1 Hadì 9:1-19

¹Nepasad ni Solomon is kebangun duen te valey te Nengazen wey te turuǥan din, ragkes is duma he mibpelenuwan din te ebaal.

²Ne mibpeuman mebpaahà kandin is Nengazen te iring duen te nehuna he kebpeehè din diyà te Gibeon.

³Migkaǥi is Nengazen diyà te kandin te, “Nezineg ku is ampù nu wey hangyù nu kayi te kediey. Heini is baley ku he mibangun nu, mibpilì ku heini he lugar he kayi a ebeǥayi te zengeg taman te taman. Ebentayan ku heini wey layun ku ed-etura.

⁴Ne sikew, emun ebpengungubpaan ka he egkeseriǥan wey metazeng diyà te etuvangan ku iring te amey nu he si David, ne ebeelan nu is langun he ebpeveelan ku kenikew wey edtumanen nu is ibeǥey ku he menge sulunuzen wey menge suǥù,

⁵ibpehadì ku is menge kevuwazan nu te wazà pidtemanan. Insaad ku heini ziyà te amey nu he si David hein migkeǥiyan ku sikandin te, ‘Kenè ka egkeewaan te kevuwazan he edhadì te Israel.’

⁶Piru emun ed-iniyuǥan a keniyu wey te menge kevuwazan niw su kenè niw edtumanen is menge suǥù wey menge sulunuzen he imbeǥey ku keniyu, wey ke ebpenilbi kew wey ed-azap te zuma he menge ed-ezapen,

⁷ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te langun he menge etew is Israel.

⁸Ne minsan pa te mekempet wey nevantug heini is baley ku, ne edrundusen ku heini. Egketingkemed wey egkengeinuinu is langun he edsaǥad kayi, ne egkaǥi zan is ed-undaunda te, ‘Maan is mibeelan heini te Nengazen kayi he tanà wey kayi te valey zin?’

⁹Edtavak is duma te, ‘Tenged te mid-iniyuǥan dan is Nengazen he Megbevayè dan, he iyan mibpeǥawas te menge kepuun dan diyà te Ehipto, ne mibpenilbi wey mid-azap dan te zuma he ed-ezapen. Umbe mibpeeǥiyan sikandan te Nengazen kayi he menge vangkit.’ ”

¹⁰Kedlavey te 20 he tuig te kedtukuza ni Solomon te zezuwa he dezekelà he bilding–is baley te Nengazen wey is turuǥan,

¹¹imbeǥey ni Solomon ki Hadì Hiram, he hadì te Tyre is 20 he inged diyà te Galilea. Iyan imbeeli zin kayi is geina te imbeǥey kandin ni Hiram is langun he egkinehenglanen din he menge kayu he sidru wey sipris, wey menge vulawan he egkinehenglanen din.

¹²Piru hein midhendiyà si Hiram te Galilea is ebpuun diyà te Tyre su ed-ahaan din haazà is menge inged he imbeǥey ni Solomon kandin, ne wazè din ikesuat heini.

¹³Umbe, migkeǥiyan din si Solomon te, “Suled, kenà meupiya he menge inged heini is imbeǥey nu kedì.” Ne haazà he menge tanà migngezanan ni Hiram te Cabul, ne taman en guntaan iyan heeyan ngazan din.

¹⁴Dutun te nehuna he timpu nekepeuwit si Hiram diyà te ki Solomon te menge 5,000 he kilu he vulawan.

¹⁵Iyan heini kaaǥi te kedtiǥum ni Hadì Solomon te menge etew he mibpeǥes din te kedterebahu zuen te kebenguna te valey te Nengazen wey te turuǥan din, kedtambak te mevavà he vahin te tanà dutun te inged, kedlig-eni te verengbeng te Jerusalem, wey ked-umana kebenguna te menge inged he Hazor, Megido, wey Gezer.

¹⁶(Heini is Gezer midsurung wey mid-aǥew te Faraon he hadì te Ehipto. Mibinsulan dan heini wey migerè dan is meǥinged kayi he menge Canaanhen. Imbeǥey heini zutun te hadì diyà te anak din he vahi su inggasa zin hein eseweey zan ki Solomon.

¹⁷Ne mid-uman benguna ni Solomon heini is Gezer.) Mibangun daan ni Solomon is alug he vahin te Bet Horon,

¹⁸is Baalat, is Tamar he ziyà te disirtu he nesakup te tanè din,

¹⁹wey is langun he menge inged he zutun is menge budiga zin, menge kerwahi wey menge kudè din. Midtukud din is langun he egkesuatan din te edtukud diyà te Jerusalem, Lebanon wey te langun he nesakup din he tanà.