1 BƐKPÀÀTÌBƐ̀ 18:28-44

²⁸Kɛ̀ bɛ̀ɛ wekii mɛdiɛ̀ nkɛ́nyɔ́únɛ̀ bɛmɑ́ɑ̀ yɛse nɛ̀ yɛkpɑ̃ɑ̃̀ nkɛ̀ mɛyĩ̀ĩ̀ nyìɛ̀, kɛ́ndònnɛ̀ bɛ̀ do mɔkɛmɛ̀ dɛ kó mɛmɑntímɛ̀.

²⁹Diyiè tũ̀ntɛ dìì mɔ̀nnì kɛ̀ bɛ̀ɛ ítɛ́ ihúu kɛ̀ kutoweku ndɑ́ɑ́tí kɛ yɑ̀ɑ tuɔkɛnɛ̀ kuyuoku bɛ̀ ɔ̃ɔ̃ fíé dìì mɔ̀nnì iwũɔ̃, bɛ̀ mɛ nyí nkèè tìmɑtì yoo mɛtɛ̃́nnímɛ̀ mɑmɛ̀ yoo bɛ̀ɛ yɑ̀ mɛcɑnnimɛ̀ mɑmɛ̀.

³⁰Dɛ mɔ̀nnì kɛ̀ Edii bɛ̀ nɑ̀kɛ́ kɛ dɔ̀: Tɔ́ɔ́nnɛ̀nní m borɛ̀! Kɛ̀ bɛ̀ɛ tɔ́ɔ́nní bɛmɔu o borɛ̀, kòo wɛ̃tɛ kɛ́tũntɛ ti Yiɛ̀ nKuyie nkó diwũɔ̃tɔ̀nnì dìì do pɔ̀ntɛ,

³¹kɛ́deè kɛ́tuótɛ́ yɛtɑ̃́rɛ̀ tɛpíítɛ̀ nɛ̀ yɛ̀dɛ́ɛ̀ kɛ̀ yɛ̀ mbo Sɑkɔbu bí do mɑmɛ̀. Ti Yiɛ̀ nKuyie ndo nɑ̀kɛ́ wè kɛ dɔ̀: Di mmɔ̀nnì bɛ̀ yó ndɑ yu kɛ tú Isidɑyɛɛri nwe.

³²Mɛm̀mɛ Edii mɑɑ́mɛ̀ diwũɔ̃tɔ̀nnì nɛ̀ yɛtɑ̃́rɛ̀ ti Yiɛ̀ nKuyie nkpɛ́í, kɛ́keú difɔ̃̀tìrì kɛ́fitɛ́, kɑ̀ɑ bo dɛ̀ cũɔ̃́ mɛniɛ mmɛ̀ mbo dítìrì sipísìtɑ̃ɑ̃ti.

³³Kòo dɑɑ́ nyidɛí kɛ́kuɔ o nɑ̀ɑ̀fɛ̀, kɛ́kékɛ́ kɛ́nɔ́ɔ́ nyi ĩ́nkɛ̀.

³⁴Kɛ dɔ̀: Píɛnnɛ̀ mɛniɛ nsicee sìnɑ̀ɑ̀ kɛ̀ bɛ̀ɛ sì píɛ. Kòo dɔ̀: Cóúnnɛ̀ idɛí nɛ̀ fɛnɑ̀ɑ̀fɛ̀ dɛ ĩ́nkɛ̀. Kɛ̀ bɛ̀ɛ cóú. Kòò dɔ̀: Yíɛ́nɛ̀ kucɛ mɛdɛ́rímɛ̀. Kɛ̀ bɛ̀ɛ yíɛ́. Koò dɔ̀: Yíɛ́nɛ̀ kucɛ mɛtɑ̃ɑ̃́mmɛ̀. Kɛ̀ bɛ̀ɛ yíɛ́.

³⁵Kɛ̀ mɛniɛ mpɔ̃ntɛ́ diwũɔ̃tɔ̀nnì, kɛ́píɛ́ ndifɔ̃̀tìrì bɛ̀ keú dì kɛ fitɛ́.

³⁶Dɛ̀ tùɔ̀kɛ dìì mɔ̀nnì bɛ̀ ɔ̃ɔ̃ fíé dɛ̀ kuyuoku iwũɔ̃ kɛ̀ Edii Kuyie mpɑ̃ɑ̃nɑ́ɑǹtì nɑ́ɑǹtò tɔ́ɔ́nko bɛ borɛ̀ kɛ́bɛ́i nkɛ dɔ̀: Ti Yiɛ̀ nKuyie nhAbɑrɑhɑmmu nɛ̀ Isɑki nɛ̀ Sɑkɔbu bɛ̀ do tũ nkù, dɔɔ̀ yíe nkɛ̀ bɛnìtìbɛ̀ɛ bɑntɛ́ ɑ túmɛ̀ ti Yiɛ̀ nKuyie nyIsidɑyɛɛribɛ tũ nkù, kɛ̀ ǹ tu ɑ kóo tɔ̃ntì, kɛ̀ fɔ̃́ɔ̃̀ n nɑ̀kɛ́ kɛ̀ ǹ dɔ̀ɔ̀ m mɛ̀ ndɔ̀ɔ̀mɛ̀.

