Hechos 7:32-59

³²“Dios chõ se re. Ndei rerecua chõ se re. Abraham nderecua. Isaac abe rerecua no. Jacob abe rerecua no. Ũquɨ̃ nderecua ja chõ se re”, ɨ que Dios ra. Moisés que titi titi ɨ ra. Siquichete que mae ndocoɨ̃ erese ra.

³³Dios que ñeembe ee ra. “Ndeiyao esirõ na. Seturã ño se re. Sésaa ndeiyao esirõ.

³⁴Serimba rese aɨco mae mae mbeɨte Egíptoo co. Mbia ɨcuã tuchɨte ee. Mbia embasi mbasi beɨte. Amae mae mbeɨte que erese ra. Echeseo seo rese que aɨco mae mbeɨ ra. A achu erirõ sacuã a. Tasirõ eɨcuã sɨ cote. Eso Egíptoo. Taremondo Egipto cote”, ɨ que Dios Moisés je cote ra.

³⁵Dios que Moisés mɨngo mbia rerecuarã cote ra. Mbia rirõ sacuã Egipto sɨ. Mbae ɨcuã sɨ. Mbia que Moisés isi sereã nea nyii ra. “¿Aba nemɨngo urererecuarã nde?” ɨ que mbia Moisé je nyii ra. Ũquɨ̃ sɨ́ je que Dios Moisés mondo sɨ ra. Ererecuarã. Dios que tata rendi ite renda mbucheẽ Moisés je ra.

³⁶Moisés que mbia mae sayã saã saã nguia nandei je ra. Mbia mae sayã tubɨrɨãte que esaã saã nguia ra. Moisés que mbia curuchoɨ Egipto sɨ cote ra. Curuchoɨ que Ama Ɨreɨ̃ ndasa ra. Moisés que mbia quereco beɨ turuquia ruɨ ra. Cuarenta años. Mbia mae sayã tubɨ rɨãte que esaã saã nguia ra.

³⁷Ameɨ mose que Moisés ñee mbia je ra. “Dios ra jemo irabo ucheẽ mbuchecua sacuã jẽje. Seraanguia sɨ ra eirabo. ¡Aque cheẽ nda jemumbachɨ̃ jẽ!” ɨ que Moisés israelitas je ra.

³⁸Moisés beɨ chõ ngue ererecua ra. Moisés beɨ chõ ngue nandei quereco quia turuquia rɨ̃ ndesẽ. Ae je chõ ngue ángel ñee ndesẽ. Mbia chumunua mose Ibi Ibate Sinaí. Ibatenda mo ngue ñee ñee u Moisés je ra. Moisés que ñee ñee nandei je cote ra. Ibatenda cheẽ mbuchecua ee. Mbia mɨngosa cheẽ nenei nenei mbia je. Nandei je.

³⁹Nandei que Moisés cheẽ ñandu sereãte quia ra. Echeẽ mumba mumba. “Nyaso rei nyebi Egipto ae”, ɨ que equia ra.

⁴⁰Nandei que ñee ñee Aarón je ra. Moisés cutiã ngue ñee ñee ee ra. “Mbae raanguia mo esaã jiri ure je ae. Imagen. Urererecuarã. Ae je nda ureɨco ñee ñee jiri chã. Ae nda urererao Egíptoo chã. Moisés tiãte ure je cote. Ae urereru Egipto sɨ. Maranguiti chõ esɨ urerecha”, ɨ que mbia Aarón je ra.

⁴¹Nyebe que Aarón ticuasu raanguia raã ee ra. Imagen. Nandei que mbae ɨquia ɨquia ticuasu raanguia je ra. Eroo que emɨɨ ticuasu raanguia jii ra. Mendi que ee cote ra. Mbia ia tuchɨ que uchɨao rese cote ra.

⁴²Ũquɨ̃ ɨcuã tuchɨ que Dios je ra. Nyebe Dios huɨ nguiã nandei sɨ cote. Nandererecua, ɨ chõchɨ̃ mbia tenda je cote. Nyasi je abe no. Nyasi tata je abe no. Ũquɨ̃ je chõ mbia riquichɨ̃ ñee ñee. Ũquɨ̃ mose que Dios ucheẽ mbu cote ra. Dios cheẽ mbuchecuasa que Dios cheẽ senei senei mbia je ra. Co rei embesa ji co: Israelitas, ¿aba je jẽɨngo mbae roo mendi mendi cose re? Jẽɨngo mose turuquia cuarenta años mose. ¿Seje chõ jẽɨngo mbae roo mendi mendi cose re?

⁴³Tei. Seje eã ñene. Jenyɨao je chõ jẽɨngo mbae roo mendi resẽ. Tuchua ñetẽ jendaso raso beɨ chõchɨ̃. Mbae aingue raanguia resebe. Moloc, ɨ ee. Aque je chõ jẽɨngochɨ̃ nguiã ñee ñee. Seje ñee ñee ndocoɨ̃. Nyasi tata je abe jẽɨngochɨ̃ nguiã ñee ñee. Nyasi tata rei Refán mbae. Mbae raanguia jenyɨao je abete que jẽɨngo ñee ñee nda. Nyebe ra jaemondo jembae ibi sɨ. Babilonia ndobeɨ ra jaemondo. Mbia rimbarã nda jaemondo, ɨ que Dios nandei je cose ra.

