3. Johannes 1

1

¹Ngang ewe Souakom üa kapong ngeni en chienei mi achengicheng Kaius, en ewe üa wesewesen echenuk.

²En chienei mi achengicheng, üa iotek pwe kopwe feiöch lon mettoch meinisin, pwe inisum epwe pöchökül, usun üa fen silei pwe ka pöchökül lon pekin ngünum.

³Üa fokun pwapwa lupwen ekoch pwiich kewe souläng ra war o ra apworausa ngeniei usun om allükülük lon ewe let, usun chök ka manaueni ewe manauen let fansoun meinisin.

⁴Esap wor och a apwapwaei me lükün ai rongorong pwe nei kana ra manaueni ewe manauen let.

⁵En chiechiei mi achengicheng, ka allükülük lon ewe angang ka föri fän iten pwiich kewe souläng, inamwo ika ir chon ekis.

⁶Ir ra apworausa ngeni chon ewe mwichefel ikei usun om tongeer. Kose mochen kopwe alisiir, pwe repwe tongeni sopwela ar sai lon met epwe apwapwai Kot.

⁷Pun ra feila o saifetal fän iten ewe angangen Kraist, nge resap angei och alilis seni ekewe chon lükün lamalam.

⁸Iei mine oukich souläng sipwe fokun alisi ekei sokun aramas, pwe ina ach alilis lon ar angang fän iten ewe let.

⁹Ngang üa makkei echö toropwe ngeni mwichefel, nge Tiotrefes, ätewe mi mochen an epwe nemenem, esap aüseling ngeni met üa apasa.

¹⁰Iei mine lupwen üpwe war, üpwe pwärätä meinisin mine a föri: ekewe mettoch mi fokun ingau a apasa usuch me an kapas chofona. Nge esap ikei chök mine a föri, esap pwal etiwa pwiich kewe souläng lupwen ra war. A fen mwo nge pinei chokewe mi mochen etiwer o atorowu seni lon ewe mwichefel.

¹¹En chienei mi achengicheng, kosap apirü mine a ngau, nge kopwe apirü mine a öch. Eman mi föri mine a öch i nöün Kot, nge eman mi föri mine a ngau esap silei Kot.

¹²Aramas meinisin ra kapasöch usun Temetrius, pwal ewe let a kapasöch usun i. Iwe, pwal iei usun mine kich sia pwärätä o oua silei pwe met sia apasa a let.

¹³A wor chomong mine üa mochen ürenuk, nge üsap mochen makkei ngonuk lon toropwe ren ink.

¹⁴Nge üa apilükülük ai üpwe müttir churuk, pwe sipwe püsin kapasfengen.

¹⁵Kinamwe epwe nonom reöm. Chiechiom kewe souläng meinisin mi nom ikei ra kapong ngonuk. Kopwe kapong ngeni chiechiach kewe souläng meinisin mi nom ikenan.