1Wati tjiḻpingku tjinguru kuya palyantjala nyuntu palunya payintjawiyangku purinypa wangkanytjaku palula, paapa nguwanpa. Yangupalangku kuya palyantjala palunya nyuntu pinangkatjunkunytjaku, nyuntupa maḻanypa nguwanpa.
2Wulkumanungku tjinguru kuya palyantjala palunya nyuntu payintjawiyangku purinypa wangkanytjaku, maama nguwanpa. Kungka yukarrangku tjinguru kuya palyantjala palunya nyuntu pinangkatjunkunytjaku, nyuntupa maḻanypa nguwanpa, kuya palyalkitjangku kulintjawiya kungka palula.
3Timitjiyi, nyuntu, Yiitjuku walytja tjuṯangkuṯarra waḻukuta tjuṯa yaṉṯayaṉṯantjaku, ngulytju tjanampawiyangka.
4Minyma waḻukuta tjinguru katja yuṉṯalpatjarra nyinanyi, tjinguru paluru tjamu, kapaḻi tjuṯatjarra, paluru tjana minyma waḻukuta palunya yaṉṯayaṉṯantjaku. Minyma paluru katja yuṉṯalpa tjananya yurrunpa yaṉṯayaṉṯaṉingi. Paluru tjana minyma palunya ngaparrtjingku yaṉṯayaṉṯantjaku, wulkuminarrinytjala. Paluru tjana palunya alatji tjukarurru yaṉṯayaṉṯantjala, Katutjanya tjanampa yunypa nyinaku.
5Yuwa, minyma waḻukuta ngulytjuwiyangka nyurrangarri Yiitjuku walytja tjuṯangku palunya yaṉṯayaṉṯantjaku. Minyma paluru Katutjanya kutju, tjapira nyinapayi yalatji, “Katutja, ngayulu nyuntupa tjukarurru nyinanyi, nyuntu kutu ngayunya yaṉṯayaṉṯala!”
6Minyma waḻukuta kutjupa tjuṯa, Katutjaku ngurrpa nyinanyi. Paluru tjana yulytja mani tiṉaku kutju kulira nyinanyi. Paluru tjana wiya kana kutu nyinaku Katutjaku ngurrangka.
7Yiitjuku walytja tjuṯanya tjananya wangka panyapa watjala!, Timitjiyi, waḻukuta ngulytjuwiya tjuṯa tjananya tjukarurru yaṉṯayaṉṯantjaku. Katja, yuṉṯalpa tjuṯangku, tjamu, kapaḻi tjuṯangkuṯarra, waḻukuta ngulytju tjanampa, tjana tjukarurru yaṉṯayaṉṯantjaku.
8Paluru tjana waḻukuta ngulytju, walytja kutjupa tjuṯaṯarra yaṉṯayaṉṯantjawiyangka Katutjanya tjanampa yunytjuwiyalpi nyinaku. Katutjaku wangkawana tjana wiyalpiya nyinaku. Katutjaku ngurrpa tjuṯangku walytja tjuṯa yaṉṯayaṉṯaṉi. Yaṉangu paluru tjana walytja tjuṯa yaṉṯayaṉṯalwiyangku wantirra wiyawanalpiya nyinaku, Yiitjuku walytjawiyalpi.
9Yiitjuku walytja tjuṯangku nyurrangarri waḻukuta kutjupa tjuṯa tjikitjiyi yiiyangka kalkuṉi nyinangutja tjuṯa wiyanyurra piipangka yini tjunkunytjaku. Waḻukuta rawa nyinangutja tjuṯa kutju nyurrangarri yaṉṯayaṉṯantjaku, tjikitjiyi yiiyangka munkarra nyinangutja tjuṯa. Palunya tjananya nyurrangarri piipangka yini tjunkunytjaku, yaṉṯayaṉṯalkitjangku. Miiṯa walytjaku tjukarurru nyinangutja tjuṯa kutjunyurra piipangka yini tjunkunytjaku.
