1Le phuredere manušeske ma dovaker zoraha, ale dovaker leske sar dadeske, le ternederenge sar phralenge,
2le phuredere džuvľenge sar dajenge a le ternedere džuvľenge sar pheňenge, andre savoro žužipen.
3De pačiv le vdoven, save hine čačes vdovi.
4Bo te hin varesava vdova čhave abo vnučata, on pes ešeb (peršo) mi sikaven te avel pobožna andre peskero kher oleha, hoj den pale o lačhipen le dajenge the le dadenge, bo oda hin šukares anglo Del.
5E čači vdova, savi hiňi korkori a nane la ňiko, pes zmukel pro Del a rat-džives hiňi andro modľitbi the mangipena.
6Ale ajsi vdova, savi dživel rozmukles, hiňi muľi, choc dživel.
7Prikazin lenge kada, hoj ňikas pre lende te na el so te phenel,
8bo te pes vareko na starinel pal peskere pašutne a na mek pal peskeri famelija andral peskero kher, akor zaprinďa o pačaben a hino goreder sar o napačabnaskere.
9Rachinel pes vdovake odi, savake hin buter sar šovardeš (60) berš a sas ča jekhvar veraduňi
10a džal pal late o lačho hiros, hoj kerelas o lačhipen, bararďa avri le čhaven, prilelas le hoscen, thovelas (omorelas) o pindre le sentnenge, pomožinelas olenge, save hine andro pharipen, a kamelas te kerel savoro lačhipen.
11Ale ma rachin le ternedere vdoven, bo sar len cirdela te džal romeste, šaj pes visaren le Kristostar
12a anen pre peste o sudos, bo na doľikerde oda ešebno lav, so les dine.
13A mek ke oda ča sikľon ňič te na kerel, ča te phirel kher kherestar a na ča, hoj na keren ňič, ale paš oda vakeren pal oda, so lenge na kampel, keren o pľetki a thoven pes andre savoreste.
14Vašoda kamav, hoj o terneder vdovi te džan romeste, te el len čhave a te starinen pes pal peskere khera, bo oleha na domukena olenge, save pre amende džan, hoj pal amende te vakeren namištes.
15Bo varesave vdovi pes imar visarde pale a džan pal o satan.
16Te varesava pačabnaskera džuvľa hin vdova andre lakeri famelija, mi starinel pes pal late, hoj te na el pre khangeri o starišagos, hoj e khangeri pes te starinel pal ola, save hine čačes vdovi.
17Le staršen, save mištes ľidžan e khangeri, kampel te del duvar ajci pačiv; no mek buter olen, save služinen andro lav a sikaven.
18Bo hin pisimen: “Na phandeha o piskos la gurumňake, savi kerel buči, hoj te na chal”; a: “Oda, ko kerel buči, zasogaľinel (zaslužinel) peske o počiňiben.”
19Te tuke phenela vareko vareso pre oda, ko ľidžal o zboros, ma prile oda, te nane duj abo trin švedki.
20Olen, save keren bini, karhin anglal savoredženende, hoj pes te daran the okla džene.
21Mangav tut anglo Del, anglo Ježiš Kristus the anglo avrikidle aňjela, hoj tut te ľikeres pal kada a te aves čačipnaskero ko dojekh a te na kides tuke avri ňikaskeri sera.
22Ma thov pre ňikaste sig o vasta a te na chal tut ňič avrengere binenca. Ľiker tut, hoj te aves žužo.
23Ma pi imar ča paňi, ale pi po sikra the mol, bo furt tut dukhal e džombra a furt sal nasvalo.
24Varesave dženengere bini igen dičhol a džan anglal lende pro sudos, aver dženengere bini pes sikavela, sar ela o sudos.
25Avke the o lačhe skutki igen dičhol a te len mek na dičhol, našťi ačhena garude.
