1. Kraľengero 9:1-19

¹Sar o Šalamun dokerďa le RAJESKERO Chramos, peskero palacis a savoro, so kamľa te kerel,

²sikaďa pes leske o RAJ dujtovar andro suno avke sar angloda andro Gibeon.

³O RAJ leske phenďa: “Šunďom avri tiri modľitba the o mangipen, sar pes mangehas ke mande. Me sentňarďom kada Chramos, so ačhaďal, hoj ode miro nav te el barardo pro furt. Mire jakha the miro jilo ode ena pro furt.

⁴Te tu phireha angle ma pačivalones the žuže jileha avke sar tiro dad o David a te doľikereha mire zakoni the prikazaňja a te kereha savoro, so tuke phenďom,

⁵me doľikerava o lav, so phenďom tire dadeske le Davidoske: Leskero tronos ela furt zoralo upral o Izrael a furt ela vareko andral leskero potomstvos pro tronos.

⁶Ale te pes mandar odvisareha tu the tire čhave a na doľikerena mire zakoni the o prikazaňja, so tumen diňom, ale džana te služinel avre devlenge a lašarena len,

⁷akor me khosava tele mire manušen le Izraeliten pal kadi phuv, so len diňom. O Chramos, so sentňarďom prekal miro nav, odčhivava mandar a paľis o Izrael ela dojekhe narodoske pro pheras the pro asaben.

⁸A kale Chramostar na ačhela ňič, ča o bara, a dojekh, ko odarik predžala, ela sar kašt a phenela: ‘Soske kada o RAJ kerďa kala phuvake the Chramoske?’

⁹Odphenela pes lenge: ‘Bo omukle le RAJES, peskere Devles, savo iľa avri lengere daden andral o Egipt. Chudle te banďol a te lašarel avre devlen, a vašoda o RAJ pre lende domukľa kadi bibach.’ ”

¹⁰O Šalamun ačhavelas o Chramos le RAJESKE the o palacis biš berš (20)

¹¹a o kraľis Chiram andral o Tir dodelas le Šalamunoske cedroskere the sosnakere kašta a o somnakaj ajci, keci kamelas. Paľis o Šalamun les diňa biš fori andre Galileja.

¹²O Chiram avľa andral o Tir te predikhel ola fori, so les diňa o Šalamun, ale leske na sas pre dzeka.

¹³Avke phenďa le Šalamunoske: “Phrala miro, oda save fori man diňal?” Paľis ole forenge diňa nav Kabul a kavke dži adadžives pes vičinel odi phuv.

¹⁴Ale o Chiram the avke bičhaďa le Šalamunoske 4 000 kili somnakaj.

¹⁵O Šalamun ispidelas pro manuša, hoj te keren e buči sar otroka pro Chramos le RAJESKERO the pre leskero palacis, pre terasa pašal o foros the pro muri pašal o Jeruzalem, Chacor, Megiddo the Gezer.

¹⁶O Faraonos, o Egiptsko kraľis, geľa pro mariben andro foros Gezer, domarďa les a zlabarďa avri. Murdarďa le Kanaančanen the ole manušen, save ode bešenas, a paľis o foros diňa peskera čhake, le Šalamunoskera romňake.

¹⁷Paľis o Šalamun pale ačhaďa o foros Gezer, teluno foros Bet-Choron,

¹⁸Baalat, Tamar pre Judsko pušťa

¹⁹the savore fori, kaj sas odthodo o chaben, mek the o fori prekal o maribnaskere verdana the graja. A ačhade savoro, so kamelas andro Jeruzalem, andro Libanon the andre caľi phuv, kaj sas kraľis.