1Ŋicwofuŋ Nebukaneza e mâreŋ sâko mâreŋ irec ŋic gurune gurune â dâŋne dâŋne jaŋe dâŋ ʒiŋuc jazakac: Wamazi ŋoŋerao qaja fuserâ fozejec.
2Anutu Femicne sâkozi mâsi â wiac ʒâŋe furu norao ebac ewec i mutaniŋkepemurâ boc enarekac.
3Mâsi bapa‐ticne i hone warec eene â wiac ʒâŋe furu bâfuaekac i qeŋ bipinehec. Uucmaŋ‐ticne i fofo sanaŋ â guriŋ bapa gie‐ticne i mimiŋzi ɋâric foraʒihuc juocmu.
4Nebukaneza no erific‐naneo mana mezac tâmiric bubiaŋ faio juhuc jupo.
5Juku guŋ moc manarâ hâwicnume fofo‐naneo fohuc dâŋ manasupo â wiac ʒâŋe furu honepo irec maŋ kukumbuc enarewec.
6Iŋuc fua‐nareme no Babe mâreŋkonec mamana ŋic sasawa norao jowac‐jopa warepie guŋte fuŋne naza mutâc eniŋte dâŋ râepe rawec.
7Eme fuŋne qaqa â qaŋgec bapa â Kaldea ŋic erâ bâpiŋte fuŋne mamana ŋic jaŋe fisipie guŋ manapo irec binaŋ bajarepo, eme jaŋe irec fuŋne nazaniŋte ŋemâckembiŋ.
8Ʒâhec ine Daniezi nore maio fuawec wâc. Ŋic e nemu‐nanere ʒâŋeo wase bahuc Beletesaza mucnembiŋ, nemu tirine jaŋeraonec mamana bajukac. Eme no e hâcne guŋ manapo irec binaŋ bacnehuc kecʒiŋuc âzâcnepo:
9“O Beletesaza, qaŋgec bapa jaŋere micne sâko, no gore fuŋne ʒiŋuc manakopac: Nemu tirine jaŋere Mârozi gore maŋko juekac irec go wiac soŋnere fuŋne muzo murâ mi ŋemâckeekic; irec guŋko wiac hone manac epo irec fuŋne nazazemec.
10No fofo‐naneo fohuc guŋko jâc ʒoricne ʒora moc mâreŋ ʒâʒâŋiŋko domame honepo.
11Eme jâc i sokarâ ʒora feku botâŋnezi sambâŋ âke uwawec; ehame mâreŋ qaŋeŋnao jumbiŋ jaŋe honembiŋ.
12Rehacne biaŋne â hândâŋne bocjaha, irec ŋic sasawa nânâ bâfua‐jarewec. Kâte qowi jaŋe fisirâ mumuc‐ticnao fomanambiŋ â wipe jaŋe tieŋnao waha herâ ŋembiŋ, ehame mâreŋko wiac jujune sasawa jaŋe irec hândâŋne nâmbiŋ.
13“Eme no ʒuhuckerâ guŋ manahuc ruc bapa ŋic tirine moc sambâŋkonec wahame honepo.
14E dâŋ hahaŋne bahuc kecʒiŋuc nazawec: ‘Go jâc keci qâfierâ tieŋ taeŋne hetâcnehuc rehacne ârârâcke‐fârec, erâ hândâŋne bâtâtie‐fârec; ehame mumucnao qowi foraŋgopieŋ â tieŋnao wipe ŋeŋgopieŋ jaŋe mâmâc jaha wise‐fârenʒepieŋ.
15Jâctuc fuŋgâtânehec e ine mâreŋko behetec aeŋ me aeŋ bâbâroŋzi niŋgiŋkerâ basanaŋkeme kecɋaŋ gieo ŋezejec. Ehame maniŋ titikuczi bâŋgumuŋkeha qowi jaŋehec mâreŋko kecɋaŋ nâhuc juzejec.
