5मिनु गो “परमप्रभु यावे, आं परमप्रभु, गे आंइ पर्बम पशो छक लाक्चा ङा गेय नु इन मिम्शो कोंइताक्की। मेको शुश बाक्नीम। इन खोदेंशो सुइ मबाक्नीम। गो मेको आन कली शेंशें दाक्ती, देंती हना यो, नेल्ल शेंने मचबु। मारदे हना मेको शुश बाक्नीम। भजन संग्रह १३९:१७-१८
6गे मार मार क्योरशा चढ़ेशो नु जचा चढ़ेशो तशा मग्येरसीनी। तन्न इन अरेशो लोव़ नेंचा कली नोफा दाइक्ब सेल्तीनी, चोशा चढ़ेशो नु पाप आ पर्बम चढ़ेशो मपुंइनी। भजन संग्रह ५०:८-१३; भजन संग्रह ५१:१८; १सामुएल १५:२२; हिब्रू १०:५-१०
7मिनु गो ‘गो एक बाक्ती, दे परमप्रभु यावे आ लोव़मी आं पर्बम ब्रेक्शो बाक्ब’ देंती।
8परमप्रभु, गो इन दाक्शो पशोमी आं कली ग्येरपाइक्ब। इन अरेशो लोव़ आं थुंम बाक्ब।
9गो ठेयब ग्रुम्तीकेमी इन रिम्शो ब्रोंइतीक लोव़ आ पर्बम लोव़ पाइनुङ। परमप्रभु यावे, गो सिक्सी पा मबाक्नुङ। मेको गे तुइक्नीनी।