3 John 1

1

¹Re babyor ney e yib rok e en nib ilal — Ngak Gayus ni be’ nrib t’uf rog.

²Fager rog ni gab t’uf rog, gu be meybil ngak Got ni ngu’um par ni bfel’ rogom, ma dariy e lily rom — ni bod rogon ni gu manang ni bfel’ lanin’um.

³Ri gu felfelan’ ko ngiyal’ ni ba’aram ni taw boch pi walagdow ni girdi’en Kristus miyad yog rogon fanam yul’yul’ ko tin nib riyul’ — ni bod ni ga ma par ni gubin ngiyal’ ni ga ma fol ko tin riyul’.

⁴Dariy ban’en nrib gel e felfelan’ nra pi’ ngog ko bin ni nggu rung’ag murung’agen pifakag ni yad be fol ko tin riyul’.

⁵Fager rog ni gab t’uf rog, ri gab yul’yul’ ko maruwel ni ga be rin’ ni fan ngak e pi’in walagdow ni girdi’en Kristus, ni mus ngak e pi’in nda mu nang owcherad.

⁶Kar weliyed rogon farad t’uf rom ngak girdi’en e galesiya nu roy. Wenig ngom, mu ayuwegrad nge yag nranod ko milekag rorad nrogon nib m’agan’ Got ngay.

⁷Ya ra milekaggad ni yad be muruwliy e maruwel rok Kristus, mdar paged e pi’in nde mich Kristus u wun’rad ngar pi’ed e ayuw ngorad.

⁸Ere gadad e pi’in girdi’en Kristus e thingar da ayuweged e pi girdi’ nem, ni aram e kad uned ko maruwel ni yad be ngongliy ni fan ko tin riyul’.

⁹Kug yoloy bangi babyor ngak girdi’en e galesiya nib ngoch e thin ni bay riy; machane Diotrefes, ni be’ ni ba’adag ni ir e nge yog e thin rorad e dabun ni nge fol ko thin ni kugog.

¹⁰Bay gub mu gu weliy ngomed urngin ban’en nike rin’: ni pin’en nib kireb nike yog ni murung’agmad nge urngin e tin ni be yog nde riyul’! Machane gathi kemus ara’; ya bmuduwgil ni gathi bayi changar ngak e pi’in walagdow ni girdi’en Kristus ko ngiyal’ ni bay rabad, ma ku bayi taleg e pi’in yad ba’adag ni ngar ayuweged yad, ma bayi guy rogon ni nge chuwegrad u lan e galesiya!

¹¹Fager rog ni gab t’uf rog, dab mu folwok ko tin nib kireb, machane ngam folwok ko tin ni bfel’. En nma rin’ e tin ni bfel’ e ir reb i girdi’en Got; ma en nma rin’ e kireb e dawori guy Got.

¹²Urngin e girdi’ ma yad be yog ni bfel. Ma ku er rogomad ni gamad be micheg e re bugithin nem, ma ga manang ntin ni ku gogned e ba riyul’.

¹³Bo’or e thin ni gu ba’adag ni ngog ngom, machane dabug ni nggu yoloy ko pen nge tinta.

¹⁴Ya gu be finey ni nggub ni kane’ ngad nonow nga ta’bang.

¹⁵Ngi i par e gapas rom. Urngin e pi tafager rom ni be lungurad e ngi i falan’ Got ngom. Urngin e pi tafager rodow ni nge bagayad ma ga yog ngak ni kugog ni ngi i felan’ Got ngak.