1Sauginemo Siba ḡalibonana waivinina i vaiye te ḡalibona Solomon isana i dididiga bi enaipatutu Bada lisinemo ba i nawa lisinemo bi waitala wapewapedimo i wailaulubu.
2Tana ena waibabada bi waiguyau ḡoneḡonedi, masi panepanedi, gold wapewapedi bi ḡakima kipokipolidi kamelo wapawapa dabedimo ai geludi bi a tavaitedi Solomon lisinemo. Bi ena waitala wapewapedi i noḡonoḡotidina taudidi Solomon i waitalaye.
3Bi Solomon waivini ena waitala matabudi i giu waididimani kovidi bi waitala ḡesau mote bamo lisinemo i pilipili.
4Sauginemo Siba ḡalibonana waivinina Solomon ena nuwauyauya bi ena animiya i ḡalaḡalana i kita te i visu kauwa.
5Bi kota kani benamo i kitedi, ena tauwaibabada edi animiya, ena taupaula edi gala waimatakanikanidi a kotedi, ena waen tautego lubudi bi gabuḡosa sewasewana Maimaituwa ena vanuwemo i gabugabudina i kitedi bi i sove gulata.
6Taunana aubaina ḡalibona Solomon i giuwena gado, “Egu dobumo e miyamiya bi em nuwauyauya bi bai matabuna kuna voivoiyedina ba lava a giuwegu bi e vaivaiyena ba niganana e kita te giukauwa.
7Mba laḡandimo a giugiuweguna mote yài sumaḡedi bi niganana tagu e tava bi mata otigumo em waiguyau e kita te i dididiga gulatana, kaka lava a giugiuweguna.
8Bi em taupaula bi em tauwaibada ba sa wainuwavisu gulata, tedi laḡan matabuna sa miya bi em nuwauyauya sa vaivaiye.
9Kasaḡesaḡe Bada em Maimaituwa lisinemo, tana i wainuwavisu bi waibadamo i sako saḡem te Islael lavedi edi ḡalibona. Tana ena nuwavaina Islael lavedi lisidimo ya kena nonoḡa, taunana aubaina i voiyem te kunai ḡalibona te didimanemo kwa labe kauwedi.”
