1 Timɔntee 4

1

2

3

4

5

6

¹Muyɑɑ́nsɑ̀ɑ̀mù ti nɑ́ɑ́mmu nweti weti kɛ tú yɛwe sɔnyɛ bɛnìtìbɛ̀ bo yetɛ Kuyie nkó kucɛ kɛ́tũnnɛ mɛyɑ́ɑ̀bìsíyɛ̀mmɛ̀ nɛ̀ yɛbɔkɛ̀ kó itié.

²Mɛyɛ̀mmɛ̀ mɛ̀dɛ́mɛ̀ yɛmbɛ̀ nɛ̀ siyɑ́ɑ̀bìsí yɛmbɛ̀ bo mbɛ̀ soú. Dɛ kó siyɑ́ɑ̀bìsí yɛmbɛ̀ dɛ̀mɑrɛ̀ í kɑ́ɑ́ mbɛ yɛ̀mmɛ̀ bɛ̀ dò mbɛ̀ bɛ̀ tùɔnnɛ̀ timɑ́tì wũɔ̃tì nti.

³Dɛ kó bɛnìtìbɛ̀ bo nnɑ́ɑ́ nkɛ tú dipopuò í wenni, kɛ tú bɛ̀ nci mudiì mɑmù. Kuyie ndɛ̀ dɔ̀ɔ̀ kɛ̀ dɛ̀ tu onìtì kó mɛsɑ̀ɑ̀ mmɛ, bɛ̀ɛ̀ yie nKuyie mbɛ̀ yĩ̀ɛ̃́tɛ́mu timɔ́mmɔnti, kɛ ɔ̃ɔ̃ kù dɔunnɛ̀ mutɔ̃mmú kɛ́di.

⁴Kuyie ndɔ̀ɔ̀ dɛ̀ɛ̀ kó dimɑ̀ɑ̀ wennimu, dɛ̀mɑrɛ̀ í dò nkɛ́yóu. Ti nɛ́ dò nkɛ níí kù dɔunnɛ̀ mutɔ̃mmú mmu kɛ́ dɛ̀ di.

⁵Kuyie nnɑ́ɑǹtì nɛ̀ mubɑ́ɑmmu dɛɛ̀ wénkùnko dɛmɔu.

⁶A ntiè nti Kirisi kɔbɛ. Mɛm̀mɛ ɑ bo ntúmɛ̀ Yesu Kirisi kóo tɔ̃ntì sɑ̀ɑ̀wè, wèè bɛbíí Kuyie nnɑ́ɑǹtì sɑ̃́ɑ̃̀ kɛ̀ tì dònnɛ̀ o kó mudiì kɛ tũ nKuyie nnɑ́ɑǹtì kó itié nweti weti ɑ ì bɛbíí mɛ̀ɛ̀ botí.

⁷Bútínnɛ́ tiyɑ̀ɑ̀rìnɛìtì sɔ̃́ntíkɛ kpɛti, tì í yóó dɑ teennɛ̀ Kuyie nkó kucɛ, kɛ́yetoo kɛ́ndɔɔri Kuyie ndɔ́mɛ̀.

⁸A bo fɛ̃́ũmmɛ̀ ɑ kɔ̃̀ntì dɛ̀ wennimu yie, ɑ nɛ́ bo yetoomɛ̀ Kuyie nkó kucɛ dɛɛ̀ pɛ̃ɛ̃tɛ́. Kɛ yɛ̃́ dɛ̀ í túmɛ̀ mufòmmu muù mmɑ́ɑ̀ kpɛ́í nnɛ̀ mùù kpɑɑní mu kpɛ́í nkɛ.

⁹Tinɑ́ɑǹtì mɔ́mmɔnti nti bɛnìtìbɛ̀ bɛmɔu dò nkɛ́ntɑ̃́ tì.

¹⁰Dɛɛ̀ te kɛ̀ ti pĩ́ mmutɔ̃mmú kɛ mɑù, kɛ yɛ̃́ ti tɑ̃́mɛ̀ Kuyie, kunku kùù bo sɑ̃́ɑ̃̀ kɛ dɛɛrí bɛnìtìbɛ̀ bɛmɔu, dɔ̀kɛ bɛ̀ɛ̀ kù tɑ̃́.

¹¹Á dò nkɛ́ ntì mbɛ̀ nɑ̀ɑ́mmu, kɛ tì mbɛ̀ tiè.

¹²Á bɑ́ɑ́ yóu kɛ̀ bɛ̀ dɑ senkɛ̀rì ɑ tú mɛ̀ɛ̀ kpɛ́í nhodɑpɑ̀ɑ̀. A nɑ́ɑǹtì nɛ̀ ɑ dɔɔ̀rìmɛ̀ dɛ̀ nwenni, kɑ̀ɑ ndɔ́ bɛtɔbɛ̀, kɛ́ntɑ̃́ Kuyie mmɛsɑ̀ɑ̀ nkɛ dɔɔri dɛ̀ɛ̀ wenni, kɛ̀ bɛ̀ ndɑ wúó nkɛ tũ.

¹³Á nkɑɑ̀ Kuyie nnɑ́ɑǹtì bɛnìtìbɛ̀, kɛ tì mbɛ̀ tũ̀nni, kɛ ti mbɛ̀ tiè nkɛ kémmú m bo tuɔkoomɛ̀.

¹⁴A bɑ́ɑ́ yɛ̃̀ nKuyie ndɑ pɑ̃ dìì pɑ̃nnì, kɛ̀ ku pɑ̃ɑ̃nɑ́ɑǹtì nɑ́m̀bɛ̀ tì bɛ́i mbɛwedɔunkótíbɛ̀ dɑ nɔ̀ɔ́ ndìì mɔ̀nnì sinɔu kɛ bɑ̀ńtɛ̀ Kuyie.

¹⁵Totí ɑ yɛ̀mmɛ̀ dɛ kó dipɑ̃nnì ĩ́nkɛ̀, kɛ duɔ́ nhɑmɑ́ɑ̀ dɛ kó mutɔ̃mmú, kɛ̀ bɛ̀ nwùó nhɑ kérímɛ̀ dɛ ììkɛ̀.

¹⁶Ndɑkɛ ɑmɑ́ɑ̀ kpɛ́í nkɛ́ mbɛ̀ tiè nkɛ̀ dɛ̀ wenni, kɛ́nfííkú teii. Kɑ̀ɑ dɔ̀ɔ̀ri mɛmmɛ ɑ bo dɛɛtɛ́ ɑmɑ́ɑ̀, kɛ́dɛɛtɛ́nɛ̀ ɑ tiè mbɛ̀.