1मिनु इस्राएलीपुकीमी मटिथु, खतम सेल्चा माल्शो परमप्रभु यावे आ थोव़क रे खुइ पाम्तेक्म। यहूदा आ थर ङा जेराह आ युइ, जब्दी आ चच, कारमी आ तौ आकानमी मलाइक्चा थोव़क रे पा मार मार खुइ पा लदा बाक्त। मोपतीके परमप्रभु यावे इस्राएली नेल्ल आन कली तशा चुरमाक्त। यहोसु ६:१८
2मिनु यहोसुमी यरीको रे बेथेल आ पूर्ब बेथ-आवेन आ नेक्था ऐ सहरमी मुर आन कली सोइक्ताक्व। मिनु मेको आन कली “गेपुकी मेक लशा, मेको रागी कली क्यारी पन” दे माइक्तु। मिनु मेको मुरपुकी लशा, मेको ऐ सहर कली क्यारी पाम्तेक्म।
3मिनु मेकोपुकीमी यहोसु बाक्तीक लेश्शा जाक्शा “मुर नेल्ल ऐ सहरम लचा ममाल्नीम। निक्शी सां हजार मुर ला लशा, लडाइ पाम्तेक्म हना, ग्रानीम। नेल्ल कली श्येत मगेन। मारदे हना मेकेर शुश मुर मबाक्म” देंतेक्म।
4मोपतीके हजार सां खोइ मुर ला लाम्तेक्म। तन्न मेकोपुकी ऐ सहर ङा मुरपुकी नु लडाइ ब्रुशा, प्रोक्शा लेत्तेक्म।
5मिनु ऐ ङा मुरपुकीमी ३६ जना इस्राएली आन कली साइक्तेक्म। मेकोपुकीमी सहर ङा ठेयब लाप्चो रे शेबारीम ङा लुक्च लतीक लां सम्म खेदा पा, मेको आन कली साइक्तेक्म। मिनु इस्राएली आन थुं लुक्च लशा, शुश हिंतेक्म।
6मिनु यहोसु नु इस्राएल ङा खाल्पापुकीम सुर्ता पा आंम वा खाक्शा, पियामी फुरक फुइश्शा, परमप्रभु यावे आ कबल पशो सन्दोस आ नेक्था पोक्च थेक्शा, मेकेर नाक्दो सम्म बाक्तेक्म।
7मिनु यहोसुमी “परमप्रभु, परमप्रभु यावे, मारदे गे मेको मुर आन कली यर्दन खोला शोक्चा गेनी? मारदे गे आंइ कली एमोरी आन गुइमी साइक्चा कली गेनी? गो यर्दन आइक्ची हांबु ठीक पा बाक्शो नकी।
8परमप्रभु, इस्राएली आन जोरी सत्रु रे प्रोक्चा माल्तेक्म। गो मुल मार पाइनुङा ङा?
9मारदे हना कनानीपुकी नु एको रागी ङा मुर नेल्लेमी एको लोव़ नेंशा, आंइ कली पुम्नीम। मिनु आंइ नें रागी रे पा क्याम्नीम। मिनु गे इन ठेयब नें आ पर्बम मार पाइनीनी?” दे परमप्रभु यावे कली लोव़ पाप्तु। प्रस्थान ३२:१२
10मिनु परमप्रभु यावेमी यहोसु कली “बोक्को। गे मारदे इ कुल खुक्शा, बाप्शा बाक्नेवे?
11इस्राएलीपुकीमी पाप पाम्तेक्म। मेकोपुकीमी आं माइश्शो ‘पचा माल्ब’ दे पशो कबल प्रोंइतेक्म। खतम सेल्चा माल्शो थोव़क खुइ पा लाइश्शा, आंम थोव़क नु ब्वाइश्शा, ख्रुइश्शा वोइक्तेक्म।
12मोपतीके इस्राएली आन जोरी सत्रु आन कली तशा, प्रोक्नीम। मारदे हना मेकोपुकी यो खतम सेल्चा माल्शो दुम्शो बाक्नीम। मेको आन खतम सेल्चा माल्शो ख्रुइश्शो थोव़क इन दाते रे मग्रुंइताक्नी हना, गो गे नु मबाक्नुङ।
13बोक्को। मुर आन कली आं ङोंइती ठीक सेल्पतो। मिनु मेको आन कली गे दीसा कली परमप्रभु यावे आ ङोंइती ठीक सेल्सीन। मारदे हना परमप्रभु यावे, इस्राएली आन परमप्रभुमी इन दातेमी खतम सेल्चा माल्शो थोव़क बाक्नीम। मेको मग्रुंइताक्वी हना, इन जोरी सत्रु क्येङा ग्राने मचाप्नीनी। यहोसु ३:५
14मिनु गे सुनी कना थर थर ङा मुरपुकी बुक्शा, जाक्चा माल्नीनी। मिनु परमप्रभु यावेमी तेको थर कली कोंइबा, मेको थर ङा नेल्ल खिं खिं ङा मुरपुकी जाक्चा माल्नीम। मिनु परमप्रभु यावेमी तेको खिं ङा मुर कली कोंइबा, मेको आ खिं खिं ङा मुर आन ङोंइती जाक्चा माल्नीम। मिनु परमप्रभु यावेमी तेको खिं कली कोंइबा, मेको खिं रे का का पा वोंइश मुरपुकी मुर आन ङोंइती जाक्चा माल्नीम।
