1Mo koke haliweki na tolu lu pelepateta꞉ naka꞉ apa꞉ pa꞉ta꞉ ale tupa꞉ homu piki pimanu lapeke. Panake haliweki make naka꞉ kame tupa꞉ kone epeaapeke.
2Koke wanda꞉weki make naka꞉ ama꞉ tupa꞉ kone handeteke hata꞉ta꞉ panake wanda꞉weki make naka꞉ ana꞉ leke tikitiki piki hauma꞉ homeke handeteke hapeke.
3Kosa꞉piki wanda꞉ ma꞉nda꞉ ota꞉ ipika꞉ honumake siki hala꞉eki handeka꞉na꞉ta꞉ kota꞉ ipiki tamba꞉ muluekema꞉ hone epeke u hapeke.
4Pate ipika꞉ wekiwandiki o eiyeke wanekena꞉ wekiwandiki haya꞉ka꞉na꞉ta꞉ kota꞉ ikana꞉ma꞉ amba꞉la ika꞉ koke wanda꞉ handeteke hasa꞉ hau pea꞉pa꞉peke ya꞉la꞉me. Kutu piki hau pimika꞉na꞉ta꞉ kota꞉ mo hande ateke inkiki make aeyeke meiyekema꞉ iki pa꞉ta꞉ pimi ekimanu hombo peaasememe. Koto hauma꞉ta꞉ Koda꞉ ta꞉na꞉ma꞉ homaasa꞉me.
5Kosa꞉piki wanda꞉ ma꞉nda꞉ta꞉ ipiki tamba꞉ mina꞉yeke ipika꞉ tapake wanda꞉hali ma꞉nda꞉ dia꞉yalo ipika꞉ honumake siki haya꞉ka꞉na꞉ta꞉ kota꞉ Koda꞉ma꞉ ipiki handeteke haena꞉ ipiki pa꞉ta꞉ hone ti lao hala꞉me. Kutu pitolo hata꞉ta꞉ Koda꞉ma꞉ ipiki tamba꞉ mina꞉yeke ipikana꞉ma꞉ timba꞉ nate yaapona꞉ honke pa alo alo hata꞉ yeni pu hala꞉me.
6Pate kosa꞉piki wanda꞉ ma꞉nda꞉ma꞉ ipika꞉ lokena꞉ namonamo pita꞉la꞉ ekimanu homekena꞉ hone u haya꞉ka꞉na꞉ta꞉ kota꞉ koto wanda꞉ ipikita꞉ pa hala꞉pate kone ipika꞉ temokota꞉ homa ula꞉me.
7Wanda꞉halima꞉ iki pa꞉ta꞉ hoela꞉me laama꞉na꞉ do mana꞉ pimanu wanda꞉weki pa꞉ta꞉la hala꞉tiki pu hapa꞉peke.
8Kutu pilipipate ma꞉nda꞉ hali epima꞉ ipika꞉ tapakemanu o ota꞉ ipika꞉ wekiwanda꞉ epeke tupa꞉ na handeteke haya꞉ka꞉na꞉ta꞉ kota꞉ koto someta꞉ mo Ketiso hau kiaaso toopi mea baasa꞉me. Kutu piki somena꞉ hoke hauma꞉ta꞉ mo pi na miki wanda꞉halina꞉ hoke hau lombei pea ota꞉ hoela꞉me.
9Mo kosa꞉piki wanda꞉wekina꞉ biki ula꞉ wapena꞉ta꞉ dupiki wanda꞉na꞉ biki homeke wia꞉peke. Wanda꞉ ma꞉nda꞉ ipika꞉ bapi hali tieke tepo paeya꞉ka꞉na꞉ make ipikita꞉ hali homekena꞉ da peeke wanda꞉ make
10wanda꞉halima꞉ epeke hau pia꞉ wanda꞉e aleme wanda꞉ make ipika꞉ wekiwandiki epeke tupa꞉ handeteke haya꞉ wanda꞉ make na handeke da ma꞉nda꞉ wanda꞉hali epemeke handa꞉mea wamo pia꞉tiki pieke wanda꞉ make Ketiso yankeketonu oto nane hata꞉ tamba꞉ mieke wanda꞉ make ka꞉nda꞉ mina꞉la꞉ wanda꞉hali petelea꞉ wanda꞉ make epeke haumanu puluekema꞉ hone wopu u hayeke wanda꞉ make kosa꞉piki wanda꞉ homekema꞉ koto hau paeyao tonka꞉na꞉ apa꞉tao pea꞉tiki pieki handemeka꞉na꞉ta꞉ kota꞉ ipika꞉ biki wape pea꞉peke.
11Kutu pulu pa꞉la꞉pate mandane moputali kosa꞉piki wanda꞉manu ika꞉ bikimanu wape pea na apa꞉taapeke. Pa ekipeke. Ikana꞉ma꞉ ika꞉ lokena꞉ hone pelemeeki hone witolo hata꞉ hali ma꞉nda꞉na꞉ da puluekema꞉ Ketiso hoki walaa pelimikie.
12Kutu pimikina꞉ta꞉ ika꞉ Ketiso pa꞉ta꞉ amba꞉la la꞉ wimiki pimanu yambilimikie.
13Kutaa make kutupiki kosa꞉piki wanda꞉wekima꞉ da yalayala pu pominolo hata꞉ ika꞉ e poka꞉peke natemanu hoeyaalememe. Koto hau homeke dia꞉pate ikana꞉ma꞉ kotoeki ota꞉ lombeipiki hoke hau ma꞉nda꞉ta꞉ dupa. Mandane wanda꞉halina꞉ hau hotiata꞉ la꞉ mundula mundula pitolo hata꞉ mo ota꞉ lapeke na ya꞉la꞉ ekimanu la꞉ tiatia pu halememe.
14Mo a꞉nda꞉ piteleme wanda꞉halima꞉ niki pa꞉ta꞉ hoke pi loluekema꞉ waleke wiaama꞉na꞉ mo Ketiso hala꞉ moputali kosa꞉piki wanda꞉wekita꞉ pa hali ma꞉nda꞉na꞉ da pua wekiwandiki mendia ika꞉ da handeteke haena꞉e hone witolome.
15Pate mandane kosa꞉piki wanda꞉ manuta꞉ paa la꞉ka꞉la Sadani teli mea pelememe.
16Kutu pu halemepate Ketiso wanda꞉ ma꞉nda꞉ ipika꞉ tapake kosa꞉piki wanda꞉manu ma꞉nda꞉ haya꞉ka꞉na꞉ta꞉ kota꞉ mo Siosi tapake pa꞉ta꞉ ka꞉nda꞉ wiaama꞉na꞉ ikita꞉ ipikana꞉ma꞉ handeteke hapeke ya꞉la꞉me. Kutu pia꞉ka꞉na꞉ta꞉ mo siosi tapakema꞉ ota꞉ mo honumake siki haleme kosa꞉piki wanda꞉weki ota꞉ epeke tupa꞉ handeteke haena꞉ waleke wilieke.
17Ika꞉ you haliwekima꞉ wanda꞉hali handeteke hata꞉ e epeke tupa꞉ pokemeka꞉na꞉ta꞉ ika꞉ biki a꞉meiyaaso yenki ana꞉na꞉ haka꞉ta꞉pao mina꞉e hone wia꞉peke ya꞉la꞉me. Mo pi wala꞉pekeeki o mana꞉ moka꞉la꞉ tiaaso hata꞉ ota꞉ honkopu hao wopu pokemeka꞉na꞉ta꞉ kota꞉ kutu piki you haliweki pa꞉ta꞉ amba꞉la hone wia pea꞉peke.
18Do alo ekina꞉ mo Baiboloma꞉ alota꞉ Kaoma꞉ palaowa kilikimanu ambuku mea baaluekema꞉ ankema꞉ e pokolo haena꞉ta꞉ ipika꞉ kake anka꞉ta꞉pu na pea꞉peke lo make mo e poka꞉la꞉ halima꞉ta꞉ ipika꞉ e poka꞉la꞉ yenki mia꞉peke ya꞉la꞉me laa wape pea ula꞉me.
19Wanda꞉hali homekema꞉ alota꞉ Mo you halima꞉ ata꞉ka꞉piki hau pia꞉me lea꞉ka꞉na꞉ta꞉ na opua꞉peke. Koto pilipipate hali yaapo tepoma꞉ a꞉nda꞉ a꞉pa lea꞉ka꞉na꞉ta꞉ kota꞉ opua꞉peke ya꞉la꞉me.
20You halima꞉ a꞉nda꞉ hoke hau pia꞉ka꞉na꞉ta꞉ kota꞉ mandane you haliwekima꞉ handolo hata꞉ hone wina꞉ ika꞉ leke potopoto kone ipika꞉ hoke hau pa꞉la꞉eki laa la halaata꞉ sa꞉sa꞉ pea꞉peke.
21Mo Koda꞉ make Ketiso Yesu make mo ma̱leke lila꞉ enisolomanu make iki paeyaona꞉ leke potopoto hata꞉ I̱ma꞉ neke pa꞉ta꞉ la꞉ witolo pita꞉ dupa alome. Nakana꞉ma꞉ homeke pa꞉ta꞉ homeke puki wita꞉la꞉ hau na pu make mandane tapake homeke na petolo pikita꞉ do ya pea꞉peke alo ekita꞉ ota꞉ paeyao pa꞉ta꞉ hone witolo hata꞉ pea꞉peke.
22Hali ma꞉nda꞉ma꞉ siosi pa꞉ta꞉ Koda꞉na꞉ e pokaena꞉ta꞉ na hondoma꞉ tiake hata꞉ kiki wita꞉la꞉ hau a̱i̱ na pea꞉peke. Mandane wanda꞉halina꞉ hoke hau neke pa꞉ta꞉ na mundilina꞉ leke naka꞉ hauta꞉ yako pea hapeke.
23Neketa꞉ yeni mea꞉tiki pu haeka꞉na꞉ta꞉ naka꞉ welekema꞉ epeke e pokena꞉ ikali homeke na neke waini siki make apa꞉tao napeke.
24Mandane wanda꞉halina꞉ hoke hauta꞉ peneme peneme yao ula꞉me. Koto ekima꞉ta꞉ pi yokaalu pia꞉peke nate opolo epea꞉ka꞉na꞉ta꞉ ika꞉ hoke hauma꞉ta꞉ iki hatuku ipilieke. Pate mandane wanda꞉halina꞉ hoke hauta꞉ wetepe nane peneme yaeya꞉ka꞉na꞉ta꞉ handa꞉ wilimikie.
25Mandane epeke haumanu make koto tupa꞉ kone peneme peneme yao ula꞉me. Kutaata꞉ mo ota꞉ peneme na ula꞉ epeke hau mandane ekimanu maketa꞉ a꞉mbao wia꞉peke na ya꞉la꞉me.
