1Ranra vahekura rankea huontenka, negafanku'ma nehanaza hunka fru kefinti antahigo, hanki kahefa vahera negfuma huntenaku nehanaza hunka azeri so'e nehunka,
2ranra a'nea negrerama hunentana kna hunentenka, kahefa a'nea, negasaroma hunentanankna hunka knare antahintahifi fatgo kazigati kva huzmanto.
3Mago kva krintega vahe'ma omni'nesia kento a'nea, kva krizamanteho.
4Hu'neanagi mago kento a'ma mofavre'afi, negehoma maninesuno'a esera zamagra rempi hu'za mono'mo hu'nea kante nozamifi zamarera zamafaza kva krizmante'naza nona hu'za kva huzmanteho, Anumzamofona e'inahu zanku ave'nesie.
5Ana hianagi agraku nemnisia kento a'mo, Anumzante amentinti nehuno hanine zgene nunamuna huno Anumzana antahigegahie.
6Hu'neanagi mago kento a'mo agri'ma avenesia zankuke agesa nentahimo'a, kahefa mani'neanagi avamupina ko fri'ne.
7Vahe tmina ama naneke zamasmige'za avaririho, e'ina hananke'za mago'amo'za ke huzmante kanku hakegahaze.
8Hianagi mago'mo kora fatgo'a zamazeri so'e osuno, naga'a zamazeri so'e osnimo'a, amentintimo'a amne zankna hanigeno, zamentinti nosnaza vahera zamagtereno haviza hugahie.
9Hanki kento a'nea zamazama hunaku zamagima kresafina 60ti'a zge kafuma huno, nevente mani fatgo hu'nesia kento a' aza hugahaze.
10Ana kentomo knare avu'ava nehiaza negesageno, mofavre zga'a negrino, aru vahe agampu nehuno, mono kva vahe zamaga sese nehuno, knafi mani'nesaza vahe zamaza nehuno, ana eri'zama'a arimpa amino knare huno erigahie.
11Hu'neanagi kahefa kento a'nea zamaza hunaku zamagima kresafina onkreho, na'ankure zamesi'zamo zamazu hanige'za Kraisimpi hanaveti'za nemniza'za atre'za ve erigahaze.
12Ko'ma huvempa hu'naza kea anama hazazamo rufu'tagige'za, kea eri'za zamufafi eme nentaze.
13Eri'za e'ori amne mani'neza, ru nompi ru nompi mreritere nehu'za, nosuna naneke nehu'za, rumofo nanekere zamefiga'a ke hu'za vano nehu'za, osuga naneke nehaze.
14Nagrama nagesa nentahuana, kahefa kento a'nemo'za ve eri'za mofavre nente'za, no zamia kegva nehnage'za, huhavi'za huzmanteku hanaza vahe'mo'za kegura hakregahaze.
15Na'ankure mago'amo'za hago kana atre'za Sata nevririze.
16Hagi mago amentinti nehnia a'mo naga'afi kento a'nema mani'nesazana, agra knare'za huno ana a'neramina zamaza hanigeno'a, mono vahera kna eri ozamisageno, zamagra'zmi zamaza huga osune'naza kento a'nea, mono vahe'mo'za zamaza hugahaze.
17Elda vahera, Anumzamofo eri'zante kvagri so'e nehza vahera, zamagi erisaga nehuta antegna huta zamiho (dabol ona), e'ima hanaveti'za mono ke nehu'za, rempima hunezmi'za vahera zamaza hugahaze.
18E'i ana kante mono avo tafe'mo amanage hu'ne, Bulimakamo witi rga refuzafupeno anoma'a neharesigenka, zamagitera nofira ana'okiho. (Diu-Kas 25:4) Anazanke huno eri'zama erisia nona'a mizama'a erigahie. (Luk 10:7)
19Elda ne'ku rumo'za kna ami ke huntesaza kea ontahio, hianagi tagufa vahe'mo'o, tare vahe'mo'ma huramage hanigenka ana nanekea antahio.
20Hanki kumi'ma nehza kva vahera, hakare vahe zamufi zamazeri fatgo nehuge'za, maka vahe'mo'za nege'za, kumi' huzankura kore hugahaze.
21Anumzamofo avufine, Krais Jisasi avufine, huhampri zamante'nea ankero vahe'zmufi kasamuanki, ama nanekea amage' antenka vahera refko osunka, mago zanke hunka zamesi zamanto.
22Ame'ama hunka kzana mago vahetera antenka mono eri'za erisie hunka azeri o'otio. Mago'a vahe'mo'za kumi' hanafina kagra ana kumi'zampintira kagra manigru hunka manio.
23Tinkera onenka, osi'a waini tina nenegeno krimpamofona kza hino, na'ankure hakare zupa krima enerinkure.
24Mago'a vahe'mofo kumi'mo'a amate me'ne, kegaga hunte knare koteno vugahie. Hanki mago'amokizmi kumi'moa frakino me'neankino henka efore hugahie.
25Anahu kante, hakare vahe'mokizmi knare zamu'zmamo'a amate me'ne. E'ina higeno mago'a vahe'mofo knare zamuzmamo'a oku'a me'neankino, henka'a efore hugahie.