15मिनु तेको मुर नु खुइ पशो थोव़क बाक्बा तुंइसीब, मेको नु आ मारेइ मारेइ मीम हुम्चा पुंइसीब। मारदे हना मेकोमी परमप्रभु यावे आ देंशो मटिथु, इस्राएली आन दातेमी काइ मरिम्शो ग्रांग्रा दिशो गेय पाप्तु” दे माइक्तु।
16मिनु यहोसुमी सुनी कना बोक्शा, इस्राएली नेल्ल आन कली थर थर पा बुक्पाइक्तु। मो पशोनु यहूदा आ थर कोंइचा पुंइसाक्व। १सामुएल १०:२०-२१; १सामुएल १४:४१-४२
17मिनु यहूदा आ खिं खिं ङा मुर आन ङोंइती जाक्चा माल्तेक्म। मिनु जेराह आ खिं खिं ङा मुर कोंइचा पुंइसाक्म। मिनु यहोसुमी जेराह आ खिं खिं ङा मुर आन कली आ ङोंइती जाक्पाइक्तु। मेको रे जब्दी आ खिं ङा मुर कोंइचा पुंइसाक्व। गन्ती २६:२०
18मिनु यहोसुमी मेको आ खिं ङा वोंइश मुर का का पा मुर आन ङोंइती जाक्पाइक्तु। मोपा जाक्मानु, यहूदा आ थर ङा जेराह आ युइ, जब्दी आ चच, कारमी आ तौ आकान कोंइचा पुंइसाक्व।
19मिनु यहोसुमी आकान कली “आं तौ, परमप्रभु यावे, इस्राएली आन परमप्रभु कली ठेयब सेलो। मार मार पवी, मेको कली देनो। इ पशो आं कली देनो। लोव़ का यो मख्रुइक्तो” देंत।
20मिनु आकानमी यहोसु कली “थमा, गो परमप्रभु यावे, इस्राएली आन परमप्रभु आ ङोंइती पाप पाता। गो मार पाता देंशा हना, गन्ती २१:७; न्यायाधीस १०:१०; १सामुएल ७:६; भजन संग्रह ५१:५-६
21गो खतम सेल्चा माल्शो थोव़क रे पा शिनार रागी ङा रिम्शो फेक्तीक वा, सहे निक्शी शेकेल चांदी नु ५० शेकेल हेल्शो सुन के कोक्के का ताता। गो मेको साप्पा दाक्ताक्ङ ङा मिन लांइसाक्यी। मिनु मेको आं ताम्बु आगाम थिम्शा वोइक्ता। मेको चांदी नेल्ल क्येङा आगाम बाक्ब” देंत। शेकेल का ११.५ ग्राम बाक्ब।
22मिनु यहोसुमी गेय पाइब आन कली आकान आ ताम्बुम सोइक्ताक्व। मेकोपुकी दोरशा लशा, मेको आ ताम्बुमी दोशा, फेक्तीक वा नु ख्रुइश्शो थोव़क नेल्ल ग्रुंइताक्म। मिनु मेको चांदी नेल्ल क्येङा आगाम बाक्त।
23मिनु मेकोपुकीमी मेको थोव़क ग्रुंइशा, यहोसु नु इस्राएली नेल्ल आन बाक्तीकेम चाक्तेक्म। मिनु परमप्रभु यावे आ ङोंइती वोइक्तेक्म।
24मिनु यहोसु नु इस्राएली नेल्ल गारशा, जेराह आ खिं ङा आकान नु आ खुइ पशो चांदी, फेक्तीक वा नु सुन के कोक्के, मेको आ तमी तौ मेको आ बी ब्यफ, आ गधापुकी, आ भेडापुकी, मेको आ ताम्बु नु मेको नु बाक्शो मारेइ मारेइ आकोर आ बेंसीमी लाइक्तेक्म। लेवी २४:१४-१५
25मिनु यहोसुमी आकान कली “गे गो आंइ कली शुश श्येत गेप्तीवी। मुलाक्ती परमप्रभु यावेमी इ कली श्येत गेब” देंत। मिनु इस्राएली नेल्लेमी मेको आन कली फुल्लुमी आप्शा साइक्तेक्म। मिनु मेको आन कली साइश्शा, मीम हुम्ताक्म। ब्यवस्था १३:१६-१७
26मिनु मेको आन तारी शुश फुल्लु तेल्तेक्म। मेको फुल्लु तेल्तीके मुलाक्त सम्म बाक्ब। मिनु नोले परमप्रभु यावे आ गाइक्चा नांइसाक्व। मिनु मेको बेंसी आ नें आकोर बेंसी वोइक्तेक्म। मेको मुल सम्म बाक्ब। यसैया ६५:१०; होसे २:१७