⁴⁴Nandei que chɨ arete turúquiaa ra. Aque mos e que nandei riqui tuchua rurucuata beɨ cose ra. Mbae ɨre que tuchuarã cose ra. Aque tuchuaqui re que mbia riqui ndua ndua Dios rese ra. Dios que tuchua nyao uquia Moisés je ra. “¡Eɨ̃ ere chõ eao jẽ!” ɨ que Dios Moisés je ra. Dios cheẽ nduɨ sɨ tuchɨ que Moisés eao ra.

⁴⁵Moisés manonde que Josué nandei rerecua cote ra. Ae que nandei curuchoɨ turuquia sɨ cote ra. Ngasẽ nonde ibi mo je. Dios chɨmee, hue ibi je que ngasẽ cote ra. Nandei que guerra saã saã hue jenda je ra. Dios que mbia mombo ja hue jenda ra. Aque mose que nandei riqui tuchua ruruchoɨ beɨ ra. Tuchua, ɨ chõ nguiã mbae ɨre ao ji je. Aque tuchua que equereco beɨ quia ra. David abe mbia rerecua mose.

⁴⁶Dios que siqui tuchɨ David rese ra. David que ñee ee ra. “Tuchua cuasu tasaã ndeje”, ɨ rei ngue David Dios je re. Jacob nderecua rei Dios.

⁴⁷David ndiirĩ nguiatu que tuchua saã Dios je ra. Salomón, ɨ que eriirĩ je ra.

⁴⁸Mbia rã eã ndei Dios. Dios siquíã tuchɨ chõ nguiã tuchuaqui re. Mbia chɨaoqui re. Dios cheẽ mbuchecuasa que Dios cheẽ saã nda:

⁴⁹Se quia ererecua tuchɨ re. Ibatenda rerecua abe rei se. Ibi jenda rerecua abe rei se no. ¿Mañɨ nda mbia sechuchuarã ao re? Equi re ra aɨcoã ndesẽ.

⁵⁰Se quiatu que mbae achao ja resẽ, ɨ que Dios nandei je ra.

⁵¹Jeñɨa ɨcuã ñochɨ̃. Jẽisayã ñochɨ̃. Espíritu Turã jẽisiteã teã ñochɨ̃. Jendu rã sɨ chõ Espíritu Turã jẽisiteã teã ñochɨ̃.

⁵²Jendu ɨcuã beɨ que eriqui Dios cheẽ mbuchecuasa ja je ra. Jendu que Dios cheẽ mbuchecuasa ɨquia ɨquia beɨ quia ra. Ibatenda Turã nda tu, ae ɨ quia cose nae, ũquɨ̃ abe que jendu ɨquia ɨquia quia cose resẽ. Ibatenda Turã tu mose que jemee ñochɨ̃ nguiã mbia ɨcuã je ra. Eɨquia nonde que jemee ñochɨ̃ nguiã mbia ɨcuã je.

⁵³Dios que ángeles mbu rei jẽje ra. Ucheẽ nderu raque jẽje. Jẽ echeẽ mumbayã sacuã. Echeẽ ngue jemumba mumba beɨ chõchɨ̃ nguiã, ɨ que Esteban ñee oco tuchɨ ee ra.

⁵⁴Eandusa que paama ɨ tuchɨ Esteban je ra. Esteban ɨ quia serɨ̃.

⁵⁵Espíritu Turã ngue siqui tuchɨ Esteban ndese ra. Esteban ngue mae tuchɨ ibei rese mbia paama ɨ mose ee ra. Dios Turã ndese que mae ibate ra. Jesús rese abe que mae nda. Jesús que chɨ̃ juã Dios ji ee ra.

⁵⁶Esteban ngue ñee nda. —Jemae jẽ. Ibei nyɨequia rese aɨ̃ mae a. Huee mbia rucucha ñɨ juã Dios ji huee. Huee Jesús ñɨ juã Dios ji huee, ɨ que Esteban nda.

⁵⁷Mbia que tasẽ tasẽ tuchɨ paama ɨ ra. Huisacua que emɨtao ja Esteban ñee sɨ ra. —Nandecua recua erese, ɨ que o oe Esteban ndese ra.

⁵⁸Mbia que Esteban curuchoɨ sucha tubɨrɨã sɨ ra. Huee que sɨta mombo mombo erese ra. Sɨta mombo mombosa que huɨɨrao mbuɨ mbuɨ acuanɨndu mo je ra. —Esaarõ, ɨ que ee ra. Saulo, ɨ que eɨeɨrao raarõsa je ra.

⁵⁹Mbia que sɨta mombo mombo Esteban ndese ra. Sɨta mombo mombo mose que Esteban ñee Ibatenda je ra. —Aque aso quia ndeje aque, Sererecua Jesús. Seisi cote, ɨ que Esteban Ibatenda je ra.