16Eme ŋic mamanasu‐ticne jâoc rorâ qowi mamanasu râcnezo, eme ihec juhame jara 7 tarazejec.
17Dâŋ i ruc bapa ŋic jaŋere mumupaŋ dâŋ erâ tiriŋic jaŋere sâcmutâc, irec ŋic jujune jaŋe ʒiŋuc mana taranʒepieŋ: Femicne sâko e mâreŋ ŋicwofuŋ jaŋere Wofuŋ jukac jaha, ehuc uucmaŋ‐jeŋic i ŋic mocte meo râezo murâ râeocmu, me ŋic wahakicne moczi soŋaŋkeocte râcnezo murâ wâc râcneocmu.’
18Ŋicwofuŋ Nebukaneza no hâcne guŋ iŋuc manapo. Eme nore uucmaŋko mamana ŋic juŋgopieŋ sasawa jaŋe fuŋne nazaniŋte eipiepie Beletesaza goki nemu tirine jaŋeraonec mamana fogarekacte fuŋne mutâcne‐narezemec.”
19Eme Danie, ʒâŋe‐ticne moc Beletesaza, e dâŋ iŋuc manarâ fâfârehuc maŋticne gâckewec. Iŋuc eme ŋicwofuŋzi ʒiŋuc âzâcnewec: “O Beletesaza, go guŋte me fuŋne mumure maŋge mi ŋemâckezejec.” Mume Beletesaza eki dâŋ ʒiŋuc bâtikiecnewec: “O bomboŋ‐nane, go guŋ manameŋ i qaisocgueŋgopieŋ jaŋerao fârinehec ezac â irec fuŋne i râsifâcge jaŋerao taniŋkezac!
20Jâc honemeŋ i sokarâ ʒora feku botâŋnezi sambâŋ âke uwame ŋic mâreŋ qaŋeŋnao jumbiŋ jaŋe honembiŋ.
21Erâ rehac‐ticne biaŋne â hândâŋne bocjaha irec ŋic sasawa nânâ bâfua‐jarewec, erâ kâte qowi jaŋe mumuc‐ticnao fomanambiŋ â tieŋnao wipe jaŋe waha herâ ŋembiŋ jâc irec fuŋne kecʒiŋuc:
22Jâc i ŋicwofuŋ go hâcne, go hâcne kâcɋene â tâpirihec, ʒâŋe biŋegezi ŋedâmârerâ sambâŋko fisikac â guriŋ bapa giegezi mâreŋ qaŋeŋne sâckekac.
23Erâ ŋicwofuŋ go ruc bapa ŋic tirine moczi sambâŋkonec waharâ dâŋ kecʒiŋuc mume hone manac emeŋ: ‘Jâc qâfierâ imackezemec, ehuc tucne fuŋgâtânehec ine mâreŋko behetec aeŋ me aeŋ bâbâroŋzi niŋgiŋkerâ basanaŋkeme kecɋaŋ gieo ŋezejec. Ehame maniŋ titikuczi bâŋgumuŋkeha qowi jaŋehec kecɋaŋ nâhuc juhame jara 7 tarazejec.’
24O ŋicwofuŋ, dâŋ kecirec fuŋne kecʒiŋuc fokac: I Femicne sâko ere mumupaŋ, i gore erâ fuakac.
25Go hâcne ŋicguruonec jâpecgupie kâte qowi jaŋehec ŋeŋe juju ecmu; erâ egarepie bulimakao iŋucne kecɋaŋ nâhuc juhaŋtec maniŋ titikuczi bâŋgumuŋguha jara 7 taraocmu. Iŋuc fuame ʒiŋuc mana taracmu: Femicne sâko e mâreŋ ŋicwofuŋ jaŋere Wofuŋ jukac jaha, ehuc uucmaŋ‐jeŋic i ŋic mocte meo râezo murâ râeocmu.
26Erâ jâctuc fuŋgâtânehec mâreŋkoa behetec ŋeocte mukicne dâŋ irec fuŋne kecʒiŋuc: Sambâŋ Wofuŋzi wiac sasawa irec guriŋne baekac, go iŋuc mana taracmuo ine uucmaŋzi fogareocmu.
