Atos 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Morarame Pexitu Sezarea pata pona tooehse tahtao, oseruao rokẽ tynyhse moroto. Morotoino Jerusarẽ pona toytose ynororo.

²Moroto Ritonõpo maro oturuketõ tuisary tõturuse eya, imehnõ juteu tõ tuisary maro Pauru kerekeremãko. Ynara tykase toto Pexitu a,

³—Ajohpãme sã Pauru enehpoko xiaro Jerusarẽ pona, yna maro auturutohme, tykase toh repe, etapary se toexirykõke osema tao.

⁴Yrome Pexitu ynara tykase eya xine, —Pauru moroto rokẽ mana, Sezarea po. Okynã pyra morotona ytõko ropa ase.

⁵Ehmaropa oytorykõ se awahtao xine mokyro hxirose azahkuru aexiry poko, tykase ynororo eya xine.

⁶Morarame 10me tynyhse ahtao toytose ropa ynororo Sezarea pona. Yrokokoro porohtoh taka typorohse tahtao, Pauru tonehpose tyya.

⁷Mame Pauru tooehse ahtao Jerusarẽ poe aehtyã xikihme toehse toto. Itamurume Pauru hxirory se toh repe azahkuru aexiry poko.

⁸Yrome ynara tykase Pauru eya xine, —Ehxiropyra ase azahkuru pyra jexiryke. Moeze omihpyry omipona ase ipunaka. Ritonõpo tapyĩ onyjorokopara ase. Kowenu omipona roropa ase, tykase Pauru.

⁹Yrome topeme juteu tõ se Pexitu kynexine. Naeroro ynara tykase ynororo Pauru a, —Oytory se pyra Jerusarẽ pona mah, moero moxiã oturupotohme ya opoko? tykase.

¹⁰Yrome Pauru a tozuhse, ynara tykase ynororo, —Jytory se pyra ase. Taro ase amaro, kowenu terekatume oexiryke. Taro kure jekaropotohme kowenu tapyĩ tao. Juteu tõ onyryhmara exiase, zuaro ro mase.

¹¹Kowenu omipona pyra jahtao, imepỹ totapase ya ahtao jetapary se roropa exiry oya xine. Yrome imehnõ onyryhmara jahtao, jekarory se pyra ase eya xine, kowenu omipona jexiryke. Ĩperatu a kuaropoko, Seza a. Imaro rokẽ oturuse jytory se ase, tykase Pauru terekatu a.

¹²Mame tõturuxĩpo kõseriu tõ maro ynara tykase Pexitu Pauru a, —Seza a oytory se awahtao eya aaropõko ase, tykase.

¹³Morarame tuhke pyra tynyhse ahtao tuisa Akyripa tõ tooehse Sezarea pona, typyty maro, Pexitu maro oturuse. Ipyty esety Perenixi.

¹⁴Moroto tuhke tynyhse ahtao Pauru tokarose eya. Ynara tykase ynororo eya Pauru poko, —Orutua mã ãpuruhpyry tao, Perixi nynomohpyry.

¹⁵Jerusarẽ po jahtao Ritonõpo maro oturuketõ tuisary ipoko noturuase ya, juteu tõ tamuxiry maro etapapotohme repe.

¹⁶Yrome ezukuase toto, “Romanome ahtao onetapara ase, oturupyra ro awahtao xine imaro ynetaryme, aosepynohtohme. Imaro soturutatose aporo zuaro jehtohme,” ase eya xine.

¹⁷Morarame tooehse toto ahtao, yrokokoro yporotyase ekaropotohme. Pauru enehpoase ya.

¹⁸Yrome mokyro hxiroryhtao tyorõ poko tyhxirose eya xine.

¹⁹Tytamurukõ namorepatopõpyry poko rokẽ noturuase toto. Imepỹ poko roropa, Jezu poko. “Aorikyhpyry mokyro,” nase rokẽ toto. Yrome, “Orihpyra, tõsemãse ropa mana,” ãko Pauru.

²⁰Zuaro pyra jexiryke ynara ase Pauru a, “Oytory se pyra hma Jerusarẽ pona, moroto oturupotohme ropa ynetaryme, ohxirohpõkõ maro?” ase eya.

²¹Yrome, “Seza maro rokẽ jotururu se ase,” karyke ẽmapoase ropa Roma pona aropotohto Aukuxtu Seza pataka, tykase Pexitu.

²²Morarame Akyripa ynara tykase Pexitu a, —Mokyro otururu etary se ase, tykase Akyripa. —Kokoro etãko mase, tykase Pexitu eya.

²³Mame yrokokoro Akyripa tooehse kowenu tapyĩ taka Perenixi maro, kurã ke tupoke, typoetory tõ maro, soutatu tuisary tõ maro, pata esã roropa maro. Mame Pauru tonehpose Pexitu a.

²⁴Tooehse ahtao Pexitu tõturuse aporo. Ynara tykase ynororo, —Tuisa Akyripa, amarokõ roropa emero, mose orutua enetoko. Juteu tõ nyetunu Jerusarẽ po jahtao, taro roropa etapary se toh nexiase.

²⁵Mose kure rokẽ ya, yrome jehno juteu tõ exiryke aropõko ase Roma pona, Aukuxtu Seza maro auturutohme, imaro tõtururu se aexiryke.

²⁶Yrome otara ãko ha, pape poko imerõko, aropotohme Seza neneryme? Naeroro mose enehpono tarona ourutohkõme. Omoro nymyry oturuko imaro, tuisa Akyripa, zuaro jehtohme, pape merotohme ya.

²⁷Pauru aropory se ase repe, yrome azahkuru aexiry onenetupuhpyra jexiryke anaropopyra ro ase, tykase Pexitu.