Atos 7:32-59

³²“Ritonõpo ase, atamurukõ esemy, Aparão, Izake, Jako. Emero oesẽkõme roropa ase,” tykase ynororo eya. —Morara kary etaryke tyya tykytyky tykase Moeze. Osenuhmara toehse ynororo tõserepyryke.

³³Morarame ynara tykase Ritonõpo eya, “Asapatũ touko jẽpataka oehtohme. Onoupyra awahtao orihnõko mase,” tykase ynororo eya. —Mame morara kary etaryke tyya tysapatũ touse eya. Mame ynara tykase Ritonõpo eya,

³⁴“Ypoetory tõ tuarimary enẽko ase Ejitupõkomo a. Morara exiryke oehno toto pynohse. Seromaroro aaropõko ase Ejitu pona,” tykase Ritonõpo Moeze a.

³⁵—Moeze mokyro ro. Apitoryme ise pyra toh kynexine repe tutuisarykõme. “Onoky omi poe upokato mano tuisame awahtao samo?” tykase toto eya. Yrome mokyro ro tyrise Ritonõpo a toto tuisaryme. Juteu tõ pynohneme tyrise ynororo Apotohtaonõpo a.

³⁶Morarame tarose ropa toto eya Ejitu poe. Tyjamitunuru tonepose roropa eya moroto Ejitu po, typoetory anaropopyra ropa Ejitupõkõ exiryke. Tuna purohpokuroko tarose toto eya. Moro tuna esety Tahpiremy. Mame ahno esao pyra 40me ikonopory taropose toto a, Ritonõpo jamitunuru enery poko roropa tyya xine. Tỹkyryneke pyra toto ahtao tỹkyrynehtose toto Ritonõpo a.

³⁷Mame Moeze ynara tykase Izyraeu tomo a, “Urutõ enehpõko Ritonõpo mana, kuekyrykomo, ysã exikety,” tykase Moeze pake tyekyry tomo a.

³⁸Moeze mokyro Ritonõpo poetory amorepahpono ahno esao pyra. Ritonõpo nenyokyhpyry maro roropa kynexine ypy po, Xinai po. Imaro tõturuse ynororo moro ypy po kytamurukõ netaryme. Eya Ritonõpo omiry tymerose, kyya xine ekarotohme roropa.

³⁹—Yrome aomipona se pyra kytamurukõ kynexine. Tymaro xine ise pyra toh kynexine ipunaka. Ejitu pona ropa toeramarykõ se ropa toh kynexine tukurohtao xine.

⁴⁰Arão a ynara tykase toto, “Ritõ tyriko Ritonõpo myakãme, kuesemazupurukõme aytotohme. Aza rokẽ nytoase Moeze, kuenepyhpõkomo Ejitu poe? Zuaro pyra sytatose,” tykase toto.

⁴¹Moroto tahtao xine pui mũkuru panõ tyrise toto a. Morarame kaneru tõ totapase eya xine uuru risẽ ẽpataka, “Kure mase,” katohme tyya xine. “Kuesẽkõme mosero nase,” tykase toto. Tãtãkyemase toto tynyrihpyrykõ poko.

⁴²Morarame mokaro turumekase Ritonõpo a, “Kuesẽkõme sero nase,” kary etaryke tyya. Mame xirikuato tõkehko roropa tyrise eya xine tosẽkõme. Ynara tymerose Ritonõpo omiryme pake urutõkomo a, “Izyraeu tomo, oekykõ mekarotone ya. Onekarorykõme oekykõ metapatone repe. Yrome ya pyra mekarotone. 40me ikonopory taropose oya xine oyoytorykohtao ahno hnakuroko.

⁴³Tapyi pitiko maromarotone kamisa risemy, ymyakãme onyrihpyrykõ tapyĩme, onohpetu tapyĩme Moroke tapyĩme. ‘Kuesẽkõme sero nase,’ matokene mokyro poko. Rẽpã roropa onyrihpyrykõ xirikuato panõ esẽme repe. Morara oexirykõke aarotorỹko ase mya Papironia pona,” tykase Ritonõpo eya xine.

⁴⁴—Kytamurukõ maro Ritonõpo tapyĩ kynexine, okyno pihpyry risemy, ahno esao pyra, typoko toto amorepatohme. Moeze a moro tapyi tyrise Ritonõpo omi poe, imaro tõturuse exiryke.

⁴⁵Moro tonehse kytamurukomo a xiaro pake tooepyrykohtao. Mame Jozue tõ tõsesarise ropa imehnõ esahpyry po, taropose morotõkõ exiryke Ritonõpo a. Morarame Tawi Izyraeu to tuisaryme toehse.

⁴⁶Ritonõpo omipona exikety ynororo kynexine. Tapyi amory se toehse repe Ritonõpo tapyĩme.

⁴⁷Yrome imũkuru a rokẽ tamose, Saromão a, Ritonõpo tapyĩme.

⁴⁸—Yrome imehxo Ritonõpo kapuaono. Tapyi tao nyhpyra mana, ahno nyrihpyry tao, tykase Exitewão. —Ynara Ritonõpo nekarohpyry sero poko pake urutonõpo a,

⁴⁹“Kapu esẽ ase, nono esẽ roropa. Otãto tapyi amõko matou ytapyĩme? Tapyi amõko matose repe, yrome upune pyra mana.

⁵⁰Ywy rokẽ Ritõme ase emero,” tykase Ritonõpo pake urutono a, tykase Exitewão mokaro a. Mame ynara tykase roropa eya xine,

⁵¹—Otato pyra matose, Ritonõpo omipona pyra. Zuzenu okorokarykõ se mã repe. Yrome ise pyra matose. Atamurukõ saaro matose.

⁵²Urutõkõ tyyryhmase atamurukomo a emero. “Ritonõpo mũkuru oehnõko mana,” kananõ totapase toto a. Mokaro saaro matose. Mokyro mexixihmatose tooehse ahtao.

⁵³Ritonõpo a tõmiry tokarose oya xine inenyokyhpyry tomo a repe. Yrome aomipona pyra matose, tykase Exitewão eya xine.

⁵⁴Morara kary etaryke tyya xine tyekĩtapãse toto. Exitewão ẽpataka tyerykõ totose toto a tynyetũkõke.

⁵⁵Yrome Ritonõpo zuzenu Exitewão maro kynexine. Kakoxi tõsenuhmase tahtao Jezu tonese kapu ao xikihme, Ritonõpo maro. Saerehkane konõto tonese roropa eya Ritonõpo ezurume.

⁵⁶Morarame ynara tykase ynororo, —Enetoko ke! Kapu enẽko ase tãtapiakase. Jezu Kyrixtu enẽko ase. Ahnome aexihpyry enẽko xikihme, Ritonõpo maro, tykase ynororo eya xine.

⁵⁷—Ajohpe mase! tykase toto. Toepanapuruse toto. Axĩ toytose toto tururume Exitewão apoise.

⁵⁸Pata ehpikoxi tarose toto a topu ke etapatohme. Morarame etapatohme tupõkõ tapoipose nuasemano a. Toto zupõ apoihpõ Sauru kynexine.

⁵⁹Mame topu ke totaparyhtao ro ynara tykase Exitewão, —Tuisa Jezu, kuaroko oesaka, tykase rokẽ ynororo.