1Naaman Sirianↄ kína zĩ̀kpɛɛnↄ dↄn'aɛdee ũ. À bɛ̀ɛ vĩ a dii ↄzĩ bensↄ̃ à tↄ́ bↄ̀, zaakɛ à gãzĩn Dii tò Sirianↄ zĩ̀ blèzi. Nɛ́gↄ̃gbɛ̃mɛ zĩ̀ guu, mↄde à kusu kũ̀.
2Gurↄↄ kɛ̀ Siria zĩ̀kari gbãamↄnnɛrinↄ gàa Isarailinↄ bùsun yã, aↄ̃ nɛ́nↄkparɛ ke kũ̀, ben à gↄ̃̀ Naama naↄ̃ zĩkɛri ũ.
3Ben nɛ́nↄkparɛ pì bè a diinɛ: Tó wa bɛdee é fↄ̃ à gá annabi kɛ̀ kú Samaria kiia yã, lɛ à à kɛ̃̀kↄ̃a kↄ̃n a kusuo.
4Ben Naama gàa kína kiia à bè: Yã kɛ̀ nↄkparɛ kɛ̀ bↄ̀ Isarailinↄ bùsun òn yɛ̀.
5Ben Sirianↄ kína bè: Ǹ gá, mɛ́ takada kɛ̃ Isarailinↄ kínanɛ. Ben Naama kondogi sɛ̀ɛ kiloo wàa do kpɛ́ baswɛɛplaa kↄ̃n vurao kiloo baaagↄ̃ akuri kↄ̃n utao waa kuri.
6À gàa kↄ̃n takada kɛ̀ kína kɛ̃̀ Isarailinↄ kínanɛo dↄ. Takada pì guu kína bè: Ma takada kɛ̀ kpã̀sãnnɛ kↄ̃n ma ìba Naamao, lɛ ǹ à kɛ̃kↄ̃amɛ kↄ̃n à kusuo.
7Kɛ̀ Isarailinↄ kína takada pì kyó kɛ̀, à a utadaa gà à kɛ̃̀ à bè: Ludan ma ũ kɛ̀ mɛ́ gbɛ̃ wɛ̃̀ndi bↄ mà sↄkpanɛ dↄↄ́? Bↄ́yãnzin à gbɛ̃ kɛ̀ gbàrɛma mà à kɛ̃kↄ̃a kↄ̃n a kusuozi? À gwa lán èe ma lɛ́ wɛtɛɛ nà fá!
8Luda gbɛ̃ Ɛlisa mà kɛ̀ Isarailinↄ kína a utadaa gà à kɛ̃̀, ben à lɛ́kpãsã kɛ̀nɛ à bè: Bↄ́yãnzin n n utadaa gà ń kɛ̃̀zi? Ǹ tó adee pì mↄ́ ma kiia, eé dↄ̃ kɛ̀ annabi kú Isarailinↄ bùsun.
9Ben Naama gɛ̃̀ a sↄ̃goron à gàa à zɛ̀ Ɛlisa bɛ gãalɛ.
10Ben Ɛlisa gbɛ̃ zĩ̀a à bè: Ǹ gá ǹ zú o Yoda swaan gɛ̃̀n swɛɛplaa, n mɛ̀ é ɛara à su a gbɛ̀n, nɛ́ kɛ̃kↄ̃a wásawasa.
11Ben Naama pɛ̃tɛ̃ kɛ̀, èe taa à bè: Mɛ́ɛ daa eé bↄ ua à mↄ́ à zɛ ma aɛ à Dii a Luda sísi à ↄ liga ma bↄ̀zi, lɛ ma kusu pì yãamɛ.
12Damasuku swaanↄ Abana kↄ̃n Faapao í maa dɛ Isaraili swaanↄ ílaroo? Mɛ́ fↄ̃ mà zú o gwe mà gↄ̃ wásawasaroo? Ben à ɛ̀ara kↄ̃n pↄfɛ̃o, èe taa.
13Ben à ìbanↄ tɛ̀zi wà bè: Baa, tó yã zĩ'ũun annabi pì dànnɛ yã, nɛ́ kɛroo? Kɛ̀ à bènnɛ ǹ gá zú o, nɛ́ gↄ̃ wásawasa, beee é n fuↄ́?
14Ben à gàa à a zĩnda kpàɛ Yoda ín gɛ̃̀n swɛɛplaa lán Luda gbɛ̃ pì ònɛ nà. Ben à mɛ̀ ɛ̀ara à sù a gbɛ̀n wásawasa lán nɛ́ féte pↄ́ bà.
15Ben Naama kↄ̃n a ìbanↄ ɛ̀ara wà gàa Luda gbɛ̃ kiia ń píngi. À zɛ̀ à aɛ à bè: Má dↄ̃̀ sa kɛ̀ Ludaa kú gukea anduna guuro, séde Isarailinↄ bùsun. Ǹ gbaa kɛ̀ mamↄma n zↄ̀bleri ma mↄonnɛɛ kɛ̀ sí.
16Ben Ɛlisa bè: Kↄ̃n Dii kɛ̀ mɛɛ̀ zĩi kɛnɛ kuunao mɛ́ síro. Naama nàkↄ̃rɛa à sí, baa kↄ̃n beeeo à gì sízi.
17Ben Naama bè: Tó nɛ́ɛ síro, ǹ mamↄma n zↄ̀bleri gba zɛ́ mà bùsu sɛ́ bãagãsↄ̃ aso plaa, zaakɛ mɛ́ saa o tãaa dↄro, séde Dii.
18Dii sùu kɛmao kↄ̃n yã kɛ̀kiio. Tó ma kína gàa Rimↄ gbãgbã à kpɛ́n, tó ma gaa zɛnɛ, tó ma kuɛ Rimↄ kpɛ́ pìn, Dii sùu kɛmao kↄ̃n yã pìo.
19Ben Ɛlisa bènɛ: Ǹ ká bɛ aafia! Kɛ̀ à dà zɛ́n, à táa ò féte,
20ben Luda gbɛ̃ Ɛlisa zĩkɛri Geazi laasuu lɛ̀ à bè: Ma dii tò Siria gbɛ̃ Naama e taa pã, èe pↄ́ kɛ̀ à mↄ̀onɛ síro. Kↄ̃n Dii kuunao mɛ́ pɛ́ɛzi mà pↄ́ke sía.
21Ben Geazi pɛ̀ɛ Naamazi. Kɛ̀ Naama è à tɛ́ ń kpɛɛ kↄ̃n bào, ben à bↄ̀ a sↄ̃goron, èe à dãa. Kɛ̀ à kà, ben Naama à là à bè: Aafian yↄ́?
22À wèàla à bè: Aafiamɛ. Ma dii bé à ma zĩmma, à bè annabinↄ gãli gↄ̃kparɛ gↄ̃ↄn plaa kenↄ bé wà bↄ̀ Ɛflaimu gusĩsĩdeen aↄ̃ mↄ̀ a kiia tia. Ǹ ń gba kondogi kiloo baplaa kↄ̃n utao waa plaa.
23Ben Naama bè: Ɛ̃ndɛ̃ ǹ kondogi kiloo basiigↄ̃ↄ sí gↄ̃ↄ. À kànɛ sàkin mɛ̀n plaa kↄ̃n utao waa plaa. À kpà a ìba gↄ̃ↄn plaaanↄa, ben aↄ̃ sɛ̀ wà dↄ̀ Geazinɛ aɛ.
24Kɛ̀ aↄ̃ kà Ɛlisa bɛ sĩ̀sĩ musu, ben Geazi pↄ́ pìnↄ sìḿma à kàɛ a kpɛ́n, ben à gbɛ̃ pìnↄ gbàrɛ aↄ̃ tà.
25Kɛ̀ à gàa a dii Ɛlisa kiia, ben Ɛlisa à là à bè: Geazi, mán n gaan? À wèàla à bè: Mamↄma n zↄ̀bleri, mɛ́ɛ gá gukearo.
26Ben Ɛlisa bènɛ: Kɛ̀ gↄ̃gbɛ̃ pì bↄ̀ a sↄ̃goron, èe n dãa, ń dↄ̃ kɛ̀ ma ninii kúnyo gweroo? Kondogi ke utanↄ símmana gurↄↄn yɛ̀ro nɛ́, ke kùkpɛnↄ ke geepi búnↄ ke sãanↄ ke zùnↄ ke gↄ̃gbɛ̃ kↄ̃n nↄgbɛ̃ zĩkɛrinↄo.
27Naama kusu é gↄ̃nnɛ kↄ̃n n boriinↄ ai gurↄ píngi. Kɛ̀ à bↄ̀ Ɛlisa kiia, ben kusu pì dààla púu lán buu bà.
