1Babe ŋicwofuŋ Belesaza e ŋicwofuŋ gie‐ticne bahuc jume jara wâŋ eha Danie e maŋʒâŋe‐ticne tâcneme guŋko wiac hone manac ewec. Ehuc irec dâŋ i qâhâckerâ kecʒiŋuc muhuc qâreŋkewec:
2“No maŋʒâŋe‐nane tâcneme guŋko wiac kecʒiŋuc fuame honepo: Sambâŋkonec mâŋâŋ 4 jaŋe sanaŋne qapie hâweczi siri sâko qawec.
3Ehame hâwecmaŋkonec qowi sâko 4 wefumbiŋ, hawari‐jeŋic fuŋne fuŋne.
4Bâbâni wefuwec e laioŋte hawari iŋucne erâ fakec‐ticnehec, fakec‐ticne ine tucwipere fakec iŋucne. Eme honehape fakec jahec‐ticne unuc‐jofambiŋ, unuc‐jofarâ mâreŋkonec bâfeŋnehuc ecnepie kike jahec‐ticnezi ŋiczi âterâ domaeŋgopeneŋ iŋuc âterâ domahame ŋic mamanasu fuacnewec.
5Eme honehape qowi moc wefuwec, qowi namba 2 e beare hawari iŋucne. E ŋifecpeaŋ sawa faharehuc tambaraŋ siec jahec â moc kisoŋnewec. Ehame dâŋ ʒiŋuc âzâcnekicne: ‘Ajoc, go faharerâ biuc bocjaha nâzemec.’
6Izi ine qowi moc wefume honepo; e qowi mimicne, ʒâŋene lepad, ere hawari iŋucne. Râpenao wipe fafakec 4 iŋucne focnewec, erâ e qizecne 4 jaha; qowi e tâpiri sâko râcnekicne.
7Eme ʒuhuckerâ guŋ manahuc qowi namba 4 wefume honepo. Qowi i ine wiac hâhâwicne, momori â tâpiri sâko‐ticnehec; e micsiec‐ticne i kâcɋene erâ aeŋzi bakicne, e wiac sasawa nâhuc kinʒaŋ qanʒaŋnewec, ehuc tiwâne fome kike‐ticnezi âtenʒaŋnewec. E hawarine qowi bâbâni wefumbiŋ jaŋere hawari iŋucne mâcne, e fuŋmoczi ʒuŋene 10 bajuwec.
8Eme no ʒuŋe i hone honehape mi ŋondeŋ‐jeŋicko ʒuŋe piticne moc wefu fisizejec i! Wefu fisihuc ine ʒuŋe 10 i jaŋeraonec 3 âkesuec‐jopame ŋeunuckerâ wahambiŋ. Erâ ʒiŋuc honepo: Ʒuŋe piticne ʒâŋe hândâŋ focnewec i ŋicʒâŋe iŋucne, erâ micticnaonec penaroŋ dâŋ wahawec.
9Eme no honehape eri ŋeŋe wiac hepie ŋeha ŋicqizec jâmbâŋ moczi waha ŋewec; e ŋaqi‐ticne i sinou iŋucne qaŋqaŋ jâmbâŋ; â qizec susuc‐ticne ine kateŋ ɋaɋacne iŋucne. Ʒocuuc erereŋnezi eri ŋeŋe‐ticne ewec, â ŋeŋe‐ticnere ʒafeŋgâŋ i ʒocbâruŋ iŋucne hâcne.
10Eme ere maŋfuŋkonec ʒocbâruŋ fuarâ fehuc domawec. Ehame ŋic tauseŋne tauseŋne jaŋe e kiŋaŋ qacnembiŋ, â teŋ tauseŋ gurune gurune jaŋe ere maio domambiŋ; erâ dâŋgie bahuc papia qaratie‐fârepie fowec.
11“Eme ʒuŋe e penaroŋ dâŋ mume no ʒuhuckerâ hone dendeŋnepo. Erâ honehape jaha qowi i qâhâmorâ qâŋɋâŋ‐ticne sipirickehuc ʒocko behepie ʒawec.
12Qowi gâcne jaŋere tâpiri i wâc jowac rokicne, mâc juju‐jeŋic ine dameŋ mukicne irec sâc bâʒorakicne.
13Eme no guŋko wiac moc ʒiŋuc ʒuhuckerâ honepo: Sambâŋ karoracko moczi fisiwec e hawari‐ticne ŋic hawari iŋucne, fisime ŋicqizec erao jowa rambiŋ.
14Eme ŋic gurune gurune â ŋicne ŋicne â dâŋne dâŋne jaŋe kiŋaŋ qacneniŋte tâpiri â ʒâŋe biŋe erâ uucmaŋ bâfuacnekicne. Tâpiri‐ticne i sanaŋne â tatarane tâmiric, erâ uucmaŋ‐ticne i ŋiczi moc mi sisipirickene.
15“Danie no maŋnane gâckeme guŋko wiac hone manac epo i manasurâ maŋ kukumbuc enarewec.
16Irec domambiŋ jaŋeraonec moc maickehuc wiac kecirec fuŋne naza‐jâmbâŋkeocte numucnepo. Numucnepe eki wiac fuawec irec fuŋne mutâcne‐narewec.
17Kecʒiŋuc: ‘Qowi sâko 4 i jaŋe mâreŋko ŋicwofuŋ 4 fuarâ juniŋmu irec sâsâcne.
18Fekicne sâkore tiriŋicfâc jaŋe ine uucmaŋ i ro rauc erâ ɋaŋɋaŋ ɋâriaŋ juraʒihuc juniŋmu sanaŋ.’
19“Iŋuc nazame qowi namba 4 irec fuŋne mana‐jâmbâŋkezore boc enarewec, qowi e âgofâcne jaŋere sâc aricne, e hawari fuŋmoc. E boc hâhâwicne, micsiec‐ticne i aeŋzi bakicne â ʒârâic‐ticne i aeŋ bâbâroŋzi bakicne jaha. E rârec rârec wiac forawec i kinʒaŋne‐fârehuc nâkâcnewec, ehuc tiwâne fome kike‐ticnezi âtenʒaŋnewec.
20Erâ i sawa mâcne, no qowi qizecnao ʒuŋe 10 domapie honec‐jopapo, erâ ʒuŋe moc wefu fisihuc ʒuŋe jahec â moc âke suec‐jopame ŋeunuckerâ wahambiŋ, â ʒuŋe i ʒâŋe hândâŋhec, erâ micticnaonec sahac mumuteŋ dâŋ wahawec, eha âgofâcne gâcne siric‐jopawec, irec fuŋne i mâmâc manazore enarewec.
21Eme no ʒuhuckerâ honehape ʒuŋe izi tiriŋic jaŋehec qaqac eku sanaŋkewec.
22Ehame ŋicqizec jâmbâŋzi fisirâ Femicne sâko tiriŋicfâc‐ticne jaŋere dâŋ mutarawec. Eme dameŋ maickeme tiriŋic jaŋe uucmaŋ jare taha ekicne.
23“Mârâc dâŋ nazawec ŋic ekizia mocwâc ʒiŋuc nazawec: ‘Qowi namba 4 irec fuŋne kecʒiŋuc: Mâreŋko uucmaŋ namba 4 fuaocmu, uucmaŋ i ine gâcne jaŋere sâc aricne, i sâc moc, izi mâreŋ sâko mâreŋ bawaharâ ima bahuc âtenʒaŋ qanʒaŋne‐fâreocmu.
24Ʒuŋe 10 irec fuŋne kecʒiŋuc: Uucmaŋ kecirec maŋnao ŋicwofuŋ 10 jaha fuarâ juniŋmu, fua‐fârepie ʒâhec moc fuaocmu e gâcne jaŋere sâc aricne, e sâc moc juhuc ŋicwofuŋ jahec â moc bawahac‐jopaocmu.
25E Femicne sâko penaroŋ dâŋ âzâcnehuc tiriŋicfâc‐ticne bâʒâic‐jopaocmu, ehuc hombaŋ dameŋ â sâcmutâc dâŋ bârâriehuc moc bâfuaocte manasuocmu. Eme tiriŋic jaŋe ere meo ferâ juhapie jara jahec â moc â nâfocne taraocmu.
26Tarame mumutara gie bahuc tâpiri‐ticne bawaharâ e jahacne qapie arictac eocmu.
27Eme sambâŋ rurumaŋko uucmaŋ forakac sâc ira tâpiri â guriŋ bapa â fekicne juju fokac i Femicne sâkore tiriŋicfâc jaŋere biŋe eocmu. Eme jaŋere uucmaŋ i tatarane tâmiric forahuc juocmu sanaŋ, ehame guriŋ bapa ŋic gâcne sasawa jaŋe kiŋaŋ qajarehuc micjeŋic reŋkeniŋmu.’
28“Wiac hone manac ewarepo irec dâŋ i ʒira hâcne tarakac. Danie no nahacne fuŋne ine ʒiŋuc: Wiac hone manac ewarepo i manasurâ boc mezacnume weaŋkepo. Erâ no sifu wiac i maŋkerâ jukopac.”
