Atos 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Morarame Peturu toytose João maro Ritonõpo maro oturutoh taka Ritonõpo maro tõturutohkõme. Xixi tywykahme toehse ahtao toytose toto.

²Mame toytorykohtao, ytoytopỹ tonese toto a. Moinoro morara tonuruse ynororo ytoytopỹmero. Kokoro rokẽ arosene toto onao Ritonõpo tapyĩ pota taka, tineru apoitohme eya. Moro omõtoh Kurãme tosehpase kynexine.

³Mokyro a Peturu eneryhtao João maro, toto ytoryhtao, tineru tokaropose eya.

⁴Mame kurãkara tonese tyya xine ahtao ynara tykase Peturu, —Xiaro kueneko, tykase Peturu.

⁵Mame tõsenuhmase mokyro. Tineru pitiko eraximane.

⁶—Tineru pyra ynanase. Yrome tyoro ekarõko ase oya. Owõko. Xikihme exiko. Jezu Kyrixtu okurãkãko ropa mana, Nazarepono, tykase Peturu eya.

⁷Mame kurãkara xikihme tanỹse emary poko Peturu a. Ipyrakũ toekurãkase ropa.

⁸Pyhsekyh tykase ynororo. Xikihxikihme toytoytose ynororo toekurãkase ropa toexiryke. —Kure Ritonõpo mana, tykase ynororo. Peturu tõ maro tomõse ynororo Ritonõpo maro oturutoh taka. Tãtãkyemase ynororo. Pyhsekyhsekyh tykase.

⁹Morotaõkõ tutuarõtase kuranõpokara ytoytory eneryke tyya xine, “Kure Ritonõpo,” kary etaryke roropa tyya xine tutuarõtase toto. —Mose ytoytopynỹpo, tineru eraximahpõ sero pota tão toekurãkase ropa, tykase toto.

¹¹Tõsenuruhkase toto mokyro eneryke tyya xine. Ritonõpo maro oturutoh taka omõtoh Saromão tapyĩme tosehpase. Moro tão Peturu kynexine João maro. Mokaro onurumekara aekurãkahpyry ropa toehse. Moro taka toytose toto emero, enese. —To! Kure matose, tykase toh eya xine.

¹²Morarame morohnome aepyrykõ eneryhtao tyya ynara tykase Peturu, —Orutua komo, wekyry tomo, serara ekurãkano onenepitopyra hmatou? Jezu rokẽ mose kurãka ropa, yna kara, kypyno xine toexiryke.

¹³Ritonõpo kytamurukõ esemy, Aparão esemy, Izake te, Jako, enara. Emero Kuesẽkõme roropa mana. Mokyro a Tumũkuru kuesẽkõme tyrise, onurumekahpyrykomo, Jezu, onekarohpyrykomo Pirato a exixihmatohme. Exixihmapory se pyra Pirato repe.

¹⁴Yrome aomipona pyra oya xine toxixihmase Jezu, tyyrypyhpykẽ kara. Inetapatahpyry rokẽ mutũtanohpoatose ropa.

¹⁵Kyrihpõkõ mũkuru mexixihmatose repe. Yrome Jumy a tõsemãkase ropa. Moro poko otuarõtanohtorỹko ynanase tonese ropa yna a exiryke tõsemãse ropa ahtao.

¹⁶Mokyro poe mose nekurãka ropa. Mose enẽko matose, Jezu nukurãkahpyry ropa. Tonetupuhse toexiryke Jezu nukurãka ropa, tykase Peturu.

¹⁷—Wekyry tomo. Awaro xine ase. Jezu exixihmahpõkõ matose, tuaro pyra oexirykõke, oesẽkõ maro.

¹⁸Pake Ritonõpo a tõmiry tymeropose urutõkomo a Jezu poko, aetuarimary poko, aorikyry poko, ẽsemãkapory ropa poko tyya. Ajohpe pyra ro Ritonõpo nexiase, tykase Peturu mokaro a.

¹⁹—Oorypyrykõ irumekatoko. Jezu eahmatoko oesẽkõme aehtohme, oorypyrykõ korokatohme eya,

²⁰tãkye oehtohkõme ipoko. Imeĩpo Jezu Kyrixtu enehpõko ropa Ritonõpo mana tarona, Kuesẽkõme, tykase Peturu.

²¹—Kapu ao eraximãko mana tonehpory ropa Tumy a. Tooehse ropa tahtao, kukurãkatorỹko ropa mana. Moro poko tymerose pake Ritonõpo poe urutõkomo a.

²²Moeze a ynara tymerose, “Kuekyrykõ enehpõko mã Ritonõpo, ysamo, ourunekõme. Aomipona ke ehtoko.

²³Aomipona pyra exiketõ enahkapõko mã Ritonõpo.”

²⁴Morara tymerose urutõkomo a pake. Samueu tomo a morara tymerose senohne poko, onenehpyrykõ poko.

²⁵Samueu tõ ekepyã pakomotyã matose. Opoko xine kynoturune Ritonõpo atamurukomo a. Ynara tykase ynororo eya xine, “Apary rĩko ase sero nonopõkõ kurãkaneme,” tykase Ritonõpo Aparão a.

²⁶—Naeroro Tumũkuru enyohne kyya xine Kuesẽkõme, kuatãkyematohkõme kyyrypyrykõ korokaryhtao eya, tykase Peturu eya xine.