3 Zone 1

1

¹Arau na koimata pa ekelesia si kubere atu nia sa qua leta hie koa goi na qua baere, Qaeasi, sapu tataru nia rau koasa hinokara.

²Qua baere soti; sa qua vinaravara si pude mamu tava leseve si goi koari doduru tinasuna pa mua kinoa, meke pude toa valeana si goi pa tinimu kekeṉoṉo gua sapu gilana gunia rau sapu toa valeana tugo si goi pa maqomaqomu.

³Qetu hola si rau totoso avoso nigo rau koari kaiqa tie pa ekelesia sapu korapa turu va ṉiṉira pa mua rinaṉeraṉe si goi koasa hinokara, meke sapu korapa toa pa hinokara si goi doduru totoso.

⁴Sa qua qinetuqetu sapu noma hola ni doduru tiṉitoṉa pule si sa inavoso sapu sari qua koburu koe Karisito pa ekelesia si korapa ene pa hinokara.

⁵Qua baere soti, ta ronuemu hola si goi koasa mua tinavete koari na tamatasi pa ekelesia, meke gua tugo koari na tie karovodi.

⁶Ele tozi vura nia rini koari na tiena sa ekelesia sa mua tataru. Leana, mamu toka zoṉazoṉa ni tu pa dia inene pa hahanana sapu variva qetu koasa Tamasa.

⁷Sina ene la si arini koasa ninabuluna e Karisito, meke loke tinokae si vagia rini koari na tie pu lopu va hinokaria se Karisito.

⁸Garo tugo si gita na tie te Karisito pude toka ni sari na tie pa ekelesia pude mada tavetavete somanae koa rini koasa hinokara.

⁹Keke leta papakana si ele kubere la nia rau koasa butubutu tie te Karisito, ba se Dioterepasi sapu hiva koa na ṉati hiniva koa rini, si lopu hiva va taliṉa la i sa sari na qua zinama pa leta.

¹⁰Pana atu rau si kote tiqu la i rau sari doduru gua pu evaṉi sa: sari nana zinama ṉoṉovala mae koa gami, meke sari nana kinohakoha pu tozi sa! Meke lopu arini mo, ba sapu lopu hiva va kamoi sa sari na tie te Karisito be mae sarini. Meke hukati tugo sa sarini pu hiva va kamoi sari na tie te Karisito, meke hiva hitu pani tugo sa koasa puku tie te Karisito si arini.

¹¹Ego, Qaeasi; qua baere soti, mu lopu luli saripu kaleadi ba mu lulia sa lineana. Sa tie sapu tavete va toṉoto si te Tamasa tugo si asa, ba sa tie sapu tavete va kaleana si lopu gilania sa sa Tamasa.

¹²Ba se Demitiriasi si zama valeana hola ia ri doduru tie te Karisito sina sa Maqomaqo hinokara si ta dogoro vura koasa lineana pa nana tinoa. Meke gami ba somana va sosodea tugo pa mami zinama, meke gilania mua goi sapu gua pu tozia gami si hinokara tugo.

¹³Soku tiṉitoṉa si hiva tozi rau, ba lopu hiva kuberi rau pa leta.

¹⁴Rovea rau si kote lopu sana atu dogorigo mo rau, mada vari vivinei soti teleda.

¹⁵Mani koa koa goi sa binule. Sa dia tataru koa goi gua sari mua baere hire. Mu hopeke tozia mami tataru koari mami baere vasina.