27O ŋicwofuŋ, go irec hâcne dâŋnane mana maŋ ehuc juzemec. Go tiŋne juhuc sâqocne qikiŋne behec ezemec â bâʒâic‐jopakicne jaŋe ehâmo‐jarehuc hehesicge râpeckezemec. Go iŋuc ehuc dameŋ ʒora juhâc qâhâmocmu.”
28Wiac i sasawa ŋicwofuŋ Nebukaneza erao fârio qawec.
29Juku mosa 12 tarame Babe haeo erific‐ticnere bupu qaqadape bakicne ira rac warec ewec.
30Ehuc kecʒiŋuc muwec: “Ŋicwofuŋ hae sanaŋ‐nane erâ ŋeocte â ʒâŋe biŋe‐nane ferâ foocte tâpiri wânʒâŋ‐nanezi Babe hae sâko bapo ʒiŋe hâcne.”
31Ŋicwofuŋ e dâŋ iŋuc muha izia sambâŋkonec dâŋ moc kecʒiŋuc fuawec: “O ŋicwofuŋ Nebukaneza, gore dâŋ ʒiŋuc mukicne: Uucmaŋ i gowac rokicne.
32Irec ŋicguruonec jâpecgupie kâte qowi jaŋehec ŋeŋe juju ecmu; erâ egarepie bulimakao iŋucne kecɋaŋ nâhuc juhaŋtec jara 7 taraocmu. Iŋuc fua‐gareme ʒiŋuc mana taracmu: Femicne sâko e mâreŋ ŋicwofuŋ jaŋere Wofuŋ jukac jaha, ehuc uucmaŋ‐jeŋic i ŋic mocte meo râezo murâ râeocmu.”
33Dâŋ i fuaha izia Nebukanezarao fârinehec ewec. E ŋicguruonec jâpepie bulimakao iŋucne kecɋaŋ nâhuc juwec; ehame maniŋ titikuczi fuame sahac‐ticne bânâŋke‐fâreme qizec susuc‐ticnezi tucwipere suhuc tinac ewec â ʒârâic‐ticnezi wipe jaŋere ʒârâic iŋucne ewec.
34Eme dameŋ i tarame Nebukaneza no sambâŋko fipe feme maŋ mamanasu‐nane mocwâc uŋtome Femicne sâko, jujufâre hâcne, e araŋ bacnehuc muteŋ bâteŋ ecnepo. Ere uucmaŋzi hâcne fofo sanaŋ â guriŋ bapa gie‐ticne i mimiŋzi ɋâric foraʒihuc juocmu.
35Mâreŋte ŋecjucfâc jaŋe waha qaqane sasawa, irec sambâŋko tâpirihec jueŋgopieŋ me mâreŋko ŋec juc eeŋgopieŋ jaŋe iŋuc me iŋuc ejarezo murâ ejareocmu. Ehame moczi moc qataracnehuc dâŋ ʒiŋuc ââzâcnene mi fokac: “Go wemo wiac ekomec?”
36Dameŋ ijaha maŋ mamanasu‐nane mocwâc uŋtowec, erâ uucmaŋ‐nanere ʒâŋe biŋe omaezacte ɋuŋɋasaŋ â eri qaraweŋ‐nane mocwâc fuawec wâc. Eme kia sâko â soŋaŋ micnefâc‐nane jaŋe mocwâc maicnumbiŋ. Ehame ŋicwofuŋ gie hefârockerâ bahape tâpiri mocwâc fua‐narewec.
37Nebukaneza no irec hâcne sambâŋ Wofuŋ Sâko muteŋkekopac, erâ sâsehuc araŋ bacnekopac; e gie bapa‐ticne sasawa i fârine hâcne â hata‐ticne i tiŋne fokac. Maŋfefehec jueŋgopieŋ ŋic i jaŋe bawahac‐jopaekac.
