29 ዬሱሴ ጎቺ ዔኪ ካታማፓ ዙሎ'' ኬሴ''ኔ፤ ዬና ካታሜላ ማዢንቴሢ ዹኬ ዑስካታሢሮ ዒዛ ዔያታ ጎኦቦ'' ሂዒ ዳካኒ ኮዒ ዔኪ ዓኣዼኔ።
30 ዒዚ ጋዓንቴ ዔያቶኮ ባኣኪና ቶሊ'' ዴንዴኔ።
31 ዬካፓ ዬሱሴ ጌሊላ ዓጮ''ይዳ ዓኣ፥ ቂፒርናሆሜ ካታሜሎ ዴንዲ ዒኢካ ዴሮ'' ዓይሁዶ ዓሶኮ ሓውሾ ኬሎ''ና ዔርዛኔ።
32 ዒዚ ቢታንቶና ኬኤዛሢሮ ቢያሢ ዒዛኮ ዔርዚፆና ዲቃቲ ሄርሻኔ።
33 ዒኢካ ዓይሁዶ ዓሶኮ ቡኪንቶ ቤዛ ፑርታ ዓያና ዓርቄ ዓሲ ዓኣኔ፤ ዒዚ ዼኤፒ ዑኡሲና ሂዚ ጌዒ ዒላቴኔ፦
34 «ናዚሬቶ ዬሱሴ! ኑኡኮ ኔኤና ዎላ'' ዓይጎ ካኣሚሢ ዓኣይ? ኑና ኔ ባይዛኒ ሙኪያ? ኔ ዖና ማዔቴያ ታ ኔና ዔራኔ፤ ኔኤኒ ዱማዼያ ፆኦሲ ናይኬ!»
35 ዬሱሴያ ማሃዖ ፑርቶ ዓያናሢ፦ «ዚቲ ጌዒ፥ ሃያ ዓሢፓ ኬስኬ!» ጌዒ ጎራ''ዛ፥ ፑርቶ ዓያናሢ ዓሢ ዴሮ''ኮ ቤርታ ሎንሤስካፓ ፔቴ''ታዖ ዔኤቢ ዎኦቱዋዖ ኬስኬኔ።
36 ቢያሢ ዲቃቲ ሄርሻዖ ዎሊ ኮይላ''፦ «ሃይ ዎዚጉዴ ባኣዚ''ዳይ? ቢታንቶና ሓሣ ዎልቄና ፑርቶ ዓያኖ ዒዚ ዓይሣኔ፤ ዔያታኣ ዒዛም ዓይሢንቲ ኬስካኔ» ጌዔኔ።
37 ዬሱሴኮ ሱ'ንፃ ዬኖ ዓጬ''ሎ ኮይሎ''ይዳ ቢያ ዋይዚንቴኔ።
38 ዬሱሴ ዓይሁዶ ዓሳ ቡኪንታ ቤዛፓ ዔቂ ሲሞኦኔ ማኣሪ ዓኣዼኔ፤ ዒኢካ ሲሞኦኔኮ ባይሳ ሚርጌና ቆፂንቲ ላሂ ዓኣኔ፤ ዬያሮ ዒዞ ዒ ፓሣንዳጉዲ ዬሱሴ ዔያታ ሺኢቄኔ።
39 ዬሱሴያ ዒዞ ባንሢ ዑካዖ ዓጫ ዒዞኮ ዔቂ ቆሣ ሺማንዳጉዲ ዓይሣዛ ቆሣ ዒዞኮ ሺሜም ቤዞማና ዔቂ ዒዛ ዔያቶ ሾኦቺንሥሢ ዓርቄኔ።
40 ዓባ'' ጌላኣና ዓሳ ዱማ ዱማ ሃርጌና ዓኣ ዓሲ ቢያ ዬሱሴ ባንሢ ዔኪ ሙካዛ፥ ዒዚ ፔቴ'' ፔቴ''ሢኮ ዑፃ ኩጮ ጌሢ ፓሤኔ።
41 ፑርቶ ዓያና''ኣ፦ «ኔኤኒ ፆኦሲ ናኣዚ''ቲ!» ጌዒ ጌዒ ዒላቲ''ና ዓሶይዳፓ ሓሺ'' ኬስካኔ። ዒዚ ሜሲሔ ማዔሢያ ዔያታ ዔሬኔ፤ ዬሱሴ ጋዓንቴ ዒዛ ዛሎ'' ፔቴ''ታዖ ኬኤዙዋጉዲ ዔያቶ ጎሪ'' ላኣጌኔ።
42 ሳዓ ካራዛ ዬሱሴ ዒኢካፓ ኬስኪ ዓሲባኣ፥ ዔዌ ቤሲ ዴንዳዛ ዓሳ ዒዛ ዒማ''ና ኮዓኔ፤ ዔያታ ዒዛ ዴንቃዖ፦ «ኑ ኮራፓ ዴንዲፖ» ጌዒ ሺኢቄኔ።
43 ዒዚ ጋዓንቴ፦ «ሜሌ'' ካታሞ ታ ዴንዲ ፆኦሲ ካኣቱሞ ኮዦ ሓይሶ ኬኤዛንዳያ ታኣም ኮይሳኔ፤ ታ ዳኪንቴሢ ዬያሮኬ» ጌዔኔ።
