qâhâmopie arictac eocmu. Eme ŋic fekicne mocte ŋicfâc jaŋe fisirâ hae â tiri ufuŋ ima baniŋmu. Eha tataranao ʒika â wiac hâhâwicne mukicne izi rumi iŋucne ʒocnehec fisime taraocmu.
27Ŋic fekicne eki ine ŋic bocjaha jaŋehec ʒâʒâfic sanaŋ ehapie jara 7 taraocmu. Erâ dameŋ irec maŋnao ine taha bâzi â taha wiac gâcne irec aka heme omaeocmu. Ehame irec okacne ɋâŋ qâqâtâc mamakâcne moc âkendâŋnepie domaocmu. Domakume ine okacne mukicne izi fisirâ sisipiric ŋic ere faio feme taraocmu.”