³⁷Ti Yiɛ̀ nKuyie ndɔɔ̀ n yɛ̃mmɛ̀, dɔɔ̀ n yɛ̃mmɛ̀! Kɛ̀ bɛnìtìbɛ̀ɛ bɑntɛ́ fɔ̃́ɔ̃̀ tumɛ̀ ti Yiɛ̀ nKuyie nkɛ ceeri bɛnìtìbɛ̀ yɛ̀mmɛ̀, kɛ̀ mɛ̀ wĩɛ̃tiní ɑ bíɛ́kɛ̀.

³⁸Kɛ̀ ti Yiɛ̀ nKuyie ncṹũnní muhɑ̃ɑ̃́ nkɛ̀ mùu cɔ́útɛ́ fɛnɑ̀ɑ̀fɛ̀ nɛ̀ idɛí kɛ́sũɔ̃too mɛniɛ mmɛ̀ɛ̀ bo difɔ̃̀tìrì miɛkɛ.

³⁹Kɛ̀ bɛnìtìbɛ̀ bɛmɔu yɑ̀ dɛ̀ɛ̀ dɔ̀ɔ̀ kɛ́do kɛ́sĩ́nnɔ́ɔ kɛtenkɛ̀ kɛ́bɛ́i nkɛ dɔ̀: Ti Yiɛ̀ nKuyie nkuù tu Kuyie! Ti Yiɛ̀ nKuyie nkuù tu Kuyie!

⁴⁰Kɛ̀ Edii bɛ́i nkɛ dɔ̀: Pĩ́nnɛ̀nní dibɔɔ̀ Bɑɑdi kó bɛpɑ̃ɑ̃bɛ̀, di bɑ́ɑ́ yie nkòò mɔù cokɛ́ bɑ́ òmɑ́ɑ̀. Kɛ̀ bɛ̀ɛ bɛ̀ pĩ̀ńní kòo bɛ̀ kɔ̀tɛnɛ̀ Kisɔ̃ɔ̃ kó mborɛ̀ kɛ́ bɛ̀ fìé.

⁴¹Mɛm̀mɛ kɛ̀ Edii nɑ́kɛ́ Akɑbu kɛ dɔ̀: Kɔtɛ kɛ́di kɛ́yɑ̃̀, n kèèmu fɛtɑɑfɛ̀ kuɔ̀mmɛ̀.

⁴²Kɛ̀ Akɑbu nkɔri kɛ bo di kɛ́yɑ̃̀. Kɛ̀ Edii ítɛ́ kɛ́dekɛ Kɑdimɛɛdi tɑ̃rì yómmɛ̀ kɛ́nsĩ́ĩ́ nkòo yuu sokɛ́ o núù nsɑ̀ku.

⁴³Kòo nɑ́kɛ́ o kóo tɔ̃ntì kɛ dɔ̀: Ítɛ́ kɛ́dekoo kɛ́wéntɛ́ dɑ̀mɛ́ɛ̀rì bíɛ́kɛ̀. Kòo dekoo kɛ́wéntɛ́ kɛ dɔ̀: N yí yɑ̀ dɛ̀mɑrɛ̀ bɑ́ sɑ́m̀pɔ́. Kɛ̀ Edii ò nɑ̀kɛ́ kɛ dɔ̀: Nwĩɛ̃ti kɛ dɔ̀ kucɛ mɛ̀yiekɛ̀.

⁴⁴Kucɛ mɛyiémmɛ̀ mɔ̀nnì kòo tɔ̃ntìi wɛ̃tɛní kóò nɑ̀kɛ́ kɛ dɔ̀: N yɑ̀mu diwɛtirì dɑ̀mɛ́ɛ̀rì bíɛ́kɛ̀ kɛ̀ dì mɑ̀nnɛ̀ tɛnɔ̀ùtɛ̀ kó mɛpɛ̃kùmɛ̀. Kɛ̀ Edii dɔ̀: Dekoo kɛ́nɑ́kɛ́ Akɑbu kòo cɑ́tínnɛ́ o sɛ̃ĩ́ tɛnɑɑsɑ̃ntɛ̀ kɛ́cútɛ́ fɛtɑɑfɛ̀ yɑ̀ɑ̀ bo ò pĩ.