1Iwe, ewe king Ahap a apworausa ngeni Isipel pwülüan we meinisin mine Elias a föri, pwal usun an niela ekewe soufos meinisin ren ketilas.
2Mürin, Isipel a tinala eman chon künö ren Elias pwe epwe üreni, “Ekewe kot repwe nieila ika üsap föri ngonuk lesor lon ei otun usun mine ka föri ngeni ekewe soufos.”
3Iwe, Elias a niuokus, a ütä o sü, pun a kütta manauan. A tori Persepa lon Juta o likiti nöün we chon angang ikenan.
4Lupwen Elias a feila lon ewe fanüpö ükükün toauen sain eu rän, a tori efoch irä, a mottiu fan o älälei an epwe mäla. Iwe, a iotek, “Ai Samol mi Lapalap, a kon naf ngeniei ai weires, kopwe angei seniei manauei, pun ngang üsap mürina seni ai kewe lewo.”
5Mürin a konola fän ewe irä o möür. Nge lon ei otun eman chon läng a atapa o üreni, “Kopwe pwätä o mongö.”
6Iwe, a nennefeil o küna me ünümöküran eföü pilawa me eu rumen koluk. A mongö o ün, mürin a pwal konsefälila.
7Iwe, nöün ewe Samol mi Lapalap we chon läng a liwinto fän aruuan, a atapa o üreni, “Kopwe pwätä o mongö, pun om sai epwe fokun toau ngonuk.”
8Iei mine Elias a pwätä, a mongö o ün, mürin a fetal fän pöchökül ren ngünüwen ewe mongö lon ükükün faik rän me faik pwin tori Horep ewe chukun Kot.
9Iwe, a tolong lon eu föimw o nonom ikenan lon ewe pwin. Lon ei otun ewe Samol mi Lapalap a üreni Elias, “Elias, meta ka föri ikei?”
10Elias a üra, “Üa fokun tiliken le angang ngonuk, ai Samol mi Lapalap ewe Kot mi Unusen Manaman. Nge ekewe armasen Israel ra atai om we pwon, ra ataela om kewe rongen asor o niela noum kewe soufos meinisin ren ketilas. Ngang echök üa chüen manau. Nge ra pwal ekiekin nieila.”
11Iwe, ewe Samol mi Lapalap a üreni, “Kopwe towu o ütä won ei chuk me mwei, pun ngang ewe Samol mi Lapalap üpwe le feila senuk.” Mürin, eu watten asepwäl mi fokun pöchökül a asönü ekewe chuk o amökkükisietiu ekewe achau me fän mesen ewe Samol mi Lapalap, nge ewe Samol mi Lapalap esap nom lon ewe asepwäl. Mürin ewe asepwäl a fis och chechechin fanü, nge ewe Samol mi Lapalap esap nom lon ewe chech.
12Mürin ewe chechechin fanü a pwä och ekkei, nge ewe Samol mi Lapalap esap nom lon ewe ekkei. Nge mürin ewe ekkei a wor eu möngüngü mi leüökükün.
13Lupwen Elias a rong ei möngüngü, a pwölüela won mesan ngeni üfan owokot, a towu seni ewe föimw o ütä mesan. Nge ewe möngüngü a aisini, “Elias, meta ka föri ikei?”
14Elias a pälüeni, “Üa fokun tiliken le angang ngonuk, ai Samol mi Lapalap ewe Kot mi Unusen Manaman. Nge ekewe aramasen Israel ra atai om we pwon, ra ataela om kewe rongen asor o niela noum kewe soufos meinisin ren ketilas. Ngang echök üa chüen manau. Nge ra pwal ekiekin nieila.”
15Iwe, ewe Samol mi Lapalap a üreni, “Kopwe liwinla won ewe al ngeni ewe fanüapö arun Tamaskus. Nge lupwen ka tori Tamaskus, kopwe epiti Hasael pwe epwe kingen Siria.
16Kopwe epiti Jehu nöün Nimsi we mwän pwe epwe kingen Israel, kopwe pwal epiti Elisa nöün Safat we mwän seni Apel-mehola pwe epwe siwiliik lon ewe wisen soufos.
17Iö epwe sü pokiten Hasael a ekiekin niela, Jehu epwe niela, nge iö epwe sü pokiten Jehu a ekiekin niela, Elisa epwe niela.
18Nge üpwe amanaua fisungeröü aramas me lon Israel, chokewe meinisin resap fotopwäsuk ngeni uluulun ewe anü Paal ika mitiri.”
19Iwe, Elias a feila seni ikenan o küna Elisa nöün Safat we mwän, a tuw pwül ren engol me ruoman pean ätemwänin kow, nge i a nom ren ewe engol me ruuen pea. Elias a feila ren o noutätä üfan owokot won Elisa.
20Mürin, Elisa a likitala ekewe ätemwänin kow, a säla mürin Elias o üreni, “Kopwe mwüt ngeniei pwe üpwe feila o kapong ngeni semei me inei, mürin üpwe tapwela mürum.” Elias a üreni, “Kopwe liwinla. Ngang üsap epetuk.”
21Mürin, Elisa a feil seni Elias, a angei ewe pean ätemwänin kow a wawa le tuw pwül o nirela. A eäni mwüch waasen ekewe ätemwänin kow le kuku fituker o aochocha ngeni ekewe aramas, iwe, ra ochoch. Mürin, Elisa a tapwela mürin Elias o angang ngeni.
