1—Wekyry tomo, kuetatoko pahne. Ehxiropyra ase ynyrihpyry poko ynamorepatyã poko, enara.
2Mame juteu omiryae Pauru otururu etaryke tyya xine tymynyhpãse toh emero. Mame Pauru tõturuse ropa.
3—Juteu ase, tonuruse ywy Tasu po, Xirixiapõ po. Yrome tuãtanohse ywy sero pata po Jerusarẽ po. Tamorepase ywy Kamarieu a. Zae jamorepane kytamurukõ omihpyry poko. Orẽpyra Ritonõpo omipona jexiry se exiase asã xine.
4Jezu poetory zehno exiase roropa. Itapyĩkõ taka ytoase toto apoise, arotohme ãpuruhpyry taka, orutua komo, nohpo tomo, enara. Aorihmaporykõ se exiase.
5Ritonõpo maro oturuketõ tuisary zuaro mana, ajohpe pyra jexiry waro. Mokaro roropa tamuxi tõ ajohpe pyra jexiry waro mã toto. Tynymerohpyrykõ tokarose ya arotohme Tamaxikupõkomo a, Jezu poetory enehtohme ropa ya tymyhse, Jerusarẽ pona, toto ẽmapotohme ãpuruhpyry taka.
6—Morarame jytoryhtao Tamaxiku pona, Tamaxiku moe pyra ahtao, tãxiahtao, kaino jetonie saereh nase.
7Nono pona epukase. Omi etase. Ynara nase, “Sauru, Sauru, oty katoh ypoetory tõ ryhmãko mah? Samũ kamexipõko mase ya,” nase.
8—“Onoky hma?” ase eya, oserepyase. —“Ywy ase Jezu Nazarepono. Oty katoh ypoetory ryhmãko mah?” nase ynororo ya.
9—Ymarõkõ noserepyase roropa saerehkary eneryke tyya xine. Yrome aomiry onetara toto.
10Mame ynara ase, “Oty poko ha?” ase eya. —“Owõko ropa xikihme,” nase ynororo. “Ytoko Tamaxiku pona. Moero awahtao ypoetory enyohnõko ase ãmorepase jomiry poko,” nase ya Jezu.
11—Morarame ezuru a tonukehkase jexiryke, jaroase toto jemary poko, Tamaxiku pona.
12Moroto jahtao Anania noepyase ya. Mokyro, Moeze nymerohpyry omipona exikety. Mokyro poko, “Kure,” ãko juteu tõ emero.
13Mokyro tooehse ahtao ya ynara nase, “Sauru jakorony, oenutako ropa,” nase ya. —Morara tykase exiryke osenuhmase ropa. Anania enease.
14Ynara nase ropa Anania ya, “Ritonõpo, kytamurukõ esẽ, omenekase typoetoryme oehtohme, tõmipona roropa oehtohme, Tumũkuru kurã enepotohme oya, aomiry etapotohme roropa oya.
15Imehnõ tuarõtanohpõko mase enetopõpyry poko oya, aetatopõpyry poko roropa oya.
16Seromaroro oty eraximãko hma osẽpurihkapopyra, Ritonõpo a oorypyry korokatohme, Jezu Kyrixtu oesẽme ehtohme,” nase Anania ya.
17—Morarame tarona tooehse ropa jahtao, jotururuhtao Ritonõpo maro, imaro oturutoh tao, juaroro Jezu enease. Ymaro noturuase. Ynara nase ya, “Axĩ ke mya ytoko Jerusarẽ poe. Tarõkõ õmiry etary se pyra exĩko toh mana, ypoko õtururuhtao,” nase Jezu ya.
19—Yrome ynara ase eya, “Tarõkõ juaro nase toto. Opoetory zehnotonõpo ase. Atamorepatoh tae aroase toto ãpuruhpyry taka. Zuaro nase tarõkomo.
20Exitewão etaparyhtao etapananõ maro exiase, zupõkõ apoĩko. Imehnõ tuarõtanopyhpõ opoko ynororo kynexine. Tãkye exiase mokyro etaparyhtao eya xine,” ase eya.
21—Yrome ynara nase ropa ynororo ya, “Ytoko. Aaropõko ase mya juteutõkara a,” nase Jezu ya, tykase Pauru juteu tomo a.
22Morara kary etaryke tyya xine Pauru zehno toehse ropa toto, “Juteutõkara a aaropõko ase,” kary etaryke tyya xine. —Mose etapatoko! Popyra nase, tykase juteu tomo soutatu tomo a.
23Pauru zetũke tõtupokase toto. Nono ke sapararah tykase roropa toto.
24Morara exiryke Pauru taropose koroneu a soutatu tõ tapyĩ taka. —Mose ipipohtoko, tykase ynororo soutatu tomo a repe, orẽpyra juteu tõ sekere karyke Pauru poko.
25Yrome tymykyryhtao ynara tykase Pauru sajẽtu a, —Romanome jexiryke ypipohpyra exiko kowenu omipona, jyhxiropyra imehnõ exiryke terekatu ẽpataka, tykase ynororo.
26Morara tykase exiryke sajẽtu toytose koroneu a oturuse. —Onypipohpopyra exiko. Romanome mokyro, tykase ynororo koroneu a.
27Morarame koroneu toytose Pauru a oturuse. —Etako pahne, ajohpe pyra romanome mahno? tykase. —Ỹ, romano ase, tykase Pauru eya.
28Mame koroneu ynara tykase Pauru a, —Tuhke tineru ekaroase kowenu a romanome jehtohme, tykase ynororo. —Yrome ywy romanome jenurune, papa romanome exiryke, tykase Pauru eya.
29Morarame Pauru turumekase toto a. Onypipohpyra tokurehse toto. Mokyro koroneu tõserehse, romano tymyhse typoetory a exiryke, ipipohpory se toehse toexiryke roropa. Romano kowenu omiry ynara ãko, “Romano onypipohpyra ehtoko,” ãko.
30Yrokokoro Pauru tymyhpokapose ropa eya. Ritonõpo maro oturuketõ tuisary tonehpose tamuximãkõ maro tõturupotohme eya xine. “Oty pokoino juteu tõ mose zehno nae?” katohme eya xine. Mame toto ẽpataka Pauru tonehse eya auturutohme.
