1Bada ana parivainuaḡana bokisina au Zion, David ana taon ita vaia da ita neiai au Tempol. Gulau Solomon, Israel babadai ma dam nununai babadai anatapui i ḡoreiai awarina au Jerusalem.
3Maranai Israel babadai i ḡetai, pirisi parivainuaḡana bokisina i voepai.
4Pirisi ma Levi ana dam ravai parivainuaḡana bokisina ma numa gara ma ana purapura vivivirei i avara-naiei au Tempol.
5Gulau Solomon ma mai Israel anatapui parivainuaḡana bokisina au naona; sipu da bulumakau i vunuvunu-naiei, ḡamoḡamo i maḡa guratana da iavana i kauana-avei.
6Ma pirisi parivainuaḡana bokisina i ruiei tempol au orana da ana au gabu vivivira dewadewana cherub ruaḡa papei au gabaurina i vikialai.
10Maranai pirisi gabu vivivireina i opu-tawanei, bau potopotona i ḡairai, ma ana boruma numana i purui.
11Pirisi eḡa tagotagogina da ai nola ita kauei aubaina bau potopotona; Bada ana boruma, tempol i vioai.
22Ma Solomon pulo aniapuna au naona i mairi, ma au murina Israel patarana. Urana i voepai au mara,
23ma i raupari i pa, “Oo Bada, Israel ana God, eḡa mepa God ḡelauna me tam nanare, au tepana au mara bo au gabaura au dobu! Tam am parivainuaḡana anatapuna e kaukauei, ma mara nonoa am rava nuanuai e vaivaia maranai orai taputapunei e votaḡotaḡoim.
27—Wate amapo God au dobu ina mae bo eḡa? Eḡateni! Mara, ma nanare mara ḡedewadewa eḡa tagotagogina da tauna ina vojijini. Wei tempolna a voavoaia lamna anina bo eḡa?
28—Wate au pari ma nonori. Bada au God, tau am taunola ma aiwai amadodo a vivibaḡei ma vereu.
29Am tempol ma inana-vaitetei, marai ma waguvarai, wei gabuna aubaina u riwa u pa, ‘Tau wavau kampa.’ Lamna aubaina au pari weka ana pariparitawaneiai ma i rautaniḡanei.
30Au pari ma nanare am rava mai Israel ai pari ma nonori, maranai naoi i tereiai weka ma i raupari. Au mara ai pari ma nonori ma ai apoapoe ma nota-tawanei.
41—Ma maranai jentail aueia maemaei, riwam ma am rewapana ma kaua ḡaeḡaei u kaukaueia riwai ina nonori; ma ina nei da ina vimae-ḡaeḡaenim. Ma am numa au naona ina mairi ma ina raupari
43am au animae au mara, ai pari ma nonori ma ai ḡoana ma kauei. Ma jentail wavam ina aramanei ma ina vimae-ḡaeḡaenim me am rava oina mai Israel. Ma jentail ina aramanei da wei tempolna a voai. Tam vimae-ḡaeḡaenam aubaina.”
