Text copied!
CopyCompare
Kâte Bible - Danie

Danie 8

Help us?
Click on verse(s) to share them!
1Belesaza e ŋicwofuŋ jume jara 3 eha Danie no maŋʒâŋe‐nane ŋerisieme wiac moc honepo; ine bâbâni wiac honepo irec râpenao honepo hâcne.
2Wiac kecʒiŋuc honepo: No Elam mâreŋko hae qizec Susa ira juhuc Ulai opâo domapo.
3Ehuc fipe rame lama ŋicne moc opâ mecnao domahame honepo. Lama ʒuŋene jajahec, erâ ʒuŋe jahec‐ticne i ʒoricne, moczi ine âgone sirickerâ domawec. Ʒuŋe ʒoricne eki ʒâhec ʒâhec wefu fisiwec.
4Eme lama ŋicne e ʒoaŋ huhunaopec mecne faicpec mecne â juwicpec mecne rahuc qowi gâcne hecjopaocte qiqizec qawec, ehame qowi moczi moc mi sanaŋkecnewec, erâ ere tâpirionec wiac moc babatarane mi ewec. E iŋuc me iŋuc ezo murâ ehuc sahac‐ticne muteŋkewec.
5Eme no wiac honepo i manasuhuc domahape mi ʒoaŋ huhunaonec noniŋ ŋicne moc mâreŋ sâko mâreŋ fotâcnerâ ware fisizejec i! Ehuc kikezi mâreŋ moc mi âte uawec. Erâ noniŋ e ʒâŋe jahec‐ticnere ŋondeŋko ʒuŋene kâcɋene moc mai jaha domawec.
6Eme noniŋ eki lama ʒuŋe jahec‐ticnehec opâmecko domahame honepo erao ʒocnehec gasackerâ rawec.
7Eme no honehape lama ŋicne aaric sâko manacnehuc bâqiŋkerâ hehuc lama ʒuŋe jahec‐ticne hezuwec. Ehame lama ŋicnezi sanaŋkecneocte tâpiri basawec. Irec noniŋzi mâreŋko hetuŋkehuc kikenezi wiriŋac hehame moczi moc ere tâpirionec lama babatarane mi ewec.
8Eme noniŋ ŋicnezi sahac‐ticne boc bafekume ʒuŋe‐ticne kâcɋene i herickeme dodomatac‐ticnao ʒuŋene 4 wefurâ mâreŋ qaŋeŋne 4 maicke‐fârerâ domambiŋ.
9Eme ʒuŋe domambiŋ jaŋeraonec mocte ombâŋko ʒuŋe piticne moc sohoc herâ wefuhuc mâreŋ juwicpec â ʒoaŋ wewefunaopec fokac i mecne erâ mâreŋ biaŋne i mâmâc maic‐jopahuc mâretec sokawec.
10Erâ soka feku mi sambâŋ momori jaŋerao fisizejec i! Fisirâ jaŋeraonec gâcne mecne, erâ bâpiŋ jaŋeraonec gâcne mâmâc mâreŋko hetuŋ‐jopame wahapie kikezi âtenʒaŋ‐jopawec.
11Jâmbomac, e sambâŋ momori jaŋere micne ere sâc bâfuaocte sahac‐ticne boc bafewec, ehuc ʒoaŋne ʒoaŋne taha bâzi rikecne jumbieŋ i sakarecnewec â tiri ufuŋ‐ticnere ŋeŋe hae i ima bawec.
12Sambâŋ momori jaŋe ere meo râec‐jopakicne, ehame ʒoaŋ sâc tiwâ bâzi rike jumbieŋ i qatara‐jarehuc mitio tiŋne juju â eebapa i qaisockehuc râsi ecnewec. Ehame gie‐ticnezi soka ŋedâmârec ewec.
13Eme no tiriŋic moczi dâŋ mume manapo, ehame tiriŋic âgone moczi dâŋ okacne bâtikiecnewec. Bâbâni dâŋ muwec eki ʒiŋuc muhuc âgone wiocnewec: “Ʒoaŋne ʒoaŋne tiwâ bâzi aka hehe â wiac mamakâcne ebac ee erâ tiri ufuŋ â hae mâreŋ biaŋne ima bapa maŋʒâŋezi honeŋgopeneŋ i mo dameŋko moc taraocmu?”
14Iŋuc wiocneme âgone dâŋ ʒiŋuc âzâcnewec: “Ŋafe furec 2 tauseŋ â 300 tarame wiac i taraocmu. Eme irec faicnao tiri ufuŋ mocwâc emasaŋkerâ bâpiaŋkeniŋmu.”
15Eme Danie no wiac hone manac epo i mana tarazore ehape mi wiac moc ŋic hawari iŋucnezi nore maio fuarâ domazejec i!
16Ehame ŋic moczi Ulai opâ mecnao domahuc dâŋ ʒiŋuc wirahuc mume manapo: “Gabirie, go ŋic keci wiac hone manac ejec irec fuŋne âzâcne mutâc etec mana tarazejec.”
17Eme Gabiriezi maŋfuŋnaneo warewec. Wareme hâwicnume ʒâŋe mai‐nanezi mâreŋko hetutuckerâ fopo. Eme eki ʒiŋuc nazawec: “Ŋicte ɋâric, go manac: Wiac hone manac emec i dameŋ tatarare biŋe ekac.”
18Eme eki dâŋ nazahame guŋzi qâmâcnume mâreŋko hetutuckerâ fopo. Eki ine wiwicnuhuc bafaharecnume domapo.

19Eme ʒiŋuc nazawec: “Manakic, dameŋ bakicne i taraocmu, irec no kimbeŋ dameŋ taraocmu ira wiac fuazokac i gaza mutâc epe.
20Lama ŋicne ʒuŋe jahec‐ticnehec honemec i Mede â Perisia jahere ŋicwofuŋ irec sâsâcne.
21Noniŋ ŋicnezi ine Grik mâreŋte ŋicwofuŋ irec sâsâcne; erâ ʒâŋe hândâŋ jahec‐ticnere ŋondeŋko ʒuŋe kâcɋene moc mai jaha domawec izi ŋicwofuŋ bâbâni fuarâ juocmu irec sâsâcne jaha.
22Eme ʒuŋe herickeme okacne ʒuŋe 4 wefumbiŋ jaŋere fuŋne i kecʒiŋuc: Ŋicwofuŋ bâbâni fuarâ juocmu ere uucmaŋzi tâtieme ŋicwofuŋ 4 fuarâ juniŋmu, mâc jaŋe ere tâpirire sâc mi bâfuaniŋmu.
23Eme dameŋ‐jeŋic tarazo eha sindaŋ boc ekupie ŋicwofuŋ pepecne â doc bapare fuŋne mamana moczi fuaocmu.
24E ŋic tâpiri sâkoheczi sisipiric sâko bâfua raocmu, ehuc wiac i me i ebac ezo murâ moc mi eipieocmu. E ŋic tâpirihec jaŋe mecne â tiri ŋic ŋokac mâmâc sipiric‐jopaocmu.
25E eatuc gie baocte dâŋ manasu biric ehuc ʒoɋac eme fârinehec eocmu. Erâ pepec penaroŋ ehuc ŋic bocjaha ututuŋ jaha sipiric‐jopaocmu. Eme juku fekicne jaŋere Femicne e wâc râsi ecneme ŋic tâpirizi mâcne, tâpiri moczi qanʒaŋneocmu.
26Ŋafe furec jahere dâŋ mufua‐garekicne i fârine jâmbâŋ, erâ sifu wiac hone manac emeŋ i fuaocte dameŋ ʒoricne fokacte mi mufuazemec.”
27Eme Danie no betaŋkerâ ʒoaŋ gâcnao huhucne enarewec; izi âke mâteŋnume faharerâ ŋicwofuŋ kiŋaŋ ʒuhuckerâ qacnepo, ehuc wiac hone manac epo irec ine warecke sâqorerâ fuŋne mi mana tarahuc jupo.