3 Ioanes 1

1

¹Mu lohoka nau, iau a gare na lotu. A here lakene vomu, o Gaius. A ngaru ioe na hategu.

²Turagu, a vasileki na Vure, go made kamumu, i uka ma go giloa, ge kinigao kunana a kakaimu, i manga a hini a hanumu i kinigao turana Vure.

³E huriki a turane hita ri valai ri vakalongo iau, ta o ramai kamumu a ngava muholi. A longoa a ngava iea, a vivi hateka. I muholi, o ramai vakaroro a ngava muholi.

⁴Na tahuna a longo e huriki a koma nau ri ramai a ngava muholi, a vivi hateka.

⁵Turagu, i kamumu o matakari e huriki a tara na Vure ri havai mua. I uka ma o lohoka ne ria, pali o ramai kamumu a ningaru na Vure na tahuna o matakari ria.

⁶E huriki ranga ne ria ri bele pali koea. Ri vakalongo koea e huriki a tara na Vure, a naro kamumu o rata virihi ria vona, o ngaru hateka ria. A ngaru go tabana ni tuhori e huriki a bakovi maea, na naro a Vure ge vivi vona, ri gi laho tala,

⁷a vuhuna ri laho tala ni taki tala a rane Kristo. Ri koi ni bole a kinori ne huriki i uka ma ri lohoka na Vure.

⁸I mavonga, si gi do rike e huriki a bakovi ri leho maea. Bara si rata mavonga, bara si leho turane ria ni taki tala a ngava muholi.

⁹A herea pali tara raukea i lakea ne huriki a tara na Vure vonga. Pali e Diotrepes i rata polo muga muga. I uka ma i longo mai a nitane mia.

¹⁰I mavonga, na tahuna a bele iene, bara taki tala ne huriki a narona. I padimomo mia na ngava hale tavula. I uka ma i ngi kunana. I marikoi ni tagui e huriki a turane hita ri bele ne mua. Pali e huriki ranga ri ngaru ni tagui ria, i pupukari ria, i lili tala ria na vaponga na Vure.

¹¹Turagu, naha ni ramai a naro hale. O ramai a naro kamumu. E rei a viri i rata a naro kamumu, ia a bakovi na Vure. Pali e rei a viri i rata a naro hale, i uka ma i masia a Vure.

¹²E huriki lobo ri taki tala a naro kamumu ne Demitrius. A nita muholi na Vure tara i taki tala a naro kamumu vona. Mia ranga, mi taki tala vona a naro kamumu vona. Ioe o lohoka ne mia, a ngavane mia i muholi.

¹³A ngava i kupo ta ga here lakene vomu, pali a koi ni here.

¹⁴A ngaru i uka ma ge tabaka, ga lakene, ga matai ioe, tu gu vata.

¹⁵O made na nivalemu. E huriki e turane tarua ieni ri talo rike a haro kamumu vomu. A haro kamumu ne huriki e turane tarua iene.