3 ዮሃኒሳ ኪታ 1

1

¹ታኒ ኣማኒያዋንታ ካሌꬂያ ጪማይ፥ ቱሙ ሲቂያ ታ ሲቁዋ ጋዮሳው ሃ ዳቢዳቢያ ፃፋይ።

²ታ ሲቆ፥ ኔኒ ፆሳና ዴዒያ ዴዑ ሎዓ ጊዲያዋ ታኒ ኤሪያዋዳን፥ ኔና ኣያዪኔ ዋዪሴና ማላኔ ቃሲ ኔ ኣሳቴꬃይ ፓፃ ጊዳና ማላ፥ ፆሳ ዎሳይ።

³ኣዪሲ ጎፔ፥ ኣማሬዳ ኢሻቱ ዪዴ፥ ኡባ ዎዴ ኔኒ ቱማቴꬃን ዴዒያዋኔ ኔ ቱማቴꬃባ ማርካቴዳ ዎዴ፥ ታኒ ዳሮ ናሼታዲ።

⁴ታ ናናይ ቱማቴꬃን ዴዒያዋ ሲሲያዋፔ ኣꬊዴ፥ ታና ናሼቺያባይ ባዋ።

⁵ታ ሲቆ፥ ኑ ኢሻቱ ኢማꬃ ጊዶፔካ፥ ኔኒ ኡንቱንቶ ኦꬂያ ኦሱዋ ኡባን ኣማኔቴዳ ኦሱዋ ኦꬃዳ።

⁶ቃሲ ኡንቱንቱ ኔ ሲቁዋባ ኣማኒያ ኣሳቶ ማርካቴዲኖ፤ ኡንቱንቱ ቃንፄናን ባሬ ኦጊያ ባና ማላ ፆሳይ ዶሲያዋዳን፥ ኔኒ ሎዖባ ኦꬃዴ ኡንቱንታ ማዳሪኪ።

⁷ኣዪሲ ጎፔ፥ ፆሳ ኣማኔናውንቱፔ ኣዪኔ ኣኬናን፥ ኪሪስቶሳ ሱንꬃ ዲራው ኬሴዲኖ።

⁸ሄዋ ዲራው፥ ኑኒ ቱማቴꬃ ኡንቱንቱና ኢቲፔ ኦꬃና ማላ፥ ሃዋንቱ ማላ ኣሳቱዋ ማዳናው ቤሴ።

⁹ታኒ ኣማኒያዋንቶ፥ ዳቢዳቢያ ፃፋዲ፤ ሺን ኡንቱንቱ ካፑዋ ጊዳናው ኮዪያ ዲዮቲራፊሴ ኑኒ ጊያዋ ኣኬና።

¹⁰ሄዋ ዲራው፥ ታኒ ያ ቢያ ዎዴ፥ ኢ ኑ ቦላን ሃሳዪያ ኢታ ሃሳያኔ ኢ ኦꬄዳ ኦሱዋ ሂንቴንቶ ኦዳና፤ ቃሲ ኢ ሄዌ ጉፄዳ ጊዴ፥ ኑ ኢሻቱ ዪያ ዎዴ ሞኬና፤ ሃራይ ኣቶ ኡንቱንታ ሞካናው ኮዪያዋንታካ ዲጊዴ፥ ኣማኒያዋንቱ ጊዶፔ ኬሴ።

¹¹ታ ሲቆ፥ ሎዖባፔ ኣቲን፥ ኢታባ ማላቶፓ። ሎዖባ ኦꬂያ ኦኒኔ ፆሳ ኣሳ፤ ሺን ኢታባ ኦꬂያ ኦኒኔ ፆሳ ኤሬና።

¹²ዲሜፂሮሲ ሎዓ ጊዲያዋ ኣሳይ ኡባይ ማርካቴ፤ ቱማቴꬃይ ባሬ ሁጲያንካ ኣባ ማርካቴ። ኑኒካ ቃሲ ኣባ ማርካቴቶ፤ ኑ ማርካቴꬃይ ቱማ ጊዲያዋ ሂንቴካ ኤሪታ።

¹³ታኒ ኔው ፃፋናው ኮዬዳ ዳሮባይ ዴዔ፤ ሺን ዋራቃታኒኔ ቃላሚያኒኔ ፃፋናው ኮዪኬ።

¹⁴ሺን ታኒ ማታን ኔናና ጋኬታናው ቆፓይ፤ ሄ ዎዴ ኑኒ ጋኬቲዴ ሃሳያና።

¹⁵ሳሮቴꬃይ ኔናና ጊዶ። ኔ ዳባቱ ኔና ሳሮ ሳሮ ያጊኖ። ኑ ዳባቱዋ ኡባ ኡንቱንቱ ሱንꬃ ሱንꬃ ፄሳዴ፥ ታና ሳሮ ሳሮ ጌዳ ያጋ።