1Nehimu he hadì diyà te Israel si Hoshea he anak ni Elah hein ike-12 he tuig te kedhadì ni Ahaz diyà te Juda. Diyà te Samaria med-ubpà si Hoshea, ne midhadì sikandin seled te siyam he tuig.
2Mezaat is ulaula zin diyà te etuvangan te Nengazen, piru kenà iring kezaat te vaal te menge hadì te Israel he nehuna kandin.
3Midsurung ni Hadì Shalmaneser he hadì te Asiria si Hoshea. Nehimu sikandin he sakup ni Shalmaneser ne impevayad sikandin te vuhis.
4Ne hein neuǥet wazè en mebayad si Hoshea te vuhis he iring duen te nehuna he kada tuig is kebayad din, ne mibpetavang sikandin ki Hadì So he hadì te Ehipto. Ne hein netuenan ni Shalmaneser he midluib si Hoshea, midakep din ne mibpirisu zin.
5Ne zutun midsurung duen te hadì te Asiria is tivuuk he Israel, ne mibpeliǥuyan din te menge sundaru is Samaria seled te tetelu he tuig.
6Ne hein ikesiyam he tuig te kedhadì ni Hoshea, mid-aǥew en duen te hadì diyà te Asiria is Samaria, ne miduma zin is menge tig-Israel ziyà te Asiria su mibihag din sikandan. Diyè din sikandan ibpeubpà te inged he Hala, diyà te menge lugar he uvey te Wahig he Habor he ziyà te Gozan, wey ziyà te menge inged te menge Midianhen.
7Nehitavù heini ziyà te menge tig-Israel su geina te nekesalè dan diyà te Nengazen he Megbevayè dan he mibpeǥawas kandan diyà te Ehipto wey te kebeyveyai kandan te Faraon he hadì te Ehipto. Mid-azap sikandan te zuma he menge ed-ezapen
8wey mid-iringan dan is ulaula te menge etew ziyà te menge nasyun he impesegseg te Nengazen kandan. Midsunud dan is menge ulaula he impenurù te menge hadì te Israel.
9Mid-eles-eles dan mebaal te menge vaal he ebpekekuntada te Nengazen he Megbevayè dan. Mibaal zaan sikandan te menge simbahan diyà te metikang he menge lugar minsan hendei he menge lugar ziyà te Israel, puun te zezeisey he menge inged pehendiyà te zezekelà he menge inged he miberengbeng.
10Midsavuk dan te tedeman he menge vatu wey mibpehitindeg te menge tukud he simbulu te vahi he ed-ezapen he si Ashera diyà te puntur te kada vuvungan wey ziyà te sihung te kada merapung he kayu.
11Midtutung dan te menge veyewà diyà te kada simbahan diyà te metikang he menge lugar, iring te mibeelan te menge etew ziyà te menge nasyun he impesegseg te Nengazen kandan. Mibaal zan te mezaat he menge vaal he ingkepauk te Nengazen.
12Mid-azap dan te zuma he menge ed-ezapen. Minsan pa te migkaǥi is Nengazen te, “Kenè kew med-azap te zuma he menge ed-ezapen.”
13Layun ebpetizeeni te Nengazen is Israel wey Juda pinaaǥi te menge ebpeneuven din wey menge menenagnà he edhenduen: “Engkezi niw en is mezaat he menge vaal niw. Tumana niw is menge suǥù ku wey menge sulunuzen he ziyà te tivuuk he Kesuǥuan he impetuman ku te menge kepuun niw ne imbeǥey ku ziyà te keniyu pinaaǥi te menge suluǥuen ku he mibpenaub ku.”
14Piru kenà sikandan edtuman. Utew sikandan mesinupaken; iring sikandan te menge kepuun dan he wazà medsarig te Nengazen he Megbevayè dan.
15Inselikwey zan is menge sulunuzen wey is kebpekid-uyun kandan te Nengazen he midhimu zin diyà te menge kepuun dan, ne wazè dan seǥipaa is menge petizaan din kandan. Midsunud dan is wazè din pulus he zuma he menge ed-ezapen, ne nehimu sikandan he wazà menge pulus. Mid-iringan dan is menge etew ziyà te menge nasyun he nekeelingkus kandan minsan mibmenduan sikandan te Nengazen he kenè dan heini iringi. Mibeelan dan is menge vaal he indawey kandan te Nengazen.
16Inselikwey zan is langun he menge suǥù te Nengazen he Megbevayè dan, ne nengugelingen sikandan mebaal te ledawan te zezuwa he nati he vaka, wey te tukud he simbulu te vahi he ed-ezapen he si Ashera. Mid-azap dan is andew, is bulan, wey is menge vituen wey mibeǥayan dan si Baal te zengeg.
17Impemuhat dan is menge anak dan pinaaǥi te hapuy; midangep dan diyà te menge menenagnà wey menge veyilan; mibpevayèbayè dan te mezaat he vaal ziyà te etuvangan te Nengazen, ne utew ingkepauk heini te Nengazen!
18Nepeukan utew te Nengazen is menge Israilihanen ne impaawè din sikandan diyà te lugar zan, ne nekepekeziyù sikandan kandin. Iyan dà nesamà is tribu ni Juda.
19Minsan ganì is tribu ni Juda wazè man medtuman te menge suǥù te Nengazen he Megbevayè dan. Mid-iringan dan is vaal he impenurù kandan te menge tig-Israel.
20Umbe inselikwey te Nengazen is langun he menge etew ziyà te Israel. Midsilutan din sikandan pinaaǥi te kebeǥaya zin kandan diyà te menge midsurung kandan taman te impaawè din sikandan puun te lugar zan ne nekepekeziyù sikandan kandin.
21Hein insivey te Nengazen is Israel puun te ginhedian ni David, midhimu te menge tig-Israel si Jeroboam he anak ni Nebat he hadì dan. Ne mid-iniyat ni Jeroboam is menge tig-Israel te ked-iniyug diyà te Nengazen, ne kandin he ketau is kebpekevaal zan te zekelà he salà.
22Mibpedayun is menge tig-Israel te ked-iring te menge salà he mibeelan ni Jeroboam, ne wazè dan engkezi heini,
23taman te impaawà sikandan te Nengazen diyà te lugar zan ne nekepekeziyù sikandan kandin, sumalà is impetizaan din kandan pinaaǥi te menge suluǥuen din he mibpenaub din. Umbe mibihag te menge tig-Asiria is menge etew ziyà te Israel ne ziyà sikandan mekeubpà taman en guntaan.
24Duen menge etew he midsuǥù te hadì diyà te Asiria he medhendiyè dan te Samaria. Ebpemuun sikandan diyà te Babilonia, Cut, Ava, Hamat, wey Sefarvaim, ne impeubpè din sikandan diyà te menge inged diyà te Samaria he liwan te menge tig-Israel. Umbe midsakup dan is Samaria wey is duma pa he menge inged diyà te Israel.
25Dutun te aney he ked-ubpè dan dutun, wazè dan med-azap te Nengazen, umbe impehendiyà te Nengazen te kandan is menge erimaung ne mibpenhimetayan dutun te menge erimaung is duma kandan.
26Heini he hitavù midtudtul ziyà te hadì diyà te Asiria: “Is menge etew he midsuǥù nu he med-ubpà diyà te menge inged diyà te Samaria, wazà metau te menge kesuǥuan te diwata he ed-ezapen dutun he lugar. Umbe mibpeveyaan din sikandan te menge erimaung ne mibpenhimetayan te menge erimaung is duma kandan, su wazè dan metueni is menge kesuǥuan din.”
27Ne segugunà mibmandù is hadì te Asiria te, “Ipelikù niw ziyà te Samaria is sevaha zuen te menge memumuhat he mibihag tew, ne ziyà sikandin ipeubpà su wey zin ikepenurù diyà te menge etew is kesuǥuan te diwata he ed-ezapen keniyan he lugar.”
28Umbe, sevaha zuen te vihag he menge memumuhat is midlikù diyà te Samaria ne ziyà med-ubpà te Betel, ne mibpenurù din is menge etew ke ebmenmenuwen is ked-ezapa te Nengazen.
29Piru heini is nekedseselekawà he grupu te menge etew, mibpedayun dan he ebaal te kandan he menge ed-ezapan. Diyà te kada inged he ed-ubpaan dan, impelastar zan is kandan he menge ed-ezapen diyà te menge simbahan he ziyà te metikang he menge lugar he mibeelan te menge tig-Samaria.
30Is ebpuun diyà te Babilonia, mid-azap dan is kandan he ed-ezapen he si Sucot Benot. Is ebpuun diyà te Cut, mid-azap dan is kandan he ed-ezapen he si Nergal. Ne is ebpuun diyà te Hamat, mibaal te ed-ezapen dan he si Ashima.
31Is ebpuun diyà te Ava, mid-azap dan is kandan he ed-ezapen he si Nibhaz wey Tartak. Ne is ebpuun diyà te Sefarvaim, mid-azap dan is kandan he ed-ezapen he si Adramilec wey si Anamelec; idtavun dan ganì is menge anak dan su ibpemuhat dan kayi he menge ed-ezapen.
32Ed-azap sikandan te Nengazen, piru iyan sikandan mibpilì te menge memumuhat he menge zuma zan mismu he ebpekepengulu kandan te kebpemuhat diyà te menge simbahan diyà te metikang he menge lugar.
33Ed-azap sikandan te Nengazen piru ed-azap daan sikandan te keugelingen dan he menge ed-ezapen sumalà te neleyaman te menge etew ziyà te menge nasyun he ebpuunan dan.
34Taman en guntaan he menge andew is kebeeli zan kayi. Kenà tutuu is ked-ezapa zan te Nengazen, ne wazà sikandan medtuman te menge suǥù, menge sulunuzen, menge penurù, wey menge kesuǥuan he imbeǥey te Nengazen te menge kevuwazan ni Jacob, he migngezanan din te Israel.
35Hein midhimu te Nengazen is kebpekid-uyun din te menge Israilihanen, mibmandù sikandin te: “Kenè kew med-azap etawa mebpenilbi te zuma he menge ed-ezapen wey kenè niw pemuhata sikandan.
36Iyan e zà keniyu ezapa is Nengazen he mibpeǥawas keniyu ziyà te Ehipto pinaaǥi te zekelà he ǥehem ku. Iyan e zà ereg he ed-ezapen niw wey ebpemuhaten niw.
37Kinahanglan he layun niw edtumana is menge suǥù ku, menge sulunuzen, menge penurù, wey menge kesuǥuan he insurat ku para keniyu.
38Kenè niw lipati is kebpekid-uyun ku keniyu, ne kenè kew azap te zuma he menge ed-ezapen.
39Iyan e zà keniyu ezapa, is Nengazen he Megbevayè niw, su iyan a edlibri keniyu te kedezaat te menge kuntada niw.”
40Piru haazà he menge etew, wazà mebpezumazuma te Nengazen, kekenà, mibpedayun dan he ebaal te neleyaman dan he menge vaal.
41Dutun te ked-ezapa zan te Nengazen, ed-ezapen dan daan is duma he menge ed-ezapen dan. Ne taman en guntaan iyan heini ebeelan te menge kevuwazan dan.