10Yini tjunkukitjangku nyurrangarri yalatji kulintjaku, “Minyma waḻukuta paluru Yiitjuku tjukarurru nyinapayi. Paluru yaṉangu kutjupa tjuṯa yaṉṯayaṉṯalpayi. Paluru palumpa pipirri tjuṯa palyangku yaṉṯayaṉṯara kanyilpayi. Waḻukuta paluru yaṉangu ngurra kutjupa ngurrara tjuṯa paḻtjara ngurrangka ngarritjunkupayi. Paluru Katutjaku walytja tjuṯa palumpa ngurrangka yaṉṯayaṉṯalpayi. Paluru maralpa tjuṯa, puṯu kulilpayi tjuṯaṯarra yaṉṯayaṉṯalpayi.” Yalatji palya nyinapayi kutju nyurrangarri yini wakantjaku piipangka, yaṉṯayaṉṯalkitjangku.
11Minyma waḻukuta kutjupa tjuṯa, yiiya tjikitjiyingka kalkuṉi nyinangutja tjuṯa, nyurrangarri wiya tjananya yini tjunkunytjaku piipangka. Kutjupa tjuṯangku yalatji watjalku, “Tjiingkilaṉa nyinarra ngayulu Yiitjuku waarrka kutu palyalku.” Palunyatjanu tjana Yiitjuku waarrka palyara munupinarringkula wati kutjupakutulpi yankula nyinaku. Yalatjiya Yiitjuku waarrka palyara wantiku. Katutjanya wiya tjanampa yunypa nyinaku.
13Waḻukuta tjuṯa tjikitjiyi yiiyangka kalkuṉi nyinangutja tjuṯa Yiitjuku waarrka tjiingkilangku palyalkitjangku wiya tjana watjantjaku. Paluru tjana paṯara piyuku wati kutjupangka yankula nyinanytjaku. Tjinguru tjana Katutjaku waarrka tjiingkilangku palyalkitjangku watjara, yalatji wiyawanaya Yiitjuku waarrka palyara wantiku. Tjinguru tjana Katutjaku waarrka kutju palyalkitjangku watjara wantiku purrkarringkula. Paluru tjana minyma kutjupa tjuṯa yaṉṯayaṉṯalkitjangku, waaḻakutu yankula tjaalymara wangkaku, ngunytji, Katutjaku wangkawana wiya. Yalatjiya waaḻa kutjupa kutjupawana yankula tjaalymara wangkapayingkamarra,
14waḻukuta yiiya tjikitjipalangka kalkuṉi nyinangutja tjuṯa miiṯa kutjupaya mantjira nyinanytjaku. Miiṯa kutjupangkaya nyinarra pipirri mantjira tjananya yaṉṯayaṉṯantjaku, ngurraṯarra. Paluru tjana yalatji Yiitjuku tjukarurru nyinanytjaku, Yiitjuku tuunlayiki tjuṯangku nganaṉanya panypurangkutjipingka yalatji, “Nyurrangarrimpa waḻukuta tjuṯa ngurra kutjupa kutjupangka nyinarra tjaalymara wangkapayi, kuya tjuṯaya nyinanyi.”
15Ngayulu nyurrangarrinya yilta watjaṉi. Waḻukuta yangupala tjaampala Yiitjuku walytja nyinarra munupinarringkula nyinanyi. Paluru tjana Yiitjuku wangka wantirra mamuku yiwarrawanaya yananyi.
16Waḻukuta tjuṯa kanyilkitjangkunyurra yalatji kulintjaku. Minyma Yiitjuku walytjangku palumpa ngulytju waḻukuta nyinanytjala palunya yaṉṯayaṉṯantjaku, Yiitjuku walytja kutjupa tjuṯangku waḻukuta palunya yaṉṯayaṉṯalpayingkamarra, paluru tjana waḻukuta ngulytjuwiya tjuṯanya kutju yaṉṯayaṉṯantjaku.
17Ingkaṯa tjaampalangkunyurra Katutjaku waarrka tjukarurru palyaṉi. Yiitjuku walytja tjuṯangku waṉinytjaku, wiitjimani nyurrangarrimpa. Katutjaku waarrkanyurra tjukarurru palyara palumpa wangka tjukarurru tjakultjunkunytjala, tjana mani tiṉa waṉinytjaku.
18Yalatji Katutjaku wangka ngaranyi, “Tjakumanungku naanytja waarrkamilara katirra mangarri yunganyi, wiya wantinyi. Naanytjangku waarrkarringkula ngalkuṉi. Yalatjiya pulukaṯarra waarrkamilara yunganyi.” Palunya nguwanpa ingkaṯangku Katutjaku waarrka palyara ngalkunytjaku. Palunyatjanu Yiitjuku walytja tjuṯanyurra ingkaṯaku mani yungkunytjaku, palya paluru mani an mangarritjarra nyinanytjaku. Katutjaku wangka kutjupa yalatji ngaranyi, “Yaṉangu waarrkarringutjangka, wiitjimanira yungkunytjaku.”
19Timitjiyi, kulila! Tjinguru kutjupangku yankula nyuntunya alatji watjalku, “Ingkaṯangku kuya palyaṉu.” Paluru alatji watjantjala, nyuntu kulira wantinytjaku. Tjinguru yaṉangu maṉkurrpangku yankulanta tjukarurru wangka panyapa tjakultjunanyingka, nyuntu kulintjaku yalatji, “Nganaṉa miitingingka tjungurringkula wangkanytjaku.”
20Tjinguru paluru kutu kuya palyaṉingka, nyurrangarri Yiitjuku walytja tjuṯa miitingingka tjungurringkunytjaku. Tjungurringkulanyurra ingkaṯa palunya marrkuntjaku, paluru tjukarurrulpi nyinanytjaku. Yalatjinyurra ingkaṯa palunya marrkuntjala, ingkaṯa kutjupa tjuṯangku yalatji kulilku, “Ngayulu kutu tjukarurru nyinanytjaku, yaṉangu tjuṯangku ngayunya payilpayingka.”
21Wangka palunya tjuṯa ngayulu piipa ngaangka tjunu nyuntu riitarringkula kulira palulawana palyantjaku. Yalatji nyuntu palyantjaku Katutjanya Yiitju Kurayitjanyaṯarra yunytjurringanyi, ilkari ngurrara tjuṯaṯarra. Tjinguru Yiitjuku walytjangku kuya palyantjala nyuntu yankula palula purinypa wangkanytjaku paluru kulira tjukarurrulpi nyinanytjaku. Tjinguru ingkaṯa tiṉangku kuya palyantjala nyuntu nguḻurringkunytjawiyangku yankula palula purinypa wangkanytjaku, paluru kulira tjukarurrulpi nyinanytjaku.
22Tjinguru nyuntu kulilku Timitjiyi, yalatji, “Wati palatja palya Yiitjuku nyinanyi. Nganaṉa kuwarri palula mara tjunkula ngaratjunkunytjaku, Katutjaku waarrka paluru palyantjaku.” Yalatji kulira nyurrangarri paṯantjaku, ngulaku. Paluru kutu Yiitjuku tjukarurru nyinanytjala ngula nyurrangarri mara tjunkula palunya ngaratjunkunytjaku. Wangka kutjupaṉanta watjaṉi. Yiitjuku walytja tjuṯangku kuya palyantjala wiya nyuntu tjungurringkula kuya palyantjaku, nyuntu tjukarurru Katutjaku kutu nyinanytjaku.
23Ngayulu kuliṉi, nyuntu miiṉṯa kutu nyinapayi. Nyuntu wayina wiima tjikila mirritjina nguwanpa!, palyalpin nyinaku.
24Katutjaku waarrkaku yaṉangu ngaratjunkunytjakunyurra purinypa kulintjaku. Yaṉangu kutjupa tjuṯangkuya kuya yuti palyalpayi. Palunya tjananya nyurrangarri nyakula wiya ngaratjunkunytjaku. Yaṉangu kutjupa tjuṯangku yarrkayarrkangku kuya palyalpayi, ngula kutju nyurrangarri kulilku yalatji, “Ngaratjunkuwiyangku nganaṉa paṯara nyanganyi. ‘Tjinguru paluru kuya palyalku?, tjinguru wiya.’ Wiyangka nganaṉa palunya ngaratjunku.”
25Palunya nguwanpa yaṉangu kutjupa tjuṯangkuya yuti tjukarurru palyalpayi. Yaṉangu kutjupa tjuṯangku yarrkayarrkangku tjukarurru palyalpayi. Yarrkayarrkangku tjukarurru palyantjala ngula nganaṉa yalatji kulilku, “Yurrunpa wiya nganaṉa ninti nyinangu, paluru tjukarurru palyantjala. Kuwarri kutju nganaṉa kuliṉi paluru yilta tjukarurru palyalpayi